ຍີ່ປຸ່ນຍົກລະດັບຂໍ້ບັງຄັບເຂົ້າເມືອງ ຜູ້ໂດຍສານທຸກຄົນ ຕ້ອງຍື່ນຜົນກວດໂຄວິດ-19 ກ່ອນເຂົ້າປະເທດ
ວັນທີ 19 ເມສາ 2021, ຍີ່ປຸ່ນປະກາດຍົກລະດັບຂໍ້ບັງຄັບການເຂົ້າເມືອງ ໂດຍກຳນົດໃຫ້ຜູ້ໂດຍສານທຸກຄົນຍື່ນໃບຮັບຮອງຜົນກວດພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ເມື່ອເດີນທາງເຖິງສະໜາມບິນຂອງຍີ່ປຸ່ນ, ສ່ວນນັກເດີນທາງທີ່ບໍ່ປະຕິບັດຕາມເງື່ອນໄຂທີ່ກຳນົດຈະຖືກປະຕິເສດເຂົ້າປະເທດ.
ທັງນີ້ ຍີ່ປຸ່ນຮ້ອງຂໍສາຍການບິນປະຕິເສດຜູ້ໂດຍສານທີ່ບໍ່ມີໃບຮັບຮອງຜົນກວດພະຍາດໂຄວິດ-19 ເປັນລົບພາຍໃນ 72 ຊົ່ວໂມງ ກ່ອນອອກເດີນທາງ ນັບແຕ່ເດືອນມີນາຜ່ານມາ, ແຕ່ຈົນເຖິງວັນທີ 18 ເມສາ ໜ່ວຍງານກັກກັນຕົວຂອງປະເທດຍັງອະນຸຍາດໃຫ້ຜູ້ໂດຍສານທີ່ບໍ່ມີໃບຮັບຮອງຄົບຖ້ວນເຂົ້າໄປໃນສະຖານທີ່ກັກກັນຕົວທີ່ກຳນົດ ແລະ ມີການທົດລອງໃໝ່ອີກຫລັງຈາກ 3 ວັນ.
ເຖິງຢ່າງໃດກໍດີ, ທາງການລະບຸວ່າ: ມາດຕະການທາງເລືອກດັ່ງກ່າວຈະບໍ່ຖືກນຳມາໃຊ້ອີກຕໍ່ໄປ ຫລັງຍີ່ປຸ່ນພົບຜູ້ຕິດເຊື້ອເພີ່ມຂຶ້ນຢ່າງຕໍ່ເນື່ອງ.
ນັກເດີນທາງຈະຕ້ອງມີໃບຮັບຮອງຜົນກວດພະຍາດໂຄວິດ-19 ເປັນລົບທີ່ທົດສອບຈາກຕົວຢ່າງໃນຮູດັງ ຫລື ນ້ຳລາຍ ແລະ ການທົດສອບຕ້ອງດຳເນີນພາຍໃນ 72 ຊົ່ວໂມງກ່ອນອອກເດີນທາງ ໂດຍທາງການບໍ່ອະນຸມັດໃບຮັບຮອງຜົນກວດແອນຕິເຈນ ຫລື ແອນຕິບໍດີສຳລັບການເຂົ້າປະເທດ.
ປັດຈຸບັນ ຍີ່ປຸ່ນອະນຸຍາດສະເພາະຊາວຍີ່ປຸ່ນ, ຊາວຕ່າງປະເທດທີ່ອາໄສຢູ່ຍີ່ປຸ່ນ ແລະ ຊາວຕ່າງປະເທດ “ທີ່ມີເຫດຜົນພິເສດ” ເດີນທາງເຂົ້າປະເທດເທົ່ານັ້ນ. ຂະນະດຽວກັນ ຍີ່ປຸ່ນກຳລັງຮ້ອງຂໍສາຍການບິນໃນປະເທດ ແລະ ຕ່າງປະເທດຄວບຄຸມຈຳນວນຜູ້ໂດຍສານທີ່ມີແຜນເດີນທາງເຂົ້າປະເທດນໍາອີກ.
ອ້າງອີງ: ສຳນັກຂ່າວຊິນຮົວ
