Sinovac ຈັດສັນວັກຊີນປ້ອງກັນໂຄວິດ-19 ແລ້ວ 260 ລ້ານໂດສ ກວ່າ 60% ສົ່ງໄປນອກປະເທດຈີນ
ວັນທີ 20 ເມສາ 2021, ປະທານ ແລະ CEO ຂອງ Sinovac ຜູ້ຜະລິດວັກຊີນສັນຊາດຈີນ ກ່າວຂະນະຮ່ວມກອງປະຊຸມຍ່ອຍຂອງກອງປະຊຸມອາຊີໂປອາວ (BFA) ປະຈຳປີ 2021 ວ່າ: Sinovac ຈັດສັນວັກຊີນປ້ອງກັນພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ລວມ 260 ລ້ານໂດສແລ້ວ ໂດຍຫລາຍກວ່າ 60% ຖືກສົ່ງໄປຕ່າງປະເທດ.
ປະທານຂອງ Sinovac ລະບຸວ່າ: Sinovac ຮ່ວມວຽກກັບບໍລິສັດຜູ້ປະກອບການຕ່າງປະເທດດ້ານການວິໄຈ ແລະ ພັດທະນາວັກຊີນ ພ້ອມສົ່ງຕໍ່ເຕັກໂນໂລຊີຂອງບໍລິສັດເພື່ອດຳເນີນການຜະລິດຮ່ວມທົ່ວໂລກ ໂດຍສະເພາະໃນປະເທດທີ່ຂາດປະສິດທິພາບການວິໄຈກ່ຽວກັບວັກຊີນ.
ປັດຈຸບັນ Sinovac ມີກຳລັງການຜະລິດວັກຊີນຫລາຍກວ່າ 6 ລ້ານໂດສຕໍ່ວັນ ແລະ ວັກຊີນຂອງບໍລິສັດໄດ້ຮັບອະນຸມັດການນຳໃຊ້ກໍລະນີສຸກເສີນໃນເກືອບ 40 ປະເທດທົ່ວໂລກ ໂດຍປະທານກ່າວອີກວ່າ: Sinovac ຈະສາມາດຜະລິດວັກຊີນປ້ອງກັນພະຍາດໂຄວິດ-19 ໄດ້ 2.000 ລ້ານໂດສໃນປີນີ້.
ອ້າງອີງ: ສຳນັກຂ່າວຊິນຮົວ
