ປີໃໝ່ຂໍໃຫ້ລະປະປ່ອຍກິເລດຕັນຫາ ເຫັນການພັດທະນາມາກ່ອນ ຢ່າຫ່ອນໂລບມາກໂລພາ

ໂດຍ:ທິດກໍ່າ
ການທີ່ຈະແກ້ໄຂບັນຫາການສໍ້ລາດບັງຫລວງແມ່ນພາລະກິດໜຶ່ງຂອງລັດຖະບານຊຸດທີ IX ແລະ ກໍນອນຢູ່ໃນ 7 ບັນຫາເລັ່ງດ່ວນທີ່ລັດຖະບານຊຸດນີ້ຈະຕ້ອງແກ້ໄຂໃຫ້ສຳເລັດ ແລະ ເຖິງກົກເຖິງຮາກຢ່າງເປັນຮູບປະທຳ. ພາຍຫລັງສຳເລັດກອງປະຊຸມຄັ້ງປະຖົມມະລືກຂອງສະພາແຫ່ງຊາດຊຸດທີ IX ເຊິ່ງໄດ້ຈັດຂຶ້ນແຕ່ວັນທີ 22 ຫາວັນທີ 26 ເດືອນມີນາ 2021 ມາໃນວັນທີ 8 ຫາວັນທີ 9 ເມສາ 2021 ກອງປະຊຸມຄັ້ງປະຖົມມະລືກຂອງລັດຖະບານຊຸດທີ IX ກໍໄດ້ໄຂຂຶ້ນຢ່າງເປັນທາງການ ພາຍໃຕ້ການເປັນປະທານຂອງທ່ານ ນາຍົກລັດຖະມົນຕີ ພັນຄຳ ວິພາວັນ ໂດຍມີສະມາຊິກລັດຖະບານ ແລະ ຜູ້ກ່ຽວຂ້ອງເຂົ້າຮ່ວມຢ່າງພ້ອມພຽງ. ກ່ຽວກັບເນື້ອໃນກອງປະຊຸມຄັ້ງປະຖົມມະລືກນີ້ ແມ່ນໄດ້ຄົ້ນຄວ້າປຶກສາຫາລືເອກະສານສຳຄັນຂອງຊາດຫລາຍສະບັບ ເປັນຕົ້ນຂໍ້ຕົກລົງຂອງນາຍົກລັດຖະມົນຕີ ວ່າດ້ວຍການແບ່ງຄວາມຮັບຜິດຊອບຂອງນາຍົກ ແລະ ຮອງນາຍົກ, ພິຈາລະນາຮ່າງແຜນດຳເນີນງານຂອງລັດຖະບານຊຸດທີ IX ໄລຍະ 5 ປີ (2021-2025), ຮ່າງຂໍ້ຕົກລົງວ່າດ້ວຍລະບຽບ ແລະ ກົນໄກການເຮັດວຽກຂອງລັດຖະບານຊຸດທີ IX, ຮ່າງວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ວາລະແຫ່ງຊາດວ່າດ້ວຍການຄວບຄຸມສະກັດກັ້ນ ແລະ ຕ້ານຢາເສບຕິດແຕ່ປີ 2021-2025. ນອກຈາກນັ້ນ ຍັງໄດ້ຮັບຟັງການລາຍງານກ່ຽວກັບວຽກງານປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19. ຕໍ່ບັນຫານີ້ ທ່ານນາຍົກລັດຖະມົນຕີເຮົາຍັງໄດ້ກຳຊັບ ແລະ ເນັ້ນໃຫ້ມີການປຸກລະດົມ, ໂຄສະນາປູກຈິດສຳນຶກໃຫ້ທຸກຄົນມີສະຕິປ້ອງກັນຕົນເອງຈາກການຕິດເຊື້ອ ແລະ ແຜ່ເຊື້ອດ້ວຍການປະຕິບັດບັນດາມາດຕະການທີ່ລັດຖະບານ ກໍຄືຄະນະສະເພາະກິດວາງອອກແຕ່ລະໄລຍະໃຫ້ເຂັ້ມງວດ. ພ້ອມນັ້ນ ກໍໃຫ້ເລັ່ງເຜີຍແຜ່ການສັກຢາວັກຊີນໃຫ້ຊັດເຈນ ເພື່ອຕີຖອຍຄວາມລັ່ງເລຂອງກຸ່ມເປົ້າໝາຍທີ່ຈະສັກຢາວັກຊີນ. ພິເສດ ກອງປະຊຸມຄັ້ງປະຖົມມະລືກເທື່ອນີ້ຍັງໄດ້ຮັບຟັງການໂອ້ລົມໃຫ້ທິດຊີ້ນຳຈາກທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານພັກປະຊາຊົນປະຕິວັດລາວ, ປະທານປະເທດ ໂດຍເນັ້ນໃຫ້ເລັ່ງປັບປຸງກົງຈັກລັດຖະບານຂັ້ນທ້ອງຖິ່ນຮາກຖານໃຫ້ສອດຄ່ອງກັນໂດຍໄວ, ບົນຈິດໃຈກະທັດຮັດ, ມີປະສິດທິພາບ ແລະ ສາມາດກວດກາໄດ້, ພ້ອມທັງໃຫ້ລຶບລ້າງການບໍລິຫານລັດທີ່ເປັນຂອດລະຫວ່າງກາງໃຫ້ຂາດຕົວ. ອັນສຳຄັນທີ່ສຸດ ລັດຖະບານຊຸດນີ້ຕ້ອງເດັດດ່ຽວກ້າຄິດ ກ້າເຮັດ ກ້າຕັດສິນໃຈ ແລະ ກ້າຮັບຜິດຊອບ.
ແນວໃດກໍຕາມ, ສຳລັບການປາບປາມບັນຫາການສໍ້ລາດບັງຫລວງໂດຍກົງນັ້ນ ມັນກໍນອນຢູ່ໃນວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ເພາະນີ້ມັນຍັງມີຫລາຍວຽກທີ່ຕ້ອງເຮັດ ເປັນຕົ້ນບັນຫາການຄຸ້ມຄອງລາຍຮັບ-ລາຍຈ່າຍ, ບັນຫາພາສີອາກອນ, ບັນຫາສົ່ງເສີມການຜະລິດສິນຄ້າ, ບັນຫາການສົ່ງອອກ-ນຳເຂົ້າ, ບັນຫາເງິນຕາ ແລະ ບັນຫາອື່ນໆທີ່ກ່ຽວພັນເຖິງເງິນໂດຍສະເພາະ.
ເຖິງຢ່າງໃດກໍດີ, ເມື່ອກ້າວເຂົ້າສູ່ວາລະດີຖີປີໃໝ່ລາວ ພສ 2564 ໄປແລ້ວ ເພື່ອເປັນການສະໜັບສະໜູນ ແລະ ເຮັດໃຫ້ນະໂຍບາຍດ້ານຕ່າງໆຂອງລັດຖະບານຊຸດທີ IX ໄດ້ຮັບຜົນສຳເລັດຢ່າງດປັນຮູບປະທຳ ແລະ ເປັນໄປຕາມຄາດໝາຍ ໝຶ່ງໃນພາລະກິດຂອງພວກເຮົາຄືພາກັນຕ້ານ ແລະ ພ້ອມກັນປະລະກິເຫລດຕັນຫາຄວາມໂລບມາກໂລພາ, ການສໍ້ລາດບັງຫລວງ ໂດຍສະເພາະແມ່ນໃນກຸ່ມຖັນແຖວພະນັກງານລັດບໍລິຫານທີ່ຈະຕ້ອງໄດ້ຖືກແກ້ໄຂໃຫ້ໝົດໄປຈາກສັງຄົມລາວ ເພາະວ່າໃນຫລາຍສິບປີຜ່ນມາ ຊັບສິນເງິນຄຳເສຍຫາຍຍ້ອນການສໍ້ລາດບັງຫລວງແມ່ມະຫາສານທີ່ສຸດ. ສະເພາະຕົວເລກໃນ 5 ປີຜ່ານມາ ແມ່ນມີສູງເຖິງ 5 ພັນກວ່າຕື້ກີບ ແລະ ສາມາກວດກາພົບເຫັນບຸກຄົນກະທຳຜິດເຖິງ 7 ຮ້ອຍກວ່າຄົນ ໃນນີ້ມີພະນັກງານໃນຂົງເຂດລັດບໍລິຫານເຖິງ 6 ຮ້ອຍກວ່າຄົນ.
ເພາະສະນັ້ນ, ໃນໂອກາດປີໃໝ່ ພສ 2564 ເປັນຕົ້ນໄປ ກໍຖືເປັນໂອກາດທີ່ພວກເຮົາຈະຫັນແນວຄິດຈາກອັນເກົ່າທີ່ໄດ້ກະທະເປັນບາບກຳອັນເສົ້າໝອງຕໍ່ຕົນເອງ ປະເທດຊາດບ້ານເມືອງໄປສູ່ການຫັນປ່ຽນພຶດຕິກຳອັນໃໝ່ໆທີ່ປອດໃສຂາວສະອາດເຂົ້າມາໃນຊີວິດ ຈຶ່ງຂໍຮຽກຮ້ອງໃຫ້ພາກັນປະລະກິເຫລດຕັນຫາ ໂລບມາກໂລພາ ເພື່ອຈະບໍ່ມີບາບກຳຕາມມາສະໜອງໃນຊາດນີ້ ແລະ ຊາດໜ້າ ນັ້ນແລ ສາທຸ ສາທຸ ສາທຸ !.