ວິທີຮຽນພາສາອັງກິດສຳລັບຄົນວຽກຫລາຍ
April 9, 2021 - 4:34 PM
ຫລາຍເທື່ອທີ່ເຮົາຈະຫາຂໍ້ອ້າງໃຫ້ຕົນເອງບໍ່ຕ້ອງຝຶກຝົນທັກສະພາສາອັງກິດໂດຍການຈົ່ມວ່າ ບໍ່ມີເວລາ, ວຽກຫລາຍ, ວຽກຫຍຸ້ງ, ເມື່ອຍ ແລະ ສາລະພັດຈະສັນຫາມາອ້າງ, ແຕ່ຕໍ່ໄປນີ້ຄົງອ້າງແບບນັ້ນບໍ່ໄດ້ແລ້ວ ເພາະເຮົາມີວິທີດີໆໃນການຮຽນພາສາອັງກິດສຳລັບຄົນວຽກຫລາຍ ຫລື ມີເວລາໜ້ອຍມາແນະນຳ ດັ່ງນີ້ :
- ຮຽນເທື່ອລະໜ້ອຍ ແຕ່ຮຽນຫລາຍໆເທື່ອດີກ່ວາ : ການຮຽນເທື່ອລະໜ້ອຍ ຫລື ໃຊ້ໄລຍະເວລາສັ້ນໆໃນການຮຽນ, ແຕ່ເຮັດຕໍ່ເນື່ອງກັນເປັນປະຈຳຈະໄດ້ຜົນດີກ່ວາການຮຽນຕິດຕໍ່ກັນຫລາຍຊົ່ວໂມງ ແຕ່ເຮັດອາທິດລະເທື່ອ ນັ້ນໝາຍຄວາມວ່າ ການຮຽນແຕ່ລະເທື່ອບໍ່ຈຳເປັນຕ້ອງໃຊ້ເວລາຫລວງຫລາຍ ພຽງແຕ່ມື້ລະ 20 ນາທີ ແຕ່ເຮັດທຸກມື້ກໍສາມາດສົ່ງຜົນໃຫ້ເຫັນໄດ້ໃນໄລຍະຍາວໃນບໍ່ດົນ.
- ຫາຄູ່ຫູທາງການຮຽນ : ເຮົາກໍສາມາດໃຊ້ວິທີອື່ນແທນໄດ້ ເຊັ່ນ : ຫາໝູ່ຄົນລາວນຳກັນ ແຕ່ຕົກລົງກັນວ່າຈະລົມກັນໂດຍໃຊ້ພາສາອັງກິດເທົ່ານັ້ນ.
- ເອົາພາສາອັງກິດມາໃຊ້ໃນຊີວິດປະຈຳວັນ : ເຊັ່ນ ຂຽນລາຍການຊື້ສິ່ງຂອງ, ອ່ານຂ່າວ ຫລື ແມ່ນແຕ່ຕັ້ງຄ່າຄອມພິວເຕີ – ໂທລະສັບ ເປັນພາສາອັງກິດ ແລ້ວຕັ້ມໂຮມເພກເປັນເວັບໄຊພາສາອັງກິດ. ການຈະເລີ່ມຮຽນສຳຄັບຫລາກຫລາຍ ແລະ ກ້ວາງຂວາງໃຫ້ໄດ້ນັ້ນຕ້ອງເລີ່ມສະສົມມາຢ່າງຊ້າໆ ແລະ ຝຶກໃຊ້ທຸກມື້.
- ຈົດບັນທຶກເຕືອນຄວາມຈື່ຈຳ : ຂຽນຄຳສັບພາສາອັງກິດ ຫລື ຫລັກການໃຊ້ທີ່ຫາກໍຮຽນຮູ້ໃໝ່ໃສ່ເຈ້ຍແຜ່ນນ້ອຍໆ ແລ້ວຕິດໄປທົ່ວຫ້ອງ ຫລື ເຮືອນຂອງທ່ານ ເມື່ອຍ່າງຜ່ານໄປຜ່ານມາໄດ້ພົບເຫັນຕະຫລອດ ກໍຈະຊ່ວຍເຕືອນຄວາມຊົງຈຳຂອງທ່ານໄດ້ ໂດຍບໍ່ຕ້ອງເສຍເວລານັ່ງເປີດປື້ມອ່ານໃໝ່ອີກຮອບ.
- ໃຊ້ເວລາວ່າງໃຫ້ເປັນປະໂຫຍດ : ເຊັ່ນ ຟັງເພງ ຫລື ຂ່າວພາສາອັງກິດລະຫ່ວາງກຳລັງຂັບລົດ, ອ່ານໜັງສືພາສາອັງກິດໃນໄລຍະພັກກາງເວັນ ຫລື ອ່ານທົບທວນບັນທຶກເຕືອນຄວາມຈື່ຈຳທີ່ຈົດໄວ້ຂະນະນັ່ງລົດປະຈຳທາງກັບເຮືອນ ເວລາວ່າງເລັກໆນ້ອຍໆທີ່ເກີດຂຶ້ນລະຫ່ວາງມື້ຄວນຖືກເອົາມາໃຊ້ໃຫ້ເປັນປະໂຫຍດຢ່າງເຕັມທີ່.
- ເລືອກກິດຈະກຳຜ່ອນຄາຍທີ່ໄດ້ໃຊ້ພາສາອັງກິດໄປນຳ : ແທນການຈະຍ່າງເຂົ້າໂຮງຮູບເງົາໄປເບິ່ງຮູບເງົາຈີນ, ສຽງທີມພາກພາສາໄທ ກໍລອງປ່ຽນມາເບິ່ງຮູບເງົາແບບສຽງອັງກິດໃນຟີມແທນ ຫລື ຊື້ປີ້ເຂົ້າຊົມຄອນເສີດຂອງສິລະປິນຕາເວັນຕົກ, ເຂົ້າຮັບຊົມການສະແດງລະຄອນເວທີຄະນະຈາກຕ່າງປະເທດ ຫລື ແມ່ນແຕ່ໄປຍ່າງຫລິ້ນໃນແຫລ່ງທີ່ມີຄົນຕ່າງສັນຊາດຢູ່ກັນຫລາຍໆ ແລ້ວເຂົ້າໄປສົນທະນາກັບພວກເຂົາກໍໄດ້.
- ໃຊ້ຫ້ອງນ້ຳໃຫ້ເປັນປະໂຫຍດ : ລະຫ່ວາງທີ່ອາບນ້ຳ ຫລື ໃຊ້ຫ້ອງນ້ຳ ເປັນໄລຍະເວລາທີ່ບໍ່ຕ້ອງອາຍໃຜອີກແລ້ວ ທ່ານສາມາດຝຶກເວົ້າພາສາອັງກິດໄດ້ຢ່າງເຕັມທີ່ ລອງເລົ່າເລື່ອງລາວທີ່ທ່ານໄປພົບພໍ້ມາໝົດມື້ນັນເປັນພາສາອັງກິດ ແລ້ວເວົ້າອອກມາໃຫ້ຕົນເອງຟັງ ເຮັດຕະຫລອດທຸກມື້ ທ່ານຈະເວົ້າພາສາອັງກິດໄດ້ຄ່ອງຂຶ້ນເອງ.
- ທົບທວນກ່ອນນອນ : ໃຊ້ເວລາເລັກໆນ້ອຍໆຊ່ວງກ່ອນເຂົ້ານອນເພື່ອການທົບທວນພາສາອັງກິດທີ່ໄດ້ຮຽນຮູ້ໃໝ່ມື້ນັ້ນ ເພາະມີຜົນການວິໄຈກ່າວໄວ້ວ່າ ຂະນະທີ່ເຮົາຫລັບ ສະໝອງຄົນເຮົາຍັງຄົງນຳເອົາຂໍ້ມູນທີ່ຫາກໍໄດ້ຮັບໃໝ່ໆຕອນນັ້ນ ມາປະມວນຜົນຕໍ່ອີກໄລຍະເວລາໜຶ່ງ ເຊິ່ງຈະຊ່ວຍໃຫ້ທ່ານຈື່ຈຳສິ່ງໃໝ່ນັ້ນໄດ້ຖືກຕ້ອງແນ່ນອນຂຶ້ນ.
