ອິນເດຍວິກິດໜັກ ພຽງ 24 ຊົ່ວໂມງ ມີຜູ້ເສຍຊີວິດຈາກໂຄວິດ 2 ພັນກວ່າຄົນ
ອິນເດຍຕ້ອງຮັບມືຢ່າງໜັກກັບການແກ້ໄຂສົບຂອງຜູ້ເສຍຊີວິດຈາກໂຄວິດແຕ່ລະມື້ ທີ່ມີຈຳນວນເພີ່ມຂຶ້ນຈຳນວນຫລາຍ, ຫລ້າສຸດ ໃນຮອບ 24 ຊົ່ວໂມງ ອິນເດຍມີຜູ້ເສຍຊີວິດຈາກໂຄວິດຫລາຍກວ່າ 2.000 ຄົນ ຖືເປັນຈຳນວນຜູ້ເສຍຊີວິດແຕ່ລະວັນຫລາຍທີ່ສຸດ.
ກຳມະກອນທີ່ເຮັດວຽກໃນສະຖານຈູດສົບແຫ່ງໜຶ່ງຂອງເມືອງກຸຣຸກຣາມ ບອກວ່າ: ລາວຕ້ອງຈູດສົບໂດຍສະເລ່ຍປະມານ 12 ສົບຕໍ່ມື້. ຂະນະທີ່ຢູ່ເມືອງພາຣານະສີ ມີການຈັດພິທີຈູດສົບກາງແຈ້ງ ແຄມແມ່ນໍ້າຄົງຄາ.
ການຈູດສົບຂອງຜູ້ຕິດເຊື້ອໂຄວິດຕ້ອງເຮັດໃຫ້ສຳເລັດພາຍໃນ 24 ຊົ່ວໂມງ ຈຶ່ງເຮັດໃຫ້ເຈົ້າໜ້າທີ່ອິນເດຍທົ່ວປະເທດຕ້ອງຮັບມືຢ່າງໜັກຕໍ່ບັນຫານີ້.
ຂະນະດຽວກັນ ຈຳນວນຜູ້ຕິດເຊື້ອແຕ່ລະວັນຢູ່ອິນເດຍຍັງບໍ່ມີທ່າທີຈະຫລຸດລົງ ໂດຍຈຳນວນຫລ້າສຸດໃນວັນທີ 21 ເມສາ ມີຜູ້ຕິດເຊື້ອໂຄວິດໃໝ່ສູງເຖິງ 295.041 ຄົນ ຖືເປັນມື້ທີ 7 ຕິດຕໍ່ກັນແລ້ວທີ່ມີຜູ້ຕິດເຊື້ອໃໝ່ເກີນ 2 ແສນຄົນ, ສ່ວນຜູ້ຕິດເຊື້ອສະສົມສູງກວ່າ 15,6 ລ້ານຄົນ ເປັນຮອງພຽງອາເມລິກາ ທີ່ມີຜູ້ຕິດເຊື້ອສະສົມ 31 ລ້ານຄົນ.
