ພໍ່ຄ້າລະເມີດຄໍາສັ່ງ! ລັກລອບນຳເຂົ້າອາຫານທະເລ ສ່ຽງນຳເອົາໂຄວິດ-19 ເຂົ້າປະເທດ

ປ້ອງກັນຄວາມສະຫງົບນະຄອນຫຼວງວຽງຈັນ ໄດ້ລາຍງານວ່າ: ມີການລັກລອບຂົນສົ່ງອາຫານທະເລ ຈາກປະເທດເພື່ອນບ້ານ (ປະເທດໄທ) ມາຜ່ານເຂດທ່າບ້ານສໍາພັນນາ ເມືອງສັງທອງ ນະຄອນຫລວງວຽງຈັນ ແລ້ວເຈົ້າໜ້າທີ່ໄດ້ຮິບຮ້ອນລົງກວດກາສະຖານທີ່ດັ່ງກ່າວ ແລະ ໄດ້ພົບເຫັນ ທ້າວ ທັດສະດາພອນ ອາຍຸ 43 ປີ ອາຊີບຄ້າຂາຍ ຢູ່ບ້ານ ດອນນົກຂຸ້ມ  ເມືອງສີສັດຕະນາກ ນະຄອນຫລວງວຽງຈັນ ແລະ ທ້າວ ບຸນລ້ຽງ  ອາຍຸ 37 ປີ ອາຊີບຄ້າຂາຍ ຢູ່ບ້ານ ທ່ານາສາ ເມືອງສັງທອງ  ກຳລັງຂົນສິນຄ້າ (ອາຫານທະເລ) ຈໍານວນ 2.000 ກວ່າກິໂລ ຂຶ້ນຈາກທ່າໄປຂາຍຕໍ່.

ເຈົ້າໜ້າທີ່ຕໍາຫຼວດ ຈຶ່ງໄດ້ກັກຕົວພວກກ່ຽວມາສອບສ່ວນ ແລະ ໄດ້ເຮັດບົດບັນທຶກສຶກສາອົບຮົມກ່າວເຕືອນ ແລະ ປັບໃໝຕາມລະບຽບກົດໝາຍ.  ເພື່ອຮັບປະກັນບໍ່ໃຫ້ສິນຄ້າດັ່ງກ່າວຖືກຈໍາໜ່າຍເຊິ່ງຈະມີຄວາມສ່ຽງຕໍ່ການຕິດພະຍາດໂຄວິດ-19 ແລະ ພະຍາດອື່ນໆ , ເຈົ້າໜ້າທີ່ຈຶ່ງໄດ້ຢຶດລົດ ແລະ ຈະໄດ້ນໍາສິນຄ້າດັ່ງກ່າວໄປທໍາລາຍຖິ້ມຢູ່ສູນບໍາບັດຂີ້ເຫຍື້ອຫຼັກ 32 ເມືອງໄຊທານີ ນະຄອນຫຼວງວຽງຈັນ