ປັກກິ່ງລົ້ມແຊ້ມນິວຢອກ ຂຶ້ນເປັນເມືອງມະຫາເສດຖີຂອງໂລກ
ມະຫານະຄອນປັກກິ່ງຂຶ້ນເປັນເມືອງທີ່ມີມະຫາເສດຖີອາໄສຢູ່ຫລາຍທີ່ສຸດໃນໂລກຈາກການຈັດອັນດັບໂດຍວາລະສານຟອບ.
ວັນທີ 9 ເມສາ 2021, ວາລະສານຟອບລະບຸໃຫ້ມະຫານະຄອນປັກກິ່ງ ເມືອງຫລວງຂອງຈີນ ເປັນເມືອງທີ່ມີຄົນລວຍລະດັບ “ມະຫາເສດຖີ” ອາໄສຢູ່ຫລາຍກວ່າທຸກເມືອງທົ່ວໂລກ ໃນການຈັດອັນດັບມະຫາເສດຖີຂອງໂລກປະຈຳປີ 2021.
ນະຄອນຫລວງປັກກິ່ງມີມະຫາເສດຖີອາໄສຢູ່ໃນເມືອງເພີ່ມຂຶ້ນຈາກປີຜ່ານມາ 33 ຄົນ ເປັນ 100 ຄົນໃນປີນີ້ ລົ້ມແຊ້ມເກົ່າ 7 ປີຊ້ອນຄືນິວຢອກ ເຊິ່ງຕົກໄປຢູ່ອັນດັບ 2 ຈາກຈຳນວນມະຫາເສດຖີທີ່ອາໄສຢູ່ໃນເມືອງ 99 ຄົນ.
ຟອບລະບຸວ່າ: ສາເຫດທີ່ປັກກິ່ງມີມະຫາເສດຖີໜ້າໃໝ່ເພີ່ມຂຶ້ນຈຳນວນຫລາຍແບບນີ້ ເປັນເພາະເມືອງແຫ່ງນີ້ສາມາດຟື້ນຕົວຈາກການລະບາດໃຫຍ່ຂອງພະຍາດໂຄວິດ-19 ໄດ້ຢ່າງວ່ອງໄວ ອີກທັງຍັງໄດ້ແຮງສະໜັບສະໜູນຈາກການເພີ່ມຂຶ້ນຂອງບໍລິສັດເຕັກໂນໂລຊີ ແລະ ຕະຫລາດຫລັກຊັບທີ່ເຕີບໃຫຍ່ຂຶ້ນຢ່າງແຂງແຮງ.
ນອກຈາກນະຄອນຫລວງປັກກິ່ງແລ້ວ ຍັງມີອີກ 3 ເມືອງໃນຈີນທີ່ຕິດອັນດັບເມືອງທີ່ມີມະຫາເສດຖີອາໄສຢູ່ຫລາຍທີ່ສຸດ ໄດ້ແກ່ ເຊິນເຈິ່ນ (ອັນດັບ 5), ຊຽງໄຮ້ (ອັນດັບ 6) ແລະ ຫາງໂຈ (ອັນດັບ 10).
ສ່ວນເມືອງອື່ນໆໃນ 10 ອັນດັບທຳອິດທີ່ມີມະຫາເສດຖີອາໄສຢູ່ຫລາຍສຸດໃນໂລກມີທັງ ຮົງກົງ (ອັນດັບ 3), ມອສໂກ (ອັນດັບ 4), ລອນດອນ (ອັນດັບ 7) ລວມທັງມຸມໄບ ແລະ ຊານຟຣານຊິສໂກ (ອັນດັບ 8) ເຊິ່ງມີມະຫາເສດຖີຢູ່ໃນເມືອງ 48 ຄົນເທົ່າກັນ.
ອ້າງອີງ:
https://www.bbc.com/news/business-56671638
https://www.forbes.com/…/worlds-richest-cities-the…/…
