ຜົນສຳຫລວດ 10 ປະເທດທີ່ໜ້າສົນໃຈໄປຮຽນຕໍ່ຫລາຍທີ່ສຸດໃນໂລກ ປີ 2021 ໂດຍ Go Overseas
April 9, 2021 - 4:26 PM
ການຮຽນຕໍ່ຕ່າງປະເທດຖືເປັນໜຶ່ງໃນເປົ້າໝາຍຍອດນິຍົມທີ່ຫລາຍຄົນມັກໄຝ່ຝັນວ່າຄັ້ງໜຶ່ງໃນຊີວິດຕ້ອງເຮັດໃຫ້ສຳເລັດໃຫ້ໄດ້ ເຖິງວ່ຈາກສະຖານະການຕ່າງໆທີ່ເກີດຂຶ້ນໃນປີ 2020 ຈະເຮັດໃຫ້ການເດີນທາງລຳບາກຂຶ້ນກໍຕາມ. ໜຶ່ງໃນຂັ້ນຕອນລຳດັບຕົ້ນໆທີ່ຄວນພິຈາລະນາເພື່ອນຳໄປສູ່ການຊອກຫາສະຖາບັນ ຫລື ຫລັກສູດທີ່ໜ້າສົນໃຈກໍຄື ເຮົາຄວນໄປຮຽນຕໍ່ຢູ່ປະເທດໃດດີ? ເພື່ອຊ່ວຍໃຫ້ທ່ານສາມາດຕັດສິນໃຈໄດ້ງ່າຍຂຶ້ນ ພວກເຮົາໄດ້ຍົກຜົນສຳຫລວດຈາກເວັບໄຊ Go Overseas ມາໃຫ້ທ່ານປະກອບການພິຈາລະນາ.
- ອັນດັບ 10 : ສະຫະລັດອາຫລັບເອມິເຣດ (ປະເທດຕິດອັນດັບໃໝ່) : ບ່ອນນີ້ມີໂອກາດຫລາກຫລາຍໃຫ້ນັກສຶກສາຕ່າງສັນຊາດ ບໍ່ວ່າຈະເປັນທຶນການສຶກສາ ຫລື ການເຮັດວຽກຫລັງຮຽນຈົບ ແລະ ເນື່ອງຈາກສະຖານະການໂຄວິດ- 19 ເຮັດໃຫ້ພວກເຂົາຫາກໍປະກາດຜ່ອນຜັນຂໍ້ກຳນົດເລື່ອງວີຊ່າໄລຍະຍາວເພື່ອອຳນວຍຄວາມສະດວກໃຫ້ແກ່ນັກສຶກສາຕ່າງສັນຊາດ. ສາຂາທີ່ໄດ້ຮັບຄວາມນິຍົມຫລາຍທີ່ສຸດແມ່ນທຸລະກິດ, ວິທະຍາສາດ, ຄອມພິວເຕີ ແລະ ສະຖາປັດຕະຍະກຳ ໂດຍຫລາຍສະຖາບັນຢູ່ນີ້ໄດ້ຮັບການຍອມຮັບໃນເລື່ອງຂອງມາດຕະຖານລະດັບໂລກ.
- ອັນດັບ 9 : ປະເທດອັງກິດ (ອັນດັບ 8 ໃນປີ 2020) : ດ້ວຍຂໍ້ຈຳກັດໃນເລື່ອງການເດີນທາງໄລຍະໂຄວິດ- 19 ເຮັດໃຫ້ປະເທດອັງກິດມີອັນດັບທີ່ຫລຸດລົງເລັກນ້ອຍ. ແນວໃດກໍຕາມບ່ອນນີ້ຍັງຄົງເປັນທີ່ໜ້າສົນໃຈສຳລັບນັກສຶກສາຕ່າງສັນຊາດ ເນື່ອງຈາກເປັນທີ່ຕັ້ງຂອງສະຖາບັນທີ່ເກົ່າແກ່ ແລະ ມີຊື່ສຽງລະດັບໂລກ ດັ່ງ Cambridge ແລະ ທ່ານສາມາດຕື່ມເຕັມຄວາມໄຝ່ຮູ້ໄດ້ຢ່າງຫລາກຫລາຍ ບໍ່ວ່າຈະເປັນການຍ່າງຊົມພິພິດທະພັນ ແລະ ຫ້ອງສະມຸດທີ່ມີໃຫ້ເຂົ້າຊົມໄດ້ໂດຍບໍ່ເສຍເງິນຫລາຍແຫ່ງ ເອີ້ນໄດ້ວ່າເໝາະສົມທີ່ສຸດສຳລັບຄົນມັກທ່ອງທ່ຽວໄປພ້ອມກັບການເພີ່ມທັກສະ.
- ອັນດັບ 8 : ປະເທດເບຣຊິລ (ປະເທດຕິດອັນດັບໃໝ່) : ເບຣຊິລ ເປັນປະເທດທີ່ໃຫຍ່ທີ່ສຸດໃນແຖບອາເມລິກາໃຕ້ ທີ່ແຫ່ງນີ້ມີປະຫວັດສາດອັນຍາວນານ ແລະ ກ້ວາງຂວາງໄປດ້ວຍແຫ່ລງທ່ອງທ່ຽວທາງກິລາ ລວມເຖິງສະຖານທີ່ທາງວັດທະນະທຳໃຫ້ຢ້ຽມຊົມ ທັງຍັງມີປະຫວັດສາດໜ້າຮູ້ຫລວງຫລາຍໃຫ້ສຶກສາ ເຊິ່ງໃນຂະນະທີ່ຮຽນຢູ່ບ່ອນນີ້ ທ່ານສາມາດສະໝັກເປັນອາສາສະໝັກໃນໂຄງການຕ່າງໆເພື່ອເປີດປະສົບການແປກໃໝ່ໄດ້ຢ່າງຫລວງຫລາຍ ທັງນີ້ ເບຣຊິລ ຍັງເປັນປະເທດໃຫຍ່ຕິດອັນດັບ 5 ຂອງໂລກ ດ້ວຍອັດຕາການເຕີບໃຫຍ່ຂອງເສດຖະກິດທີ່ເກີດຂື້ນຢ່າງວ່ອງໄວ ເຮັດໃຫ້ເປັນປາຍທາງທີ່ດີສຳລັບຜູ້ທີ່ສົນໃຈໃນດ້ານຂອງເສດຖະສາດ ແລະ ການເງິນ ທັງຍັງມີໂອກາດຫລວງຫລາຍສຳລັບການເຮັດວຽກຫລັງຮຽນຈົບນຳອີກ.
- ອັນດັບ 7 : ປະເທດໄທ (ປະເທດຕິດອັນດັບໃໝ່) : ໃນປີນີ້ປະເທດເພື່ອນບ້ານຂອງເຮົາດັ່ງປະເທດໄທກໍຕິດອັບດັບ Top 10 ປະເທດທີ່ຍອດຍ້ຽມຂອງ Go Overseas ຫລັກສູດຍອດນິຍົມສຳລັບຄົນຕ່າງສັນຊາດມັກເປັນການສຶກສາດ້ານອາຊີຕາເວັນອອກ, ຊີວະວິທະຍາ ແລະ ການສຶກສາໃນສັດ. ນອກຈາກນີ້, ຄົນຕ່າງສັນຊາດຍັງລົງຄວາມເຫັນວ່າປະເທດໄທເປັນປາຍທາງທີ່ຍອດຍ້ຽມສຳລັບການສຶກສາວັດທະນະທຳທ້ອງຖິ່ນ ຕັ້ງແຕ່ອາຫານໄປຈົນເຖິງສະຖາປັດຕະຍະກຳ ແລະ ການສະແດງ ທັງສາຍາ ສະຫຍາມເມືອງຍິ້ມ ຍັງສ້າງຄວາມປະທັບໃຈໄດ້ຢ່າງຫລາຍ.
- ອັບດັບ 6 : ຮຽນອອນລາຍ : ໃນຂະນະທີ່ ໂຄວິດ – 19 ຍັງຄົງລະບາດໄປທົ່ວໂລກ ຫລາຍຄົນຈຶ່ງເລືອກຫົນທາງທີ່ປອດໄພ ແລະ ປະຢັດຄ່າໃຊ້ຈ່າຍໂດຍການລົງທະບຽນຮຽນອອນລາຍກັບສະຖາບັນທີ່ມີຊື່ສຽງ ເຊິ່ງໃນປັດຈຸບັນກໍມີໃຫ້ເລືອກຢ່າງຫລວງຫລາຍ. ຂໍ້ດີຂອງການຮຽນແບບນີ້ແມ່ນທ່ານຈະສາມາດອອກແບບຕາຕະລາງຮຽນເອງໄດ້ ທັງປະຢັດເວລາ ແລະ ມອບຄວາມສະບາຍໃຈດ້ານຄວາມປອດໄພໃຫ້ກັບຕົນເອງໄດ້ນຳ.
- ອັນດັບ 5 : ປະເທດສະວີເດັນ (ອັນດັບ 10 ໃນປີ 2020) : ສະວີເດັນໄດ້ຮັບການຈັດອັນດັບໃຫ້ເປັນໜຶ່ງໃນປາຍທາງຊັ້ນນຳຂອງໂລກສຳລັບການຮຽນຕໍ່ຂອງນັກສຶກສາຕ່າງສັນຊາດ ເນື່ອງຈາກປັດໄຈຫລວງຫລາຍທີ່ເອື້ອອຳນວຍ ບໍ່ວ່າຈະເປັນຄວາມປອດໄພໃນເມືອງ, ໂອກາດການເຮັດວຽກຫລັງຮຽນຈົບ ໄປຈົນເຖິງຫລັກສູດທີ່ມີໃຫ້ເລືອກຫລວງຫລາຍ. ນອກຈາກນີ້, ຄ່າຄອງຊີບໃນສະວີເດັນຍັງຢູ່ໃນເກນທີ່ດີຫລາຍ ທັງຍັງມີການສະໜັບສະໜູນຈາກພາກລັດ ເພື່ອສົ່ງເສີມການຮຽນຮູ້ຂອງນັກສຶກສາ ໜຶ່ງໃນຫລັກສູດທີ່ໜ້າສົນໃຈແມ່ນການແກ້ໄຂບັນຫາດ້ານສິ່ງແວດລ້ອມ ຫາກທ່ານສົນໃຈໃນຫົວຂໍ້ເຫລົ່ານີ້ ນີ້ແມ່ນໂຕເລືອກຊັ້ນເລີດທີ່ບໍ່ຄວນພາດ.
- ອັນດັບ 4 : ປະເທດນີວຊີແລນ (ອັບດັບ 9 ໃນປີ 2020) : ບ່ອນນີ້ເຕັມໄປດ້ວຍວິທະຍາໄລຂະໜາດນ້ອຍທີ່ຫລາກຫລາຍເພື່ອຕອບໂຈດຄວາມສົນໃຈຂອງນັກຮຽນ ທັງໃນທ້ອງຖິ່ນ ແລະ ຕ່າງສັນຊາດ. ຫລັກສູດທີ່ໜ້າສົນໃຈໄດ້ແກ່ ການສຶກສາຂອງຊາວເມົາຣີ ແລະ ສັດວິທະຍາ. ນອກຈາກນີ້, ດິນແດນໝາກກີວີຍັງໄດ້ຊື່ວ່າເໝາະສົມສຸດໆສຳລັບນັກສຶກສາຕ່າງສັນຊາດ ເນື່ອງຈາກຄ່າສະເລ່ຍຂອງອັດຕາການເກີດອາດຊະຍາກຳຕ່ຳ, ມີການສົ່ງເສີມໃນເລື່ອງສະຫວັດດີການສຸຂະພາບ ແລະ ການໃຊ້ພາສາອັງກິດທີ່ຊ່ວຍໃຫ້ສື່ສານໄດ້ງ່າຍ ທ່ານຈະພົບວ່າຕົນເອງເພີດເພີນໄປກັບວັດທະນະທຳຂອງພວກເຂົາໄດ້ເປັນຢ່າງດີ.
- ອັນດັບ 3 : ປະເທດອຽກລັງ (ອັບດັບ 7 ໃນປີ 2020) : ອຽກລັງ ມີສະຖານທີ່ຫລວງຫລາຍໃຫ້ທ່ານໄດ້ສຳຫລວດ ບໍ່ວ່າຈະເປັນຊາກຫັກພັງຂອງຊາວໄວກິ້ງ, ພູຜາສີຂຽວຂະໜາດໃຫຍ່, ປາສາດ ແລະ ພາສາເກລິກ ເໝາະສຳລັບຜູ້ທີ່ມີຄວາມສົນໃຈດ້ານວັນນະຄະດີ, ພາສາ, ປະຫວັດສາດ ແລະ ອື່ນໆອີກຫລວງຫລາຍ. ທີ່ແຫ່ງນີ້ຍັງເປັນຕົ້ນກຳເນີດຂອງນັກຂຽນທີ່ມີຊື່ສຽງຫລາຍຄົນຂອງໂລກ ເຊັ່ນ : Oscar Wilde ແລະ Eavan Boland Emerald Isle ທັງຍັງເປັນສູນກາງສຳລັບການວິໄຈລະດັບນາໆຊາດໃນສາຂາຕ່າງໆ ເຊັ່ນ : ເຕັກໂນໂລຊີ, ເຄມີ ແລະ ເພສັດຊະກຳ ຈຶ່ງເຊື່ອໄດ້ວ່າຈະເປັນອີກໜຶ່ງປາຍທາງທີ່ຍອດຍ້ຽມສຳລັບທ່ານ.
- ອັນດັບ 2 : ປະເທດອົດສະຕຣາລີ (ອັນດັບ 6 ໃນປີ 2020) : ອົດສະຕຣາລີເປັນທີ່ຕັ້ງຂອງປ່າອັນອຸດົມສົມບູນ ເຕັມໄປດ້ວຍສັດຫາຍາກ ແລະ ແຄມຊາຍຝັ່ງທີ່ໜ້າຕື່ນຕາຕື່ນໃຈ ໜຶ່ງໃນຫລັກສູດທີ່ມີຊື່ສຽງແມ່ນທໍລະນີວິທະຍາ ແລະ ຊີວະວິທະຍາໃນສາຂາຕ່າງໆ. ສຳລັບຜູ້ທີ່ມີໃຈຮັກໃນດົນຕີ ແລະ ສີລະປະ ໃນເມືອງຊິດນີ ຍັງມີ Sydney Opera House ທີ່ມີຊື່ສຽງລະດັບໂລກໃຫ້ໄດ້ໄປສຶກສາ ສິ່ງສຳຄັນຄົນເມືອງນີ້ມັກກິລາກາງແຈ້ງທີ່ສຸດ ທ່ານຈະພົບວ່າຕາມແຄມຊາຍຫາດມີກິດຈະກຳຫລວງຫລາຍໃຫ້ເຂົ້າຮ່ວມຈົນບໍ່ມີເວລາເບື່ອເລີຍ.
- ອັນດັບ 1 : ປະເທດຍີ່ປຸ່ນ (ອັນດັບ 3 ໃນປີ 2020) : ປະເທດຍີ່ປຸ່ນເອີ້ນໄດ້ວ່າເປັນອັບດັບຕົ້ນໆທີ່ຜູ້ຄົນຈະຄົ້ນຫາ ແລະ ເລືອກເປັນສະຖານທີ່ຮຽນຕໍ່ໃນການຈັດອັບດັບຫລາຍປີທີ່ຜ່ານມາ ເຊິ່ງໜຶ່ງໃນຫລັກສູດທີ່ດີທີ່ສຸດຂອງປະເທດຍີ່ປຸ່ນແມ່ນກຸ່ມ ນັກສຶກສາທີ່ເລືອກໄປຮຽນຢູ່ປະເທດນີ້ຈະໄດ້ສຳຜັດກັບວັດທະນະທຳແບບຕາເວັນອອກທີ່ມີເອກະລັກຄຽງຄູ່ໄປກັບເຕັກໂນໂລຊີ ແລະ ນະວັດຕະກຳທີ່ລ້ຳສະໄໝ. ນອກຈາກນີ້, ປະເທດຍີ່ປຸ່ນຍັງໄດ້ຮັບການຍອມຮັບໃນເລື່ອງຂອງຄວາມປອດໄພຕິດອັບດັບໂລກນຳອີກ.
ການເກັບລວບລວມຂໍ້ມູນນີ້ມີປັດໄຈພິຈາລະນາຫລຍຢ່າງດ້ວຍກັນ ທັງຫລັກສູດຍອດນິຍົມ, ຄ່າຄອງຊີບ, ຄຸນນະພາບການສຶກສາ ແລະ ຄວາມສຳເລັດຂອງສະຖາບັນ. ນອກຈາກນີ້, ທາງ Go Overseas ຍັງໄດ້ລວບລວມຄວາມຄິດເຫັນຈາກຜູ້ໃຊ້ງານເທິງເວັບໄຊຂອງພວກເຂົາ ແລະ ການຄົ້ນຫາເທິງ Google ນຳອີກ.
