ປະທານປະເທດ ເນັ້ນໃຫ້ຄະນະຊາວໜຸ່ມ ເອົາໃຈໃສ່ຫລາຍບັນຫາສຳຄັນ

- 170013221 1599370363600071 7807778115520190581 n - ປະທານປະເທດ ເນັ້ນໃຫ້ຄະນະຊາວໜຸ່ມ ເອົາໃຈໃສ່ຫລາຍບັນຫາສຳຄັນ
- Untitled design - ປະທານປະເທດ ເນັ້ນໃຫ້ຄະນະຊາວໜຸ່ມ ເອົາໃຈໃສ່ຫລາຍບັນຫາສຳຄັນ

​ໃນ​ໂອກາດວັນສ້າງຕັ້ງຄະນະຊາວໜຸ່ມ ປະຊາຊົນ ປະຕິວັດລາວ ຄົບຮອບ 66 ປີ (14/4/1955-14/4/2021) ​ແລະ ​ໃນ​ໂອກາດ ສຳ​ເລັດ​ກອງ​ປະຊຸມ​ສາມັນ​ຄົບ​ຄະນະ​ບໍລິຫານ​ງານ​ສູ​​ນ ກາງ​ຊາວ​ໜຸ່ມ​ປະຊາຊົນ​ປະຕິວັດ​ລາວ ຄັ້ງ​ທີ 2 ສະ​ໄໝ​ທີ VIII​ ວັນ​ທີ 9 ​ເມສາ 2021 ນີ້, ທ່ານ ທອງ​ລຸນ ສີ​ສຸ​ລິດ ​ເລ​ຂາ​ທິການ​ໃຫຍ່ ຄະນະ​ບໍລິຫານ​ງານ​ສູນ​ກາງ​ພັກ, ປະທານ​ປະ​ເທດ ​ແຫ່ງ ສປປ ລາວ ​ໄດ້​​ພົບ​ປະ​ໂອ້​ລົມ ຕໍ່​ຄະນະ​ຊາວ​ໜຸ່ມ ​ແລະ ຕົວ​ແທນ​ຊາວ​ໜຸ່ມ-​ເຍົາວະ​ຊົນ ທົ່ວ​ປະ​ເທດ ​ໂດຍ​ໄດ້​ຊີ້​ນຳ ​ໃຫ້​ຄະນະ​ຊາວ​ໜຸ່ມ​ປະຊາຊົນ ​ປະຕິວັດ​ລາວ ​ເອົາ​ໃຈ​ໃສ່​ຫລາຍ​ບັນຫາ​ສຳຄັນ ​​ເພື່ອ​ເຮັດ​ໃຫ້​ວຽກງານ​ຂອງຄະນະ​ຊາວ​ໜຸ່ມ ປປ ລາວ​ ໄດ້​ຮັບ​ການ​ພັດທະນາ ​ແລະ ​ເຕີບ​​ໃຫຍ່​ເຂັ້ມ​ແຂງຂຶ້ນ​ໄປ​ເລື້ອຍໆ.

- 169647406 1599370353600072 7062127295145653473 n 300x191 - ປະທານປະເທດ ເນັ້ນໃຫ້ຄະນະຊາວໜຸ່ມ ເອົາໃຈໃສ່ຫລາຍບັນຫາສຳຄັນ

​ໂອກາດ​ນີ້, ທ່ານ ທອງ​ລຸນ ສີ​ສຸ​ລິດ ​ໄດ້​ເນັ້ນ​ໃຫ້ຄະນະຊາວໜຸ່ມທຸກຂັ້ນ ເອົາໃຈໃສ່ສືບຕໍ່ເອົາ ໃຈໃສ່ປັບປຸງກໍ່ສ້າງການຈັດຕັ້ງຂອງຕົນໃຫ້ເຂັ້ມແຂງໜັກແໜ້ນ, ມີຄວາມສາມາດພຽງພໍໃນການຈັດຕັ້ງ, ນໍາພາ, ຊີ້ນໍາການເຄື່ອນໄຫວຂອງຊາວໜຸ່ມ ໂດຍສະເພາະ ປັບປຸງກົງຈັກ, ປັບປຸງພາລະບົດບາດຂອງຄະນະຊາວໜຸ່ມແຕ່ລະຂັ້ນ, ​ສ້າງ​ໃຫ້ມີ​ໄວ​ໜຸ່ມ​ທີ່​ເກັ່ງ​ແລ້ວ​ໃຫ້​ເກັ່ງ​ຂຶ້ນ​ຕື່ມ​ອີກ, ດີ​ແລ້ວ​ໃຫ້ດີ​ຂຶ້ນ​ຕື່ມ, ​ເຂັ້ມ​ແຂງ​ແລ້ວ​ໃຫ້​ເຂັມ​ແຂງ​ຂຶ້ນ​ຕື່ມ​  ​ເພື່ອ​ເປັນ​ກຳລັງ​ແຮງ ​ໃນ​ການ​ປະຕິບັດ​ໜ້າ​ທີ່, ພັນທະທີ່​ພັກ-ລັດມອບ​ໝາຍ​ໃຫ້ສຳ​ເລັດ​ຕາມ​ເປົ້າ​ໝາຍ, ພ້ອມ​ທັງຫັນ​ແນວ​ຄິດ, ການ​ກະທຳ, ວິ​ໄສ​ທັດ, ຄວາມ​ຊິນ​ເຄີຍ, ວິ​​ຖີຊີວິດຂອງ​​ໄວໜຸ່ມລາວ ກໍ​ຄື ນັກຮຽນ-ນັກ​ສຶກສາ ​ໃຫ້​ເຂົ້າ​ຫາ​ການ​ໄຝ່​ຮູ້​ໄຝ່​ຮຽນ, ​ສະ​ແຫວງ​ຫາ​ຄວາມ​ກ້າວໜ້າ, ສ້າງ​ໃຫ້​ເປັນ​ຄົນ​ດີ, ຄົນ​ເກັ່ງ ​ແລະ ຊື່ສັດ​ບໍລິສຸດ, ​ໃຫ້​ຖື​ສຳຄັນ​ການ​ພັດທະນາ​ຊາວ​ໜຸ່ມ-​ເຍົາ ວະ​ຊົນ ​ເພື່ອ​ໃຫ້​ຊາວ​ໜຸ່ມ​ເປັນ​ຜູ້​ສືບ​ທອດ ​ແລະ ​ໃຫ້ສືບຕໍ່ບໍາລຸງ, ກໍ່ສ້າງຖັນແຖວພະນັກງານເຮັດວຽກຊາວໜຸ່ມ-ເຍົາວະຊົນ ໃຫ້ເຂັ້ມແຂງໃນສະພາບການໃໝ່. ພ້ອມ​ນັ້ນ, ການສ້າງພະນັກງານແມ່ນໃຫ້ໄດ້ທັງຄວາມຮູ້ ແລະ ຄວາມສາມາດໃນການຈັດຕັ້ງປະຕິບັດວຽກງານຕົວຈິງ, ການບໍາລຸງຍົກລະດັບຄວາມຮູ້ກໍໃຫ້ໄດ້ຄຸນນະພາບແທ້ໆ ຈຶ່ງຈະໄດ້ພະນັກງານເຂັ້ມແຂງ; ພ້ອມ​ທັງ​ໃຫ້ເສີມຂະຫຍາຍມູນເຊື້ອປະຈັນບານ ຊ່ວຍເຫລືອສັງຄົມ ເປັນຕົ້ນ ການຊ່ວຍປະຊາຊົນລົບລ້າງຄວາມທຸກຍາກ, ແກ້ໄຂຜົນກະທົບຈາກໄພພິບັດທໍາມະຊາດ, ສ້າງຂະບວນການສົ່ງເສີມສຸຂະພາບ, ຮັກສາສິ່ງແວດລ້ອມ, ຕ້ານປະກົດການຫຍໍ້ທໍ້ໃນສັງຄົມ, ສົ່ງເສີມການພັດທະນາວິຊາຊີບ, ສ້າງວຽກເຮັດງານທໍາ, ຊອກຫາລາຍໄດ້ທີ່ຖືກຕ້ອງຕາມກົດໝາຍ; ຍົກລະດັບຄຸນນະພາບຂອງການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມ, ເພາະຂະບວນການນີ້ຈະກາຍເປັນກໍາລັງແຮງຂັບເຂື່ອນ ວຽກງານພັດທະນາຊາວໜຸ່ມ ທີ່ມີໝາກຜົນຕົວຈິງ; ​​ໃຫ້ຈັດຕັ້ງຄຸ້ມຄອງ, ພັດທະນາເຍົາວະຊົນ-ອະນຸຊົນ ຜູ້ສືບທອດໃຫ້ມີຄວາມເຂັ້ມແຂງ, ປູກຈິດສໍານຶກທີ່ດີແຕ່ເຍົາໄວ ພວກເຮົາຈຶ່ງໄດ້ຊາວໜຸ່ມທີ່ໜັກແໜ້ນເຂົ້າໃນພາລະກິດຕ່າງໆຂອງຊາດ; ຄະ ນະຊາວໜຸ່ມແຕ່ລະຂັ້ນຕ້ອງເປັນເຈົ້າການປຸກລະດົມການຈັດຕັ້ງໂຮງຮຽນ, ຄອບຄົວຜູ້ປົກຄອງ ແລະ ສັງຄົມໃຫ້ມີສ່ວນຮ່ວມຫລາຍກ່ອນເກົ່າ ເພື່ອພັດທະນາອະນຸຊົນ, ເຍົາວະຊົນ ໃຫ້ເຂົາເຈົ້າເປັນຄົນດີ, ຮຽນເກັ່ງ, ມີຄຸນສົມບັດດີ ​ແລະ ອື່ນໆ.

- Wave100S AD to Website 2020 0 - ປະທານປະເທດ ເນັ້ນໃຫ້ຄະນະຊາວໜຸ່ມ ເອົາໃຈໃສ່ຫລາຍບັນຫາສຳຄັນ

ໂອກາດ​ດຽວ​ກັນ, ທ່ານ ທອງ​ລຸນ ສີ​ສຸ​ລິດ ໄດ້ຍົກໃຫ້ເຫັນປະຫວັດຄວາມເປັນມາ ແລະ ຜົນງານການເຄື່ອນໄຫວ ຂອງຊາວໜຸ່ມລາວບັນດາເຜົ່າ ໃນໄລຍະ 66 ປີ ຜ່ານມາຈົນເຖິງປັດຈຸບັນ ​ເຊິ່ງ​ພັກປະຊາຊົນປະຕິວັດລາວ ກໍ​ຄື ປະ​ທານ ໄກ​ສອນ ພົມ​ວິ​ຫານ ໄດ້​ໃຫ້​ຄຳ​ຂະ​ໜານ​ນາມ​ແກ່​ຊາວ​ໜຸ່ມ​ພວກ​ເຮົາ​ວ່າ: ຊ​າວ​ໜຸ່ມ​ຈົ່ງ​ເປັນ​ດັ່ງ​ນົກ​ອິນ​ຊີ ​ທີ່​ບໍ່​ຫວັ່ນໄຫວ​​ຕໍ່​ພະ​ຍຸ​ລົມ​ແດງ ຈົ່ງ​ກາຍ​ເປັນ​ສິ​ນ​ໄຊ​ແຫ່ງ​ຍຸກ​ສະ​ໄໝ​ຂອງ​ພວກ​ເຮົາ, ຊາວໜຸ່ມເປັນແຂນຂວາຂອງພັກ, ເປັນກະດູກສັນຫລັງຂອງປະເທດຊາດ, ເປັນຜູ້ສືບທອດມູນເຊື້ອ ແລະ ວິລະກໍາປະຫວັດສາດທີ່ຈົງຮັກພັກດີຕໍ່ພັກ ທັງໜົດນັ້ນແມ່ນມູນ ເຊື້ອອັນລວມຍອດຂອງ ຊາວໜຸ່ມລາວທີ່ຕອບສະໜອງໄດ້ຄວາມຮຽກຮ້ອງຕ້ອງການຂອງປະເທດຊາດໃນການເຮັດສໍາເລັດພາລະກໍາປະຫວັດສາດຂອງຕົນ ຄື: ປົດປ່ອຍປະເທດຊາດ ແລະ ພວມເສີມຂະຫຍາຍບົດບາດປະຈັນບານເຂົ້າໃນສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດ ທະນາປະເທດຊາດຕາມທິດຍືນຍົງ ສູ່ຈຸດໝາຍສັງຄົມນິຍົມ.

ຊາວໜຸ່ມລາວບັນດາເຜົ່າ ໄດ້ກາຍເປັນກໍາລັງແຮງຕົ້ນຕໍ ທັງພາລະກິດຕໍ່ສູ້ປົດປອຍຊາດ, ທັງພາລະກິດປົກປັກຮັກສາ ແລະ ສ້າງສາປະເທດຊາດ ຍາມໃດຊາວໜຸ່ມກໍຢູ່ອ້ອມຂ້າງພັກ, ເປັນກໍາລັງປະຈັນບານ ໃຫ້ແກ່ພັກ, ເປັນຜູ້ສືບທອດທີ່ຈົງຮັກພັກດີ ຕໍ່ພັກຕະຫລອດມາ ໂດຍສະເພາະໄລຍະທີ່ມີການປ່ຽນເເປງໃໝ່ຢ່າງຮອບດ້ານທີ່ມີຫລັກການຂອງພັກເຮົາ, ຄະນະຊາວໜຸ່ມປະຊາຊົນ ປະຕິວັດລາວພວກເຮົາໄດ້ພະຍາຍາມຫັນແນວທາງຂອງພັກໃຫ້ກາຍເປັນໜ້າທີ່, ແຜນການ, ໂຄງການ ແລະ ກິດຈະກໍາໃນການພັດທະນາຊາວໜຸ່ມໃນແຕ່ລະໄລຍະ.

- WhatsApp Image 2020 05 27 at 5 - ປະທານປະເທດ ເນັ້ນໃຫ້ຄະນະຊາວໜຸ່ມ ເອົາໃຈໃສ່ຫລາຍບັນຫາສຳຄັນ
- WhatsApp Image 2020 05 27 at 5 - ປະທານປະເທດ ເນັ້ນໃຫ້ຄະນະຊາວໜຸ່ມ ເອົາໃຈໃສ່ຫລາຍບັນຫາສຳຄັນ
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: ເນື້ອຫາຂ່າວມີລິຂະສິດ !!