ເຊກອງ ຕ້ອງການທຶນສູງເຖິງ 4,6 ພັນຕື້ກວ່າກີບ ເພື່ອພັດທະນາດ້ານຕ່າງໆໃນ 5 ປີຕໍ່ໜ້າ
ໃນອີກ 5 ປີຕໍ່ໜ້າ, ແຂວງເຊກອງໄດ້ຕັ້ງເປົ້າໝາຍຈະຮັກສາອັດຕາການຂະຫຍາຍຕົວຂອງເສດຖະກິດ ໃຫ້ຢູ່ໃນລະດັບ 5% ຕໍ່ປີ, ແຕ່ທັງນີ້ ເພື່ອບັນລຸໂຕເລກດັ່ງກ່າວ ທາງແຂວງມີຄວາມຕ້ອງການ ທຶນສູງເຖິງ 4,6 ພັນຕື້ກວ່າກີບ ເພື່ອນຳໃຊ້ເຂົ້າໃນການສ້າງຮາກຖານການຂະຫຍາຍຕົວໃຫ້ເຂັ້ມແຂງ ແລະ ຍືນຍົງ ເພື່ອຈະພັດທະນາດ້ານຕ່າງໆພາຍໃນແຂວງ.
ກອງປະຊຸມຄັ້ງປະຖົມມະລືກຂອງສະພາປະຊາຊົນແຂວງເຊກອງ (ສພຂ) ຊຸດທີ II ໃນວັນທີ 7 ເມສາຜ່ານມາ, ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ໄດ້ຂຶ້ນສະເໜີຮ່າງແຜນພັດທະນາເສດຖະກິດ-ສັງຄົມ 5 ປີຄັ້ງທີ IX (2021-2025) ໃຫ້ຮູ້ວ່າ: ໃນ 5 ປີຕໍ່ໜ້ານີ້, ແຂວງມີຄວາມຕ້ອງການທຶນ ເພື່ອມາ ພັດທະນາດ້ານຕ່າງໆກວມເອົາ 40% ຂອງລວມຍອດຜະລິດຕະພັນພາຍໃນ ຫລື ປະມານປີລະ 926 ຕື້ກີບ; ໂດຍແຫລ່ງທຶນດັ່ງກ່າວນີ້ຄາດວ່າຈະໄດ້ຈາກການລົງທຶນຂອງລັດ 250 ຕື້ກີບ, ການຊ່ວຍເຫລືອ ແລະ ກູ້ຢືມ 463 ຕື້ກີບ, ຈາກການລົງທຶນຂອງເອກະຊົນທັງພາຍໃນ ແລະ ຕ່າງປະເທດ 3.028 ຕື້ກີບ ແລະ ອີກ 889 ຕື້ກີບ ແມ່ນທຶນສິນເຊື່ອທະນາຄານ.
ສ່ວນດ້ານລາຍຮັບຄາດວ່າ ໃນ 5 ປີ ຈະເກັບລາຍຮັບໃຫ້ໄດ້ປະມານ 480,78 ຕື້ກີບ ຫລື ປະມານ 96,15 ຕື້ກີບຕໍ່ປີ ແລະ ຄຸ້ມຄອງລາຍຈ່າຍໃຫ້ຢູ່ທີ່ 1,5 ພັນຕື້ກວ່າກີບ; ຂະນະທີ່ການສົ່ງອອກສິນຄ້າ ໃຫ້ເພີ່ມຂຶ້ນສະເລ່ຍ 10% ຕໍ່ປີ, 5 ປີບັນລຸ 195,75 ລ້ານໂດລາ ແລະ ການນໍາເຂົ້າໃນແຜນການ ກໍໃຫ້ມີທັງໝົດ 150,11 ລ້ານໂດລາ. ສໍາລັບການລົງທຶນໃນ 5 ປີຄືນຫລັງນັ້ນ, ແຂວງເຊກອງແມ່ນສາ ມາດລະດົມ ແລະ ມີການລົງທຶນທັງໝົດ 4.744,99 ຕື້ກີບ ລື່ນແຜນການ 30% ໃນນີ້ເປັນການລົງທຶນ ຂອງລັດ 610,73 ຕື້ກີບ, ທຶນຊ່ວຍເຫລືອ ແລະ ກູ້ຢືມ 317,14 ຕື້ກີບ, ທຶນຂອງເອກະຊົນ 1.173,63 ຕື້ກີບ ແລະ ທຶນສິນເຊື່ອຂອງທະນາຄານ 2.643,5 ຕື້ກີບ.
ທ່ານເຈົ້າແຂວງເຊກອງ ໃຫ້ຮູ້ອີກວ່າ: ຜ່ານການລົງທຶນຄືດັ່ງກ່າວ ໄດ້ເຮັດໃຫ້ເສດຖະກິດຂອງ ແຂວງເຕີບໂຕໂດຍສະເລ່ຍ 7,7% ຕໍ່ປີ, ໃນນັ້ນຂະແໜງກະສິກໍາ ແລະ ປ່າໄມ້ ເພີ່ມຂຶ້ນ 6,77%; ຂະ ແໜງອຸດສາຫະກໍາ 8,38% ແລະ ການບໍລິການເພີ່ມຂຶ້ນ 8,24%; ສະເລ່ຍລາຍໄດ້ GDP ໃສ່ຫົວຄົນໄດ້ 1.728 ໂດລາ/ຄົນ/ປີ.
