ເອີຣົບຖະແຫລງແອສຕຣາເຊນເນກາ ອາດມີຜົນຂ້າງຄຽງ ແຕ່ໃຫ້ໃຊ້ຕໍ່ໄປ
ອົງການຢາແຫ່ງສະຫະພາບເອີຣົບ ຫລື EMA ຖະແຫລງຜົນການສອບສວນກໍລະນີວັກຊີນໂຄວິດ-19 ຂອງແອສຕຣາເຊນເນກາ ວ່າມີການກ່ຽວຂ້ອງກັບຜົນຂ້າງຄຽງອາການຫລອດເລືອດອຸດຕັນທີ່ເກີດຂຶ້ນກັບຜູ້ຮັບວັກຊີນຫລາຍຄົນ ຫລື ບໍ່.
ໂດຍຜູ້ອຳນວຍການ EMA ນາງ ອີເມີ ຄຸກ ຍອມຮັບວ່າ: ພົບຄວາມເປັນໄປໄດ້ວ່າວັກຊີນແອສຕຣາເຊນເນກາ ອາດກໍ່ໃຫ້ເກີດຜົນຂ້າງຄຽງດັ່ງກ່າວແທ້, ແຕ່ຍັງຖືວ່າເກີດຂຶ້ນໄດ້ໜ້ອຍ. ຂະນະດຽວກັນຜົນຂ້າງຄຽງດັ່ງກ່າວ ສ່ວນຫລາຍເກີດຂຶ້ນໃນຜູ້ຍິງອາຍຸຕໍ່າກວ່າ 60 ປີ ຫລັງຈາກໄດ້ຮັບວັກຊີນໄປແລ້ວບໍ່ເກີນ 2 ອາທິດ.
ທັງນີ້, ຄະນະກຳມະການສອບສວນໄດ້ພິຈາລະນາຈາກກໍລະນີຄົນເຈັບ 86 ຄົນໃນເອີຣົບ ແລະ ອັງກິດ ທີ່ເກີດຜົນຂ້າງຄຽງຂຶ້ນ, ຂະນະທີ່ ມີຜູ້ຮັບວັກຊີນແອສຕຣາເຊນເນກາໄປແລ້ວ 25 ລ້ານກວ່າຄົນ.
ເຖິງຢ່າງໃດກໍຕາມ, EMA ເຫັນວ່າ: ອາການຫລອດເລືອດອຸດຕັນ ຄວນຖືກລະບຸໄວ້ວ່າ: ເປັນຜົນຂ້າງຄຽງປະການໜຶ່ງທີ່ອາດເກີດຂຶ້ນ ແຕ່ພົບໄດ້ໜ້ອຍ ຫລັງຈາກໄດ້ຮັບວັກຊີນ ແລະ ເຫັນວ່າຍັງຄວນໃຊ້ວັກຊີນນີ້ຕໍ່ໄປ ເພາະມີປະໂຫຍດຫລາຍກວ່າຄວາມສ່ຽງທີ່ຈະເກີດຜົນຂ້າງຄຽງຫລາຍ.
ສ່ວນຄະນະກຳມະການວັກຊີນ ແລະ ພູມຄຸ້ມກັນຂອງອັງກິດ ໄດ້ຖະແຫລງວ່າ: ຊາວອັງກິດທີ່ອາຍຸລະຫວ່າງ 18-29 ປີ ທີ່ມີສຸຂະພາບແຂງແຮງດີ ຄວນມີສິດທີ່ຈະເລືອກໄດ້ວ່າ: ຈະຮັບການສັກວັກຊີນຂອງແອສຕຣາເຊນເນກາ ຫລື ຈະຮັບວັກຊີນຊະນິດອື່ນທີ່ອະນຸມັດໃຫ້ໃຊ້ໄດ້ເປັນທາງເລືອກ. ເຖິງຢ່າງໃດກໍຕາມ, ສຳລັບຜູ້ໃດທີ່ໄດ້ຮັບວັກຊີນຂອງແອສຕຣາເຊນເນກາໃນໂດສທຳອິດໄປແລ້ວ ຄວນຈະຮັບວັກຊີນຊະນິດດຽວກັນຕໍ່ໄປ. ພ້ອມຢືນຢັນວ່າ: ບໍ່ຄວນຈະຕ້ອງມີການຕັດວັກຊີນຊະນິດໃດອອກໄປ.
ອ້າງອີງ:
