ສະຫະລັດ ກຳລັງດຶງດູດການພົບປະ ເຈລະຈາ ໃຫ້ເກົາຫຼີເໜືອ ປອດອາວຸດນິວເຄຣຍ

ຂ່າວຕ່າງປະເທດ ເມື່ອວັນທີ 8 ເມສານີ້ ໃຫ້ຮູ້ວ່າ ເລຂາທິການສື່ມວນຊົນຂອງ ທຳນຽບຂາວ  Jen Psaki  ຢືນຢັນ ໃນວັນທີ 7 ເມສານີ້ວ່າ ສະຫະລັດຈະປະຕິບັດຄຳໝັ້ນສັນຍາເຮັດໃຫ້ແຫຼມເກົາຫຼີ ປອດອາວຸດນິວເຄຣຍ.

ສຳນັກຂ່າວສານ Yonhap ຂອງເກົາຫຼີໃຕ້ ໂດຍອ້າງຄຳຖະແຫຼງການ ຂອງທ່ານນາງ Psaki ວ່າ: “ພວກເຮົາໄດ້ມີເປົ້າໝາຍຢ່າງຊັດເຈນໄວ້ກັບລັດຖະບານ ພຽງຢາງແລ້ວ, ແຕ່ພວກເຮົາກໍຍັງຈະຕ້ອງເພີ່ມທະວີມາດຕະການລົງໂທດຕໍ່ໄປ. ສະຫະລັດໄດ້ປຶກສາຫາລືກັບພັນທະມິດຂອງຕົນ ແລະ ພວກເຮົາໄດ້ມີບາງວິທີການທາງການທູດໄວ້ແລ້ວ ຖ້າຫາກຄວາມຄາດຫວັງເປັນໄປຕາມຈຸດປະສົງວາງໄວ້”.

ການປະກາດນະໂຍບາຍດັ່ງກ່າວຂອງສະຫະລັດ ມີຂຶ້ນໃນທ່າມກາງ ເກົາຫຼີເໜືອ ກະກຽມດຳເນີນການຍິງທົດສອບລູກສອນໄຟ ຂີປານະວຸດຈາກເຮືອດຳນໍ້າໃນຕໍ່ໜ້ານີ້. ໂຄສົກຂອງກະຊວງປ້ອງກັນປະເທດ ສະຫະລັດ John Kirby ກ່າວໃນກອງປະຊຸມຖະແຫຼງຂ່າວໃນວັນທີ 7 ເມສານີ້ວ່າ: “ການຊ້ອມຮົບແມ່ນມີຄວາມສຳຄັນຫຼາຍ, ພວກເຮົາຮັບປະກັນວ່າ ພັນທະມິດສະຫະລັດ-ເກົາຫຼີໃຕ້ ແມ່ນມີຄວາມໝັ້ນຄົງແຂງແກ່ນຫຼາຍ ເພື່ອປ້ອງກັນສິດຜົນປະໂຫຍດລວມຂອງພວກເຮົາ ແລະ ຈະຮ່ວມມືກັບ ໂຊນ ໃນທຸກສະຖານະການ”.