ຫວຽດນາມກຽມທົດລອງໃຊ້ “ວັກຊີນພາສປອດ” ຫວັງຟື້ນຟູຂະແໜງທ່ອງທ່ຽວ
ຫວຽດນາມວາງແຜນເປີດຮັບນັກທ່ອງທ່ຽວຖືວັກຊີນພາສປອດເຂົ້າພັກໃນລີສອດໂດຍບໍ່ຕ້ອງກັກຕົວ, ໄລຍະທຳອິດເລີ່ມທົດລອງນັກທ່ອງທ່ຽວຈາກ ສ.ເກົາຫລີ.
ວັນທີ 19 ເມສາ 2021, ແຂວງກວາງນາມ ເມືອງແຄມຝັ່ງໃນພາກກາງຂອງຫວຽດນາມ ວາງແຜນເປີດຮັບນັກທ່ອງທ່ຽວທີ່ມີຫລັກຖານສະແດງການສັກວັກຊີນປ້ອງກັນໂຄວິດ-19 ຫລື ວັກຊີນພາສປອດ ພ້ອມເອກະສານຮັບຮອງຜົນການກວດໂຄວິດເປັນລົບ ເຂົ້າພັກໃນລີສອດຢູ່ເມືອງ Duy Xuyen ແລະ ເມືອງ Nui Thanh ເປັນເວລາ 5-10 ວັນ ໂດຍບໍ່ຕ້ອງກັກຕົວ.
ສື່ລາຍງານວ່າ: ຜູ້ບໍລິຫານແຂວງກາງນາມໄດ້ຍື່ນຮ່າງແຜນການເປີດຮັບນັກທ່ອງທ່ຽວຈາກຕ່າງປະເທດຕໍ່ກະຊວງວັດທະນະທຳ, ກິລາ ແລະ ການທ່ອງທ່ຽວແລ້ວ ເຊິ່ງຖ້າໄດ້ຮັບການອະນຸມັດ ຈະເຮັດໃຫ້ແຂວງກວາງນາມກາຍເປັນພື້ນທີ່ທຳອິດໃນຫວຽດນາມທີ່ເປີດຮັບນັກທ່ອງທ່ຽວທີ່ມີວັກຊີນພາສປອດ.
ພາຍໃຕ້ແຜນດັ່ງກ່າວ ນັກທ່ອງທ່ຽວຈະຕ້ອງເດີນທາງມາຫວຽດນາມໂດຍໃຊ້ບໍລິການບໍລິສັດທ່ອງທ່ຽວລະຫວ່າງປະເທດ, ເດີນທາງດ້ວຍເຮືອບິນເໝົາລຳມາລົງສະໜາມບິນຊູລາຍ ແລ້ວຕໍ່ໄປລີສອດໃນເມືອງ Duy Xuyen ແລະ ເມືອງ Nui Than ໂດຍບໍ່ມີການແວ່ພັກລະຫວ່າງທາງ ແລະ ຕ້ອງປະຕິບັດຕາມມາດຕະການປ້ອງກັນພະຍາດລະບາດຢ່າງເຄັ່ງຂັດຕາມທີ່ລັດຖະບານກຳນົດໄວ້.
ແຜນເປີດຮັບນັກທ່ອງທ່ຽວຈາກຕ່າງປະເທດນີ້ເປັນໄປຕາມທີ່ທ່ານ ຫງວຽນ ວັນ ຫຸ່ງ ລັດຖະມົນຕີວ່າການກະຊວງວັດທະນະທຳ, ກິລາ ແລະ ການທ່ອງທ່ຽວຂອງຫວຽດນາມ ອອກມາເປີດເຜີຍເມື່ອວັນທີ 15 ເມສາຜ່ານມາວ່າ: ຫວຽດນາມກຳລັງວາງແຜນຈະເປີດຮັບນັກທ່ອງທ່ຽວຈາກຕ່າງປະເທດອີກ ໂດຍຄາດວ່າຈະເລີ່ມດຳເນີນໃນໄລຍະທຳອິດຊ່ວງເດືອນກໍລະກົດ-ກັນຍາ ແລະ ຈະເນັ້ນໃສ່ການທ່ອງທ່ຽວຫາດຊາຍ ແລະ ການຫລິ້ນກ໊ອຟໃນກຸ່ມນັກທ່ອງທ່ຽວຈາກ ສ.ເກົາຫລີ ກ່ອນ.
ທັງນີ້, ອຸດສາຫະກຳການທ່ອງທ່ຽວຂອງຫວຽດນາມ ເຊິ່ງເປັນໜຶ່ງໃນພະລັງຫລັກທີ່ຂັບເຄື່ອນເສດຖະກິດຂອງປະເທດໄດ້ຫລຸດລົງຢ່າງໜັກ ຫລັງເກີດວິກິດໂຄວິດ-19 ລະບາດທົ່ວໂລກ ເຮັດໃຫ້ປະເທດຕ່າງໆຕ້ອງປິດຊາຍແດນ, ຢຸດການເດີນທາງລະຫວ່າງປະເທດ ສົ່ງຜົນໃຫ້ຈຳນວນນັກທ່ອງທ່ຽວຈາກຕ່າງປະເທດທີ່ເດີນທາງມາທ່ຽວຫວຽດນາມຫລຸດລົງເຫລືອພຽງ 3,7 ລ້ານຄົນ ໃນປີ 2020 ຈາກເຄີຍສ້າງສະຖິຕິສູງສຸດເຖິງ 18 ລ້ານຄົນ ໃນປີ 2019.
ອ້າງອີງ:
https://e.vnexpress.net/…/quang-nam-seeks-approval…
