ກຳປູເຈຍປ່ຽນສະຖານທີ່ຈັດງານແຕ່ງດອງ ເປັນໂຮງໝໍສະໜາມ
ກຳປູເຈຍເລີ່ມປ່ຽນສະຖານທີ່ຈັດງານແຕ່ງດອງໃຫ້ເປັນໂຮງໝໍສະໜາມຮອງຮັບຜູ້ຕິດເຊື້ອໄດ້ຫລາຍພັນຄົນຈາກພະຍາດໂຄວິດ-19.
ສຳນັກຂ່າວຣອຍເຕີລາຍງານວ່າ: ກະຊວງສາທາລະນະສຸກຂອງກຳປູເຈຍລາຍງານວ່າ: ພົບຜູ້ຕິດເຊື້ອໄວຣັສໂຄວິດ-19 ໃໝ່ຈຳນວນ 618 ຄົນ ໃນວັນທີ 18 ເມສາ ຫລັງພົບການແຜ່ລະບາດຄັ້ງທຳອິດໃນເດືອນກຸມພາຜ່ານມາ ສົ່ງຜົນໃຫ້ຕົວເລກຜູ້ຕິດເຊື້ອສະສົມໃນປະເທດເພີ່ມຂຶ້ນເປັນ 6.389 ຄົນໃນກຳປູເຈຍ ເຊິ່ງຖືວ່າຍັງເປັນໜຶ່ງໃນປະເທດທີ່ພົບການຕິດເຊື້ອໜ້ອຍທີ່ສຸດໃນໂລກ ເຖິງວ່າຈະມີຜູ້ເສຍຊີວິດແລ້ວ 43 ຄົນ ແຕ່ທັງໝົດຢູ່ໃນໄລຍະ 2 ເດືອນຜ່ານມາ.
ເຈົ້າໜ້າທີ່ກະຊວງສາທາລະນະສຸກ ເປີດເຜີຍວ່າ: ກະຊວງສາທາລະນະສຸກຕັດສິນໃຈໃຊ້ສູນປະຊຸມ, ພຣີເມຍ ເຊັນເຕີ ແສນ ສຸກ ຈັດເປັນສູນປິ່ນປົວຜູ້ຕິດເຊື້ອໂຄວິດ-19 ສາມາດຮອງຮັບຜູ້ຕິດເຊື້ອໄດ້ 1.500 ກວ່າຄົນ.
ຂ່າວທີ່ປາກົດໃນສັງຄົມອອນລາຍສະແດງໃຫ້ເຫັນວ່າ: ລັດຖະມົນຕີສາທາລະນະສຸກກຳປູເຈຍລົງພື້ນທີ່ກວດກາຫໍປະຊຸມຈັດງານແຕ່ງ ວິມານ ພິພົບ ທະເມ ແສນ ສຸກ ເພື່ອຈັດຕັ້ງເປັນໂຮງໝໍສະໜາມຮອງຮັບຜູ້ຕິດເຊື້ອໂຄວິດ-19 ແຕ່ກ່ອນໜ້ານີ້ ລັດຖະບານໄດ້ໃຊ້ຫໍປະຊຸມຈັດງານແຕ່ງ ເກາະພິດ ຄອນເວນຊັນ ແອນ ເອັກຊິບິຊັນ ເຊັນເຕີ ເປັນໂຮງໝໍສະໜາມແລ້ວ ຮອງຮັບຜູ້ຕິດເຊື້ອໄດ້ 1.800 ຄົນ.
ສ່ວນຢູ່ນະຄອນຫລວງພະນົມເປັນ ແລະ ເຂດໃກ້ຄຽງ ຢູ່ພາຍໃຕ້ຄຳສັ່ງລັອກດາວມາແຕ່ວັນທີ 15 ເມສາ ໂດຍຫ້າມປະຊາຊົນອອກນອກເຮືອນເປັນເວລາ 2 ອາທິດ ຍົກເວັ້ນແຕ່ຈະມາເຮັດວຽກ, ຊື້ອາຫານ ແລະ ຢາ. ທັງນີ້ ເພື່ອຄວບຄຸມການແຜ່ລະບາດ.
