ສ້າງຄວາມສາມາດ ໃຫ້ຈຸນລະວິສາຫະກິດ, ວິສາຫະກິດ ຂະໜາດນ້ອຍ-ກາງ ໃນການຮັບມືກັບຜົນກະທົບຈາກໂຄວິດ-19
ໃນວັນທີ 7 ເມສາ 2021 ອົງການເພື່ອການພັດທະນາ ແລະ ການຮ່ວມມືປະເທດສະວິດ ຫລື SDC ຮ່ວມກັບ ກະຊວງອຸດສາຫະກຳ ແລະ ການຄ້າ, ສະພາການຄ້າ ແລະ ອຸດສາຫະກຳແຫ່ງຊາດລາວ ເປີດໂຄງການສະໜັບສະໜູນ ສ້າງຄວາມສາມາດໃຫ້ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ໃນການຮັບມືກັບຜົນກະທົບຈາກໂຄວິດ-19.
ທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ກ່າວວ່າ: ໂຄງການສະໜັບສະໜູນ ສ້າງຄວາມສາມາດໃຫ້ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ເປັນໂຄງການໝຶ່ງທີ່ຈະຊ່ວຍ ໃນການແກ້ໄຂຄວາມຫຍຸ້ງຍາກ ໃນການເຂົ້າເຖິງແຫລ່ງທຶນ, ຊ່ວຍປັບປຸງການດໍາເນີນທຸລະກິດ, ປັບປຸງການບໍລິຫານຈັດການທຸລະກິດ, ແກ້ໄຂຄວາມຫຍຸ້ງຍາກໃນການເຂົ້າເຖິງເຕັກໂນໂລຊີ ແລະ ຫຍຸ້ງຍາກໃນການເຂົ້າເຖິງຂໍ້ມູນຂ່າວສານ ເຮັດໃຫ້ທຸລະກິດເກີດມີຂໍ້ຈໍາກັດ ໃນການຂະຫຍາຍຕົວ, ເຊິ່ງການລະບາດຂອງພະຍາດໂຄວິດ-19 ໄດ້ສົ່ງຜົນກະທົບຕໍ່ການພັດທະນາເສດຖະ ກິດ ໂດຍສະເພາະທຸລະກິດການທ່ອງທ່ຽວ ແລະ ການບໍລິການໂຮງແຮມ.
ທ່ານ ຈອນ ຟຣັງຊົວ ຄູໂນດ ຜູ້ອໍານວຍການອົງການ SDC ໄດ້ກ່າວວ່າ: ໂຄງການດັ່ງກ່າວ ຈະຊ່ວຍຊຸກຍູ້ສ້າງຄວາມຮ່ວມມືໃຫ້ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ໃນການສ້າງຄວາມເຂັ້ມແຂງ ສາມາດຮັບມືກັບວິກິດການລະບາດຂອງໂຄວິດ-19, ຜ່ານມາເຫັນວ່າລັດຖະບານລາວ ສາມາດມີມາດຕະການປ້ອງກັນໂຄວິດ-19 ໄດ້ດີ, ເຊິ່ງລັດຖະບານສະວິດ ໄດ້ໃຫ້ຄວາມສໍາຄັນໃນການຮັບມືກັບວິກິດການດັ່ງກ່າວ ໂດຍໄດ້ຈັດສັນງົບປະມານຊ່ວຍເຫລືອຫລາຍປະເທດ ລວມທັງ ສປປ ລາວ.
