ຢ່າໃຫ້ບ່ອນສັກວັກຊີນໂຄວິດ ກາຍເປັນຈຸດແຜ່ລະບາດຂອງເຊື້ອພະຍາດນີ້
ເມື່ອມໍ່ໆມານີ້, ຢູ່ປະເທດເຮົາໄດ້ມີຂະບວນການສັກຢາວັກຊີນໂຄວິດ-19 ໃຫ້ກຸ່ມເປົ້າໝາຍສ່ຽງ ແລະ ມວນຊົນຢ່າງກວ້າງຂວາງ ເພື່ອແນໃສ່ສະກັດກັ້ນການແຜ່ລະບາດຂອງພະຍາດດັ່ງກ່າວທີ່ພວມແຜ່ຂະຫຍາຍໄປຢ່າງກວ້າງຂວາງໃນທົ່ວໂລກ ໂດຍສະເພາະຢູ່ນະຄອນຫລວງວຽງຈັນເຮົາ ພຽງບໍ່ເທົ່າໃດມື້ມານີ້ໄດ້ມີຜູ້ຕິດເຊື້ອເພີ່ມຂຶ້ນເກືອບເປັນ 30 ຄົນແລ້ວ ແລະ ຂະບວນສັກວັກຊີນກໍເຂັ້ມຂຸ້ນຂຶ້ນນັບມື້ ແລະ ຈຸດສັກວັກຊີນນັ້ນກໍໄດ້ຂະຫຍາຍກວ້າງອອກ ໂດຍໄດ້ມອບໃຫ້ໂຮງໝໍແຂວງ ແລະ ເມືອງເປັນຜູ້ຈັດຕັ້ງປະຕິບັດ ແລະ ປະຊາຊົນພົນລະເມືອງເຮົາຕ່າງກໍໄດ້ຫລັ່ງໄຫລເຂົ້າໄປຮັບວັກຊີນດັ່ງກ່າວນັບມື້ເພີ່ມທະວີ ຈົນຫລາຍບ່ອນກໍເກີດຄວາມແອອັດ ຍາດຄິວກັນເຂົ້າໄປສັກວັກຊີນນີ້ ຈົນບໍ່ໄດ້ຄຳນຶງເຖິງມາດຕະການ ແລະ ຫລັກການປ້ອງກັນພະຍາດໂຄວິດເຊັ່ນ: ໃສ່ຜ້າອັດປາກ-ອັດດັງ, ໃຊ້ອັງໂກນ ແລະ ເຈວລ້າງມື ຫລື ມາດຕະການໄລຍະຫ່າງແຕ່ຢ່າງໃດ, ຈາກຈຸດນີ້ ເຮົາຈະສັງເກດເຫັນວ່າ ຖ້າຈຸດໃຫ້ວັກຊີນນີ້ຫາກບໍ່ເຂັ້ມງວດປະຕິບັດມາດຕະການປ້ອງກັນທີ່ດີແລ້ວ ກໍອາດຈະກາຍເປັນຈຸດແຜ່ລະບາດຂອງພະຍາດໂຄວິດຕື່ມອີກກໍເປັນໄດ້.
