ອັງກິດເຜີຍແຜນຫ້າມຂາຍລົດໃຊ້ນຳ້ມັນ ຕັ້ງແຕ່ປີ 2030
ທ່ານ ບໍຣິສ ຈອນສັນ ນາຍົກລັດຖະມົນຕີອັງກິດ ເຜີຍແຜນການດ້ານສິ່ງແວດລ້ອມ ໂດຍລະບຸວ່າ : ຕັ້ງແຕ່ປີ 2030 ເປັນຕົ້ນໄປ ຈະຫ້າມຂາຍລົດເກັງ ແລະ ລົດຕູ້ໃໝ່ທີ່ໃຊ້ນຳ້ມັນແອັດຊັງ ຫລື ນຳ້ມັນກາຊວນຢ່າງດຽວ, ແຕ່ຈະຍັງອະນຸຍາດໃຫ້ຂາຍລົດທີ່ໃຊ້ນຳ້ມັນ ແລະ ໄຟຟ້າຄູ່ກັນ ຫລື ລະບົບໄຮບຣິດ ບາງປະເພດຢູ່.
ໂດຍນີ້ຖືເປັນສ່ວນໜຶ່ງ “ການປະຕິວັດອຸດສາຫະກຳສີຂຽວ” ເພື່ອຮັບມືກັບການປ່ຽນແປງສະພາບພູມອາກາດໂລກ ແລະ ສ້າງວຽກໃນພາກທຸລະກິດຕ່າງໆ ເຊັ່ນ : ພະລັງງານນິວເຄຍ.
ທ່ານ ອະລັອກ ຊາມາ ລັດຖະມົນຕີວ່າການກະຊວງທຸລະກິດ, ພະລັງງານ ແລະ ຍຸດທະສາດດ້ານອຸດສາຫະກຳຂອງອັງກິດ ກ່າວວ່າ : ໂຄງການປະຕິວັດອຸດສາຫະກຳສີຂຽວ ຄັ້ງນີ້ຈະໃຊ້ເງິນລົງທຶນ 4 ພັນລ້ານປອນ. ທ່ານ ຊາມາ ເຊິ່ງເປັນປະທານກອງປະຊຸມພາຄີແຫ່ງສະຫະປະຊາຊາດວ່າດ້ວຍການປ່ຽນແປງສະພາບພູມອາກາດຄັ້ງທີ 26 ຫລື COP26 ເຊິ່ງອັງກິດຈະເປັນເຈົ້າພາບໃນປີໜ້າ ບອກວ່າ : ເງິນ 4 ພັນລ້ານປອນ ຈະຊ່ວຍສ້າງວຽກ ສີຂຽວ ແລະ ມີຄຸນຄ່າ 2,5 ແສນລ້ານຕຳແໜ່ງ ແລະ ລັດຖະບານຫວັງວ່າຕຳແໜ່ງວຽກໃໝ່ຈຳນວນຫລາຍຈະມີຂຶ້ນສຳລັບຜູ້ຄົນທາງພາກເໜືອຂອງອັງກິດ ແລະ ເວລ ແລະ 6 ໝື່ນຕຳແໜ່ງສຳລັບການຜະລິດໄຟຟ້າຈາກກະແສລົມໃນທະເລ. ສ່ວນໜຶ່ງຂອງແຜນຈະເປັນການສ້າງໂຮງໄຟຟ້ານິວເຄຍຂະໜາດໃຫຍ່ ເຊິ່ງມີໂອກາດຈະເປັນຢູ່ແຂວງຊັບຟອກ.
ໃນປີ 2023 ລັດຖະບານຈະໃຫ້ເຮືອນທີ່ສ້າງໃໝ່ເຊົາໃຊ້ລະບົບແກ໊ສໃຫ້ຄວາມອົບອຸ່ນ ໂດຍຕັ້ງເປົ້າຕິດຕັ້ງປຳ້ສ້າງຄວາມຮ້ອນ (heat pumps) 6 ແສນໂຕ ແທນ ໂດຍນີ້ເປັນອຸປະກອນໄຟຟ້າທີ່ໃຊ້ພະລັງງານຕໍ່າສຳລັບໃຫ້ຄວາມອົບອຸ່ນໃນເຮືອນ. ນອກຈາກນີ້, ຈະມີການປະສົມເຊື້ອໄຟຮີໂດຣແຊນເຂົ້າໄປໃນແກ໊ສທຳມະຊາດເພື່ອຫລຸດການປົດປ່ອຍແກ໊ສກາກໂບນິກໂດຍລວມ.
ສຳລັບການກຽມການເພື່ອຫ້າມຂາຍລົດທີ່ໃຊ້ນຳ້ມັນ ຈະມີການລົງທຶນ 1,3 ພັນລ້ານປອນ ຕິດຕັ້ງຈຸດສາກລົດໄຟຟ້າ ຈະໃຫ້ເງິນສະໜັບສະໜຸນຜູ້ທີ່ຈະປ່ຽນມາຊື້ລົດໄຟຟ້າເຖິງ 582 ລ້ານປອນ ນີ້ເທົ່າກັບວ່າ ອັງກິດຕາມຫລັງພຽງນ໊ອກແວປະເທດດຽວ ເຊິ່ງມີແຜນຍົກເລີກໃຫ້ຂາຍລົດທີ່ໃຊ້ນຳ້ມັນໃນປີ 2025.
ສຳລັບແຜນການປະຕິວັດອຸດສາຫະກຳສີຂຽວ 10 ຂໍ້ ຂອງ ບໍຣິສ ຈອນສັນ ໄດ້ແກ່ :
- ພະລັງງານໄຟຟ້າຈາກກະແສລົມໃນທະເລ ຜະລິດໃຫ້ໄດ້ 40 ກິກກະວັດ ໃນປີ 2030 ແລະ ຈະຈ້າງງານໄດ້ເຖິງ 6 ໝື່ນຕຳແໜ່ງ.
- ເຊື້ອໄຟຮີໂດຣແຊນ ມຸ່ງເປົ້າໃຫ້ມີກຳລັງການຜະລິດໃຫ້ໄດ້ 5 ກິກກະວັດ ໃນປີ 2030.
- ພະລັງງານນິວເຄຍ ພັດທະນາໃຫ້ເປັນແຫ່ລງພະລັງງານສະອາດ ແລະ ສ້າງວຽກ 1 ໝື່ນຕຳແໜ່ງ.
- ລົດພະລັງງານໄຟຟ້າ ທະຍອຍລະງັບການຈຳໜ່າຍລົດທີ່ໃຊ້ນຳ້ມັນແອັດຊັງ ແລະ ກາຊວນໃຫ້ໝົດສິ້ນໃນປີ 2030.
- ລະບົບການຂົນສົ່ງສາທາລະນະ, ລົດຖີບ ແລະ ການຍ່າງ ເພື່ອຫລຸດການປົດປ່ອຍກາກໂບນິກ.
- ພັດທະນາເຮືອບິນ ແລະ ເຮືອທີ່ຈະຫລຸດການປົດປ່ອຍອາຍກາກໂບນິກໃຫ້ເຫລືອ 0.
- ເຮືອນ ແລະ ອາຄານສາທາລະນະທີ່ເປັນມິດຕໍ່ສິ່ງແວດລ້ອມ.
- ເຕັກໂນໂລຊີທີ່ເກັບ ແລະ ກຳຈັດກາກໂບນິກ, ຫລຸດອາຍກາກໂບນິກຈາກຊັ້ນບັນຍາກາດໃຫ້ໄດ້ 10 ລ້ານໂຕນໃນປີ 2030.
- ການອະນຸລັກ ແລະ ຟື້ນຟູທຳມະຊາດ ຕັ້ງເປົ້າປູກຕົ້ນໄມ້ ປີລະ 187.500 ໄລ່.
- ເຕັກໂນໂລຊີໃໝ່ໆເພື່ອເຮັດໃຫ້ນະຄອນຫລວງລອນດອນເປັນສູນກາງທາງການເງິນເພື່ອສິ່ງແວດລ້ອມ.
