ປະເທດທີ່ອະນຸຍາດໃຫ້ເອກະຊົນນຳເຂົ້າ ແລະ ຈຳໜ່າຍວັກຊີນໂຄວິດ-19

ສຳນັກຂ່າວ ຊີເອັນເອັນ ເມື່ອວັນທີ 12 ເມສານີ້ໃຫ້ຮູ້ວ່າ ຂະນະນີ້ ປາກິດສະຖານ ເປັນໜຶ່ງໃນບັນດາປະເທດຈຳນວນໜ້ອຍໜຶ່ງ ທີ່ອະນຸຍາດໃຫ້ເອກະຊົນສາມາດ ນຳເຂົ້າວັກຊີນ ແລະ ຈຳໜ່າຍ ວັກຊີນໂຄວິດ-19 ໄດ້ ຊື່ງມີລາຄາ ສູງທົບ 4 ເທົ່າໃນຕະຫຼາດສາກົນ.

ຜູ້ນຳເຂົ້າວັກຊີນໂຄວິດ-19 ລາຍໃຫ່ຍຂອງ ປາກິດສະຖານ ແມ່ນບໍລິສັດການຢາ AGP Pharma, ນຳເຂົ້າ 50.000 ລ້ານໂດສ ວັກຊີນ Sputnik V 2 ເຂັມ ແລະ ມີຫຼາຍຫົວໜ່ວຍບໍລິສັດເອກະຊົນ ແລະ ພາກລັດ ກໍໄດ້ສັ່ງຈອງຊື້ສິນຄ້າໄວ້ແລ້ວ. ຈົນເຖິງຂະນະນີ້ ປາກິດສະຖານມີວັກຊີນ 2,56 ລ້ານໂດສ ຕົ້ນຕໍແມ່ນວັກຊີນຂອງຈີນ.

ທ່າທີດັ່ງກ່າວຂອງປາກິດສະຖານ ມີຂຶ້ນ ພາຍຫຼັງ ປະເທດນີ້ ມີຜູ້ຕິດເຊື້ອໃໝ່ເພີ່ມສູງຂຶ້ນ, ໂຮງໝໍເຕັມໄປດ້ວຍຄົນເຈັບ ແລະ ການສັກວັກຊີນ ຫຼ້າຊ້າ, ວັກຊີນກໍຂາດແຄນ.

ຈາກເຫດຜົນດັ່ງກ່າວ, ລັດຖະບານປາກິດສະຖານ ຈຶ່ງໄດ້ອະນຸມັດໃກ້ພາກເອກະຊົນນຳເຂົ້າ ແລະ ຈຳໜ່າຍວັກຊີນໂຄວິດ-19 ໄດ້.

ການຊື້-ຂາຍວັກຊີນ Sputnik V  ຂອງລັດເຊຍໃນອາທິດທຳອິດຂອງເດືອນເມສາ ໃນປາກິດສະຖານ ໄດ້ກາຍເປັນການແຂ່ງຂັນຍາດຊີງທີ່ດຸເດືອດ ປະຊາຊົນແຫ່ກັນໄປສັກວັກຊີນຢູ່ໃນສູນສັກວັກຊີນ ຢ່າງຫຼວງຫຼາຍ ຄັບຄາໜາແໜ້ນ, ຫຼາຍສູນສັກວັກຊີນໄດ້ໝົດກ້ຽງ.

ວັກຊີນ Sputnik V ຂະນະນີ້ ໃນປາກິດສະຖານມີລາຄາຢູ່ທີ່ 12.000 ຣຸບປີ/2ເຂັມ. ອົງການຄຸ້ມຄອງຢາຂອງ ປາກິດສະຖານ ໃຫ້ຮູ້ວ່າ ໃນລາຄາດັ່ງກ່າວສູງທົບ 4 ເທົ່າຂອງລາຄາໃນທ້ອງຕະຫຼາດສາກົນ ຊຶ່ງຕົ້ນທຶນບໍ່ເຖິງ 20 ໂດລາ.

ຂະນະນີ້, ປາກິດສະຖານ ອະນຸຍາດໃຫ້ນຳໃຊ້ຢ່າງຮີບດ່ວນ ວັກຊີນ 3 ຊະນິດເຊັ່ນ: ວັກຊີນຂອງຈີນ, Sputnik V ຂອງລັດເຊຍ ແລະ AstraZeneca. ໃນຂະນະດຽວກັນ ລັດຖະບານມີແຜນນຳເຂົ້າວັກຊີນ 3 ລ້ານໂດສ ວັກຊີນ CanSinoBio ຂອງຈີນ ໃນເດືອນເມສານີ້. ລັດເຊຍປະກາດວ່າຈະໃຫ້ ປາກິດສະຖານ 150.000 ໂດສວັກຊີ Sputnik ແຕ່ບໍ່ທັນເປັນທີ່ຈະແຈ້ງວ່າ ຈະໃຫ້ລ້າ ຫຼື ໃຫ້ປາກິດສະຖານຕ້ອງຊື້ເອົາ.