ມີແຕ່ຜູ້ໄດ້ຮັບສັກວັກຊີນເທົ່ານັ້ນ ຈຶ່ງໄດ້ຂຶ້ນເຮືອໜີພູເຂົາໄຟປະທຸ

ເມື່ອວັນທີ 11 ເມສານີ້ ເວບໄຊ ເດລີເມລ ລາຍງານວ່າ ນາຍົກລັດຖະມົນຕີ ຣານຟ ກອນຊາເລຊ ແຫ່ງປະເທດ ເຊັນວິນເຊັນ ແລະ ເກຣນາດິນສ ປະເທດໝູ່ເກາະໃນພາກພື້ນທະເລ ແຄຣິບຽນ ຢືນຢັນວ່າ ປະຊາຊົນ ທີ່ໄດ້ຮັບການສັກວັກຊີນຕ້ານໂຄວິດ-19 ແລ້ວ ເທົ່ານັ້ນຈຶ່ງຈະໄດ້ຮັບອະນຸຍາດໃຫ້ຂຶ້ນເຮືອສຳລານເພື່ອໜີໄພຈາກພູໄຟ ຊູຟຣີເຢີ ປະທຸເມື່ອວັນສຸກທີ່ຜ່ານມາ ສ່ວນປະຊາຊົນທີ່ຍັງບໍ່ທັນໄດ້ຮັບສັກວັກຊີນຈະບໍ່ໄດ້ຮັບອະນຸຍາດອົບພະຍົບຂຶ້ນເຮືອສຳລານແຕ່ຢ່າງໃດ.

ຂະນະທີ່ນາຍົກລັດຖະມົນຕີ ເຊັນ ວິນເຊັນຍັງກ່າວອີກວ່າ ສຳລັບປະຊາຊົນທີ່ຕ້ອງການຈະສັກວັກຊີນໃນຂະນະນີ້ ເພື່ອໃຫ້ທັນເວລາຂຶ້ນເຮືອກໍຈະບໍ່ໄດ້ອະນຸຍາດໃຫ້ຂຶ້ນເຮືອສຳລານທີ່ຈະອົບພະຍົບອອກຈາກເກາະ ເພາະເກງວ່າອາດຈະເກີດອາການຂ້າງຄຽງຈາກວັກຊີນ ໂດຍນາຍົກລັດຖະມົນຕີກອນຊາເລຊ ກ່າວວ່າ ບຸກຄະລາກອນທາງການແພດຈະເປັນຄົນລະບຸວ່າ ໃຜທີ່ຈະໄດ້ຮັບອະນຸຍາດໃຫ້ຂຶ້ນເຮືອໄດ້.

ພູໄຟ ລາຊູຟຣີເຢີ ໄດ້ເກີດການປະທຸຂຶ້ນມາອີກຄັ້ງເມື່ອວັນທີ 9ເມສານີ້ ຊຶ່ງຖືວ່າເປັນການປະທຸຄັ້ງທຳອິດໃນຮອບ 40 ປີ ໂດຍໄດ້ພົ່ນເທົ່າຖ່ານດຳ ແລະ ກາສຊັນເຟີ ໄດອອກໄຊອອກມາກ່ອນທີ່ທີ່ພູໄຟລຸກຂຶ້ນຄັ້ງທີສອງໃນອີກ 6 ຊົ່ວໂມງຕໍ່ມາ.

ຂະນະນີ້ ທາງການ ເຊັນວິນເຊັນ ຢູ່ລະຫວ່າງດຳເນີນການອົບພະຍົບປະຊາຊົນທີ່ອາໄສຢູ່ໃນເຂດອັນຕະລາຍປະມານ 16.000 ຄົນອອກຈາກພື້ນທີ່ໂດຍຂະນະນີ້ບັນດາຊາດເພື່ອນບ້ານໃນທະເລ ແຄຣີບຽນ ໄດ້ຫຼັ່ງໄຫຼສົ່ງຄວາມຊ່ວຍເຫຼືອສຸກເສີນມາໃຫ້ ເຊັນວິນເຊັນເຊັ່ນ: ຕຽງ, ຜ້າຫົ່ມ ແລະ ໜ້າກາກຊ່ວຍຫາຍໃຈ.