10 ອາຫານຈາກທຳມະຊາດ ຊ່ວຍປິ່ນປົວບາດແຜໃຫ້ເຊົາໄວ
April 19, 2021 - 3:31 PM
- ນຳ້ດື່ມບໍລິສຸດ : ທຸກຄົນຮູ້ກັນດີວ່ານຳ້ແມ່ນອົງປະກອບສຳຄັນຂອງຮ່າງກາຍ ຫາກຮ່າງກາຍຂາດນຳ້ຍ່ອມສົ່ງຜົນໃຫ້ການໄຫລວຽນຂອງເລືອດບໍ່ຄ່ອງແຄ້ວ ເຊິ່ງຈະມີຜົນເຮັດໃຫ້ບາດແຜນານເຊົາ ເນື່ອງຈາກຮ່າງກາຍບໍ່ສາມາດນຳເອົາສານອາຫານຕ່າງໆໄປລ້ຽງບໍລິເວນບາດແຜໄດ້ຢ່າງເຕັມທີ່. ດັ່ງນັ້ນ, ເມື່ອຢາກປິ່ນປົວບາດແຜໃຫ້ເຊົາໄວຂຶ້ນ ຄວນດື່ມນຳ້ບໍລິສຸດໃຫ້ຫລາຍໆ ຮັບຮອງບາດແຜຈະເຊົາໄວຂຶ້ນ ແລະ ຜິວບໍລິເວນບາດແຜຍັງຊຸ່ມຊື່ນຂຶ້ນນຳ.
- ນຳ້ເຜິ້ງ : ນຳ້ເຜິ້ງມີສ່ວນຊ່ວຍໃນການຕໍ່ຕ້ານແບັກທີເຣຍ ແລະ ຊ່ວຍກຳຈັດເຊື້ອພະຍາດ ເຊິ່ງການກຳຈັດເຊື້ອພະຍາດນັ້ນຈະບໍ່ໄປທຳລາຍເນື້ອເຍື່ອແຕ່ຢ່າງໃດ, ແຕ່ຈະຊ່ວຍສະໝານບາດແຜໃຫ້ເຊົາໄວຂຶ້ນ ແລະ ບໍ່ເກີດອາການອັກເສບ.
- ຂີ້ໝິ້ນ : ການໃຊ້ຢາທີ່ມີສ່ວນປະສົມຂອງຂີ້ໝິ້ນ ຊ່ວຍກະຕຸ້ນການສ້າງແຊນຜິວໃໝ່ຂຶ້ນມາ ຈຶ່ງຖືເປັນການສະໝານບາດແຜທີ່ມັກໄດ້ຮັບຄວາມນິຍົມ ໂດຍສະເພາະການເອົາຂີ້ໝິ້ນຝຸ່ນປະສົມກັບນຳ້ແລ້ວທາບາດແຜ ຈະເຫັນໄດ້ວ່າວິທີນີ້ຊ່ວຍເລັ່ງໃຫ້ບາດແຜທີ່ບໍ່ມີການຕິດເຊື້ອເຊົາໄວຍິ່ງຂຶ້ນ.
- ເຂົ້າ ຫລື ແປ້ງເຂົ້າ : ການກິນເຂົ້າ ຫລື ແປ້ງມັນ ລວມເຖິງເຜືອກ, ມັນຕົ້ນ ແລະ ເຂົ້າໜົມປັງໂຮຫວີດມີສ່ວນຊ່ວຍໃຫ້ຮ່າງກາຍມີພະລັງງານທີ່ພຽງພໍ ຈຶ່ງເຮັດໃຫ້ຮ່າງກາຍບໍ່ຈຳເປັນຕ້ອງດຶງໂປຣຕິນມາໃຊ້ ສົ່ງຜົນໃຫ້ໂປຣຕິນສາມາດເຮັດໜ້າທີ່ໃນການຟື້ນຟູເນື້ອເຍື່ອບໍລິເວນບາດແຜໄດ້ຢ່າງເຕັມທີ່ ແລະ ຊ່ວຍໃຫ້ບາດແຜເຊົາໄວ.
- ອາຫານປະເພດໂປຣຕິນ : ອາຫານປະເພດໂປຣຕິນບໍ່ວ່າຈະເປັນຊີ້ນປາ, ໄກ່, ໄຂ່, ຖົ່ວ, ນົມ ແລະ ໂຢເກິດ ລ້ວນແຕ່ເປັນອາຫານທີ່ຊ່ວຍໃນການເສີມສ້າງ ແລະ ຊ່ວຍຟື້ນຟູເນື້ອເຍື່ອ ເຮັດໃຫ້ແຊນຕ່າງໆພາຍໃນຮ່າງກາຍເກີດການເຊື່ອມຈອດກັນໄດ້ງ່າຍ ສົ່ງຜົນໃຫ້ການສະໝານບາດແຜໄດ້ຜົນຢ່າງຈະແຈ້ງ.
- ອາຫານປະເພດວິຕາມິນ A : ສຳລັບອາຫານທີ່ໃຫ້ວິຕາມິນ A ແກ່ຮ່າງກາຍ ມີທັງ ປາ, ຜັກໃບຂຽວ, ຫົວກະຫລົດ, ໝາກຫຸ່ງ, ໝາກມ່ວງ, ໝາກແຕງແຄນຕາລູບ, ໝາກໂມ ແລະ ມັນດ້າງ ເຊິ່ງອາຫານເຫລົ່ານີ້ມີສ່ວນຊ່ວຍເຮັດໃຫ້ບາດແຜເຊົາໄວຂຶ້ນ ເນື່ອງຈາກວິຕາມິນ A ແມ່ນສານອາຫານທີ່ຊ່ວຍໃນການສ້າງເນື້ອເຍື່ອ ແລະ ມີຄວາມສຳຄັນຕໍ່ການສ້າງແຊນເນື້ອເຍື່ອໃໝ່.
- ອາຫານປະເພດວິຕາມິນ C : ໝາກກ້ຽງ, ໝາກນາວ, ໝາກມ່ວງ, ໝາກນັດ, ໝາກສີດາ, ໝາກກີວີ, ໝາກຂາມປ້ອມ ແລະ ໝາກໄມ້ຕະກູນເບີຣີທຸກຊະນິດ ຖືເປັນໝາກໄມ້ທີ່ມີສ່ວນຊ່ວຍໃນການສະໝານບາດແຜໄດ້ເປັນຢ່າງດີ ເນື່ອງຈາກເປັນໝາກໄມ້ທີ່ອຸດົມໄປດ້ວຍວິຕາມິນ C ຫລາຍ ເຊິ່ງເປັນສານທີ່ຊ່ວຍກະຕຸ້ນການສ້າງຄໍລາເຈັນຂອງຜິວໜັງ ເຮັດໃຫ້ເນື້ອເຍື່ອ, ກ້າມຊີ້ນ ແລະ ກະດູກມີຄວາມແຂງແຮງ ທັງຍັງຊ່ວຍຫລຸດການຕິດເຊື້ອໄດ້ເປັນຢ່າງດີ.
- ອາຫານປະເພດທາດເຫລັກ : ເຊັ່ນ ຜັກບົ້ງ, ຜັກກະລໍ່າດອກ ລວມທັງຜັກໃບຂຽວອື່ນໆ ມີສ່ວນສຳຄັນໃນການສ້າງເມັດເລືອດແດງ ເຊິ່ງມີໜ້າທີ່ສົ່ງອົກຊີແຊນໄປລ້ຽງຜິວໜັງບໍລິເວນທີ່ເປັນບາດແຜ ເຊິ່ງເມື່ອຮ່າງກາຍໄດ້ຮັບສານອາຫານຊະນິດຕ່າງໆ ລວມທັງອົກຊີແຊນ ກໍຈະສົ່ງຜົນເຮັດໃຫ້ບາດແຜສະໝານຈອດກັນໄດ້ງ່າຍຂຶ້ນ.
- ອາຫານປະເພດສັງກະສີ : ຊີ້ນໄກ່, ຊີ້ນງົວ, ຊີ້ນແບ້, ຊີ້ນໝູ, ອາຫານທະເລ, ຖົ່ວເປືອກແຂງ, ແກ່ນໝາກຖົ່ວ, ທັນຍາພືດ ແລະ ຜະລິດຕະພັນທີ່ເຮັດຈາກນົມ ລ້ວນແຕ່ເປັນອາຫານທີ່ມີທາດສັງກະສີ ມີສ່ວນຊ່ວຍໃນການສະໝານບາດແຜໃຫ້ເຊົາໄວ ເນື່ອງຈາກສານອາຫານຊະນິດນີ້ຊ່ວຍກະຕຸ້ນການເຮັດວຽກຂອງເອັນໄຊທີ່ມີໜ້າທີ່ໃນການຜະລິດແຊນຜິວໃໝ່.
- ອາຫານປະເພດກົດໄຂມັນບໍ່ອີ່ມໂຕ : ກົດໄຂມັນບໍ່ອີ່ມໂຕພົບໄດ້ໃນນຳ້ມັນເຂົ້າ, ນຳ້ມັນຖົ່ວເຫລືອງ, ນຳ້ມັນງາ, ນຳ້ມັນໝາກກອກ, ນຳ້ມັນຖົ່ວດິນ ແລະ ອາຫານຈຳພວກຖົ່ວເປືອກແຂງ ຖືເປັນອາຫານທີ່ຊ່ວຍປ້ອງກັນຮ່າງກາຍບໍ່ໃຫ້ໂປຣຕິນສະຫລາຍຈາກກ້າມຊີ້ນມາໃຊ້ເປັນພະລັງງານ ຈຶ່ງເຮັດໃຫ້ຮ່າງກາຍມີໂປຣຕິນມາຊ່ວຍໃນການສະໝານບາດແຜໄດ້ຢ່າງເຕັມທີ່.
