ກໍາປູເຈຍມີຜູ້ຕິດເຊື້ອໂຄວິດເພີ່ມ 624 ຄົນ ປະກາດເຂັ້ມງວດ-ລັອກດາວບາງພື້ນທີ່
April 20, 2021 - 12:54 PM
ຈຳນວນຜູ້ຕິດເຊື້ອໂຄວິດ-19 ຢູ່ກຳປູເຈຍເພີ່ມອີກ 624 ຄົນ ເຊິ່ງເປັນຈຳນວນການພົບຜູ້ຕິດເຊື້ອສູງທີ່ສຸດໃນກຳປູເຈຍ ນັບແຕ່ມີການລະບາດຂອງໂຄວິດ-19 ໃນປະເທດ, ສ່ວນຈຳນວນຜູ້ເສຍຊີວິດມີລາຍງານເພີ່ມອີກ 4 ຄົນ ລວມເສຍຊີວິດສະສົມ 47 ຄົນ.
ເຮັດໃຫ້ລັດຖະບານກຳປູເຈຍຈຳເປັນຕ້ອງຍົກລະດັບມາດຕະການໃນການຄວບຄຸມການລະບາດທີ່ເຂັ້ມງວດຂຶ້ນ ໂດຍທ່ານ ຮຸນ ເຊນ ນາຍົກລັດຖະມົນຕີຂອງກຳປູເຈຍ ໄດ້ປະກາດຄຳສັ່ງໃຫ້ມີການລັອກດາວພື້ນທີ່ໃນນະຄອນຫລວງພະນົມເປັນ ແລະ ເມືອງຕາເຂມາ ເປັນເວລາ 14 ວັນ ໂດຍເລີ່ມແຕ່ວັນທີ 15 ເມສາຜ່ານມາ ພ້ອມທັງກຳນົດບົດລົງໂທດຜູ້ຝ່າຝືນມາດຕະການຄວບຄຸມການລະບາດຂອງໂຄວິດ-19 ໂດຍຖ້າຝ່າຝືນມາດຕະການດັ່ງກ່າວຈະມີໂທດຕິດຄຸກນັບແຕ່ 6 ເດືອນ ຫາ 3 ປີ ປັບໄໝ 2-10 ລ້ານຣຽວ ນຳອີກ.
