ລັດຖະບານຈີນສັ່ງປັບໄໝອາລີບາບາ ກຣຸບ 18.300 ລ້ານຢວນ ຂໍ້ຫາຜູກຂາດຕະຫລາດ
ຫລ້າສຸດມີລາຍງານຈາກ Bloomberg ແລະ CNBC ວ່າ: ຈີນໄດ້ຮຽກເກັບຄ່າປັບໄໝ 18.300 ລ້ານຢວນ (2,8 ພັນລ້ານໂດລາ) ຕໍ່ Alibaba Group ຫລັງຈາກການສອບສວນເພື່ອຕໍ່ຕ້ານການຜູກຂາດ ເຊິ່ງເປັນສ່ວນໜຶ່ງຂອງການປາບປາມດ້ານກົດລະບຽບທີ່ເຮັດໃຫ້ເກີດຄວາມເຄັ່ງຕຶງກ່ຽວກັບອະນາຄົດຂອງອານາຈັກເຕັກໂນໂລຊີຂອງ Jack Ma.
ໜ່ວຍງານເບິ່ງແຍງຕະຫລາດຂອງຈີນ ກ່າວໃນຖະແຫລງການວັນທີ 10 ເມສາວ່າ: ການລົງໂທດດັ່ງກ່າວທຽບເທົ່າກັບ 4% ຂອງຍອດຂາຍພາຍໃນປະເທດຂອງ Alibaba ໃນປີ 2019.
ນອກຈາກນີ້, Alibaba ຈະຕ້ອງໃຊ້ “ການແກ້ໄຂທີ່ຄວບຄຸມ” ລວມທັງການສົ່ງເສີມການຄວບຄຸມພາຍໃນ, ການຢຶດໝັ້ນຕໍ່ການແຂ່ງຂັນທີ່ເປັນທຳ, ການປົກປ້ອງທຸລະກິດໃນແພກຟອມຂອງຕົນ ແລະ ສິດຂອງຜູ້ບໍລິໂພກ ໂດຍບໍລິສັດຈະຕ້ອງສົ່ງລາຍງານກ່ຽວກັບການຄວບຄຸມຕົນເອງໄປຫາໜ່ວຍງານທີ່ມີອຳນາດເປັນເວລາ 3 ປີຕິດຕໍ່ກັນ.
ບໍລິສັດກ່າວວ່າ: “ພວກເຂົາຍອມຮັບການລົງໂທດດ້ວຍຄວາມຈິງໃຈ” ແລະ ຈະປະຕິບັດຕາມແນວທາງກົດໝາຍໃໝ່ເພື່ອຍົກລະດັບການຄ້າ.
