ກຳປູເຈຍ ສັກວັກຊີນແບບບັງຄັບ ໃຫ້ກັບພະນັກງານລັດ ແລະ ກຳລັງປະກອບອາວຸດ.

ສຳນັກຂ່າວສານ Khmer Times ຂອງກຳປູເຈຍ ລາຍງານ ໃຫ້ຮູ້ວ່າ ເມື່ອວັນທີ 11 ເມສານີ້ ນາຍົກລັດຖະມົນຕີ ກຳປູເຈຍ ທ່ານ ຮຸນເຊັນ ໄດ້ອອກຄຳສັ່ງຮຽກຮ້ອງໃຫ້ພະນັກງານລັດ ແລະ ກຳລັງປະກອບອາວຸດ ສັກວັກຊີນປ້ອງກັນໂຄວິດ-19 ແບບບັງຄັບ ໃນທ່າມກາງທີ່ມີຄວາມສະຫຼັບຊັບຊ້ອນຢູ່ໃນຂະນະນີ້.

ຄຳສັ່ງດັ່ງກ່າວລວມມີ 8 ຂໍ້ ຊຶ່ງລວມມີທັງກ່າວເຕືອນວ່າ ຈະມີມາດຕະການລົງໂທດຜູ້ທີ່ຫຼີກລ່ຽງການສັກວັກຊີນປ້ອງກັນໂຄວິດ-19. ໂດຍລາຍລະອຽດ ຂໍ້ 3 ໃນຄຳສັ່ງລະບຸວ່າ ກຸ່ມເປົ້າໝາຍທີ່ຈະຕ້ອງສັກວັກຊີນປ້ອງກັນແບບບັງຄັບລວມມີພະນັກງານລັດ, ກຳລັງປະກອບອາວຸດ, ພະນັກງານໃນອົງການຕຸລາການ: ສານ, ໄອຍະການ ແລະ ພະນັກງານໃນຂະແໜງການຍຸຕິທຳ.

ນອກຈາກກຸ່ມເປົ້າໝາຍບັງຄັບດັ່ງກ່າວແລ້ວ, ຍັງລວມທັງບຸກຄົນໃນຂະແໜງການຕາມການກຳນົດຂອງ ສາທາລະນະສຸກ. ທ່ານ ຮຸນເຊັນ ປະກາດວ່າ ບຸກຄົນໃດຫາກຫຼົບຫຼີກການສັກວັກຊີນ ຈະຖືກກ່າວປະນາມທັງອົງການນັ້ນໆ.