ປຸກປານຢາບ້ານຫ້ອມ

- advert banner 728 90 728x90 - ປຸກປານຢາບ້ານຫ້ອມ

ໂດຍ: ກ້ອງສ່ອງ ອິດສະຫລະ

- new3 - ປຸກປານຢາບ້ານຫ້ອມ

ພາຍຫລັງ​ສະພາ​ປະຊາຊົນ​ນະຄອນຫລວງ​ວຽງ​ຈັນ​ໄດ້ຕາງໜ້າ​ໃຫ້​ປະຊາຊົນ​ຊາວ​ນະຄອນຫລວງ​ຮັບຮອງ​ເອົາການ​ສ້າງຕັ້ງ​ “ກອງ​ທຶນ​ທາງ” ປາກົດວ່າມີຫາງສຽງຕ່າງໆຈາກ​ສັງຄົມ​ໃນ​​ທາງ​ລົບຫລາຍກວ່າ​ທາງ​ບວກ​. ​ເວົ້າ​ແຈ້ງ​ຄົນ​ສ່ວນຫລາຍ​ທີ່ຢູ່​ນະ​ຄອນຫລວງ​ເກືອບ​ວ່າບໍ່​ມີ​ໃຜ​​ເຫັນ​ດີ ​ແລະ ສະໜັບສະໜູນ. ​ສາ​ເຫດ​ຂອງມັນ​ກໍ​ມີຫລາຍ​ປັດໄຈ ​ແລະ ຫລາຍ​ເງື່ອນ​ໄຂທີ່​​ເຫັນ​ວ່າຍັງ​ບໍ່​ທັນ​ມີ​ຄວາມ​ພ້ອມ​ ຄືອັນ​ທີ​ໜຶ່ງມັນ​ເປັນ​ການ​ທັບ​ຊ້ອນຫລາຍຂັ້ນ, ຫລາຍ​​ຂອດ​ແລະ ຫລາຍ​ອັນ​ເສຍ​ໂພດ ​​ເປັນ​ຕົ້ນ​ຄ່າ​ບູລະນະ​ເສັ້ນທາງ​ກໍ​ວ່າ​ໄດ້​​ຄິດ​ໄລ່​ໃສ່​ຄ່າ​ນ້ຳມັນແລ້ວ.ນອກ​ນັ້ນ ກໍ​ຍັງ​ມີ​ການ​ເສຍພັນທະອາກອນຕາມ​ກົດໝາຍ​ປະ​ຈໍາ​ເດືອນ, ປະ​ຈໍາປີ, ມີ​ການ​ເສຍ​ປະກັນ​ໄພ​ລົດ ​ແລະ ​ອື່ນໆ​ຕະປິດ​ຕະປີ່. ອັນ​ສອງ​ມາ​ເຫັນ​ວ່າລາຍ​ຈ່າຍຂອງ​ພະນັກງານ,ທະຫານ, ​ຕໍາຫລວດ ​ແລະ ​ປະຊາຊົນ​ມັນ​ເກີນກວ່າ​ລາຍ​ຮັບ​ຫລາຍ ​ຈົນ​ວ່າ​ບໍ່​ມີ​ອັນ​ຊິ​ເວົ້າ, ສະ​ພາບ​ຊີວິດການ​ເປັນ​ຢູ່​ຂອງ​ພະນັກງານ, ທະຫານ, ຕໍາຫຼວດ ​ນັບທັງ​ປະຊາຊົນທີ່ຢູ່​ໃນນະຄອນ ຫລວງ​​ເຮົາ​ດຽວ​ນີ້ ​ຈົນ​ເຖິງ​ຂັ້ນ​ເອົາ​ຊີວິດ​ເກືອບ​ບໍ່​ລອດ​ໃນ​ແຕ່ລະ​ເດືອນ. ສິ້ນ​ເດືອນ​ມາ​ບໍ່​ຈັກ​ຄ່ານ້ຳ, ຄ່າ​ໄຟ, ນ້ຳມັນ​ລົດ​ທຽວ​ການ, ຊື້ຢູ່ຊື້​ກິນ​ແຕ່​ລະ​ມື້, ການ​ເຈັບ​ເປັນ​ເອັນ​ອຸ່ນ, ເພາະທານ, ງານດອງ ແລະ​ ພັນທະ​ສັງຄົມ​ອື່ນໆບໍ່​ຈັກ​ວ່າ​ຄົນ​ຕາຍ, ຄົນ​ເປັນ, ຄ່າ​ອະນາ​ໄມ,ຍາ​ມມີ​ບຸນມີ​ທານ​ກໍຕ້ອງ​ໄດ້​ເສຍ​ພັນທະ​ຕ່າງໆຕາມ​ທາງບ້ານທາງ​ເມືອງ​ເພິ່ນ​ຕົກ​ໃສ່, ສໍ່າ​ວ່າ​ເງິນ​ເດືອນດ້າມ​ລ້ານສອງ​ລ້ານ​ແມ່ນຫລຽວ​ບໍ່​ເຫັນ​ກິ່ນ. ​ຖ້າພວກ​ເຮົາ​ພາກັນ​ບວກ​ລົບ​ຄູນ​ຫານ​ເບິ່ງ​ວ່າ​ລາຍ​ຮັບ​ຊໍ່າ​ນີ້, ລາຍ​ຈ່າຍ​ຊໍ່າ​ນັ້ນ​ແລ້ວ​ຜົນ​ອອກ​ມາ​ມັນ​ຊິ​ເປັນ​ແນວ​ແນວ​ໃດ ?. ຄັນ​ຊິ​ມາ​ຕັ້ງ​ຄໍາ​ຖາມ​ກັນ​ວ່າ​ ລາຍ​ຮັບ​ໜ້ອຍ​ຄື​ມີ​ເງິນ​ຊື້​ລົດ​​ຂີ່​ ?. ອັນ​ນີ້​ເຮົາ​ຂໍ​ບອກ​ວ່າ​ພວກ​ທີ່​ມີ​ລົດ​ໃຫຍ່​​ຄັນ​ງາມ​ຫລູຫລາ​ມີ​ແຕ່​ພວກ​​ເຮັດ​ທຸລະ​ກິດ, ເຮັດການ​ຄ້າ, ພວກ​ເຈົ້າ​ພວກ​ນາຍ, ພວກ​​ເພິ່ນມີ​ເງິນ​ມີ​ຄໍາຮັ່ງມີ​ເປັນ​ດີ, ບາງ​ກໍລະນີ​ເງິນ​ທີ່​ໄດ້​ມາມັນ​ກໍ​ແມ່ນ​ຈາກ​ການ​ສໍ້​ລາດ​ບັງຫລວງ, ຈາກວິທີ​ສໍ້ໂກງ​ເອົາ​ເງິນ​ຂອງ​ລັດ ​ແລະ​ ຂອງ​ປະຊາຊົນ​ຜູ້​ທຸກ​ຍາກ, ພວກ​ທີ່​ຄ້າຂາຍ​ຜິດ​ກົດໝາຍ​ ແລະ​ ຊ່ອງ​ທາງ​ທີ່​ບໍ່​ຊອບ​ທໍາອື່ນໆ. ສ່ວນ​ຜູ້​ມີ​ລາຍ​ຮັບ​ໜ້ອຍ​ແມ່ນ​ເຂົາ​ດາວລົດ​ຂີ່ ເມື່ອ​ຈ່າຍ​ໄປ​ບໍ່​ປົກກະຕິ​ເຂົາ​ກໍມາ​ຍຶດ​ເອົາ​ຄືນ, ​ເບິ່ງ​ຢ່າງ​ໜຶ່ງ​ຄື​ເປັນຕາ​ສັງ​ເວດ ​ແລະ ​ເບິ່ງ​ຢ່າງ​ໜຶ່ງ​ຄື​ມັນສົມ​ພໍ​ກັນ​ໂຕ​ບໍ່​ມີ​ເງິນພຽງພໍ​ພັດ​ໄປ​ດາວ​ລົດ​ເຂົາ​ມາ​ຂີ່. ສ່ວນອັນ​ທີ​ສາມ​ມາ​ກໍ​ຕ້ອງ​ເບິ່ງ​ໃນ​ດ້ານ​ລັດຖະທໍາ​ມະນູນ ​ແລະ ​ກົດໝາຍ​ຕື່ມ, ຖ້າ​ແມ່ນ​ເຮັດ​ກໍ​ຕ້ອງ​ເອກະ​ພາບ​ໃນ​ທົ່ວ​ປະ​ເທດ​ ບໍ່​ແມ່ນ​ພຽງ​ແຕ່​ຢູ່​ນະຄອນຫຼວງ​ວຽງ​ຈັນເທົ່ານັ້ນ. ສ່ວນວ່າ​ອັນ​ທີ​ສີ່​ໂຕສຸດ​ທ້າຍ​ທີ່​ເຂົາຂັດຂ້ອງ​ເຮັ່ງ​ແມ່ນ​ເກັບ​ເງິນ​ກອງ​ທຶນ​ໄປ​ແລ້ວ​ພັດ​ຊິ​ເອົາ​ໄປ​ໃຊ້​ໜີ້​ຄ່າ​ສ້າງ​ເສັ້ນທາງ ວ່າ​ຊັ້ນ !​ ອັນ​ນີ້​ເຂົາ​ວ່າ​ມັນ​ປຸກ​ປານ​ຢາ​ບ້ານ​ຫ້ອມ ທັງໆ​ທີ່​ການ​ສ້າງ​ເສັ້ນທາງແມ່ນ​ມີ​ແຜນ, ມີ​ງົບປະມານ​ສະ​ເພາະ​ຕ່າງຫາກຢູ່ແລ້ວ, ຊ້ຳ​ບໍ່​ໜໍ​າທາງ​ຊອຍ​ໃນ​ບາງ​ບ້ານ, ບາງ​ທ້ອງ​ຖິ່ນພັດ​ວ່າລັດ​ກັບ​ປະຊາຊົນ​ພ້ອມ​ກັນ​ເຮັດ​ແລ້ວ​ພັດ​ຊິ​ເອົາ​ເງິນໄປ​ໃຊ້​ໜີ້​ຢູ່​ເສັ້ນທາງ​​​ໃດ​ອີກ. ​ໃນຂອດ​ຈັດ​ຕັ້ງ​ປະຕິບັດ​ເກັບ​ເອົາ​ເງິນມາ​ເປັນ​ກອງ​ທຶນ​ນັ້ນ ພວກ​ເຮົາ​ກໍ​ຍັງບໍ່​ທັນ​ຮູ້​ລາຍ​ລະອຽດ​ວ່າ​ເຮັດ​ແນວໃດ​ ແລະ ​ເສຍ​ຢູ່​ໃສຈົນກວ່າ​ວ່າກ້າວ​ເຂົ້າ​ປີ 2018 ຈຶ່ງ​ຈະ​ໄດ້​ຮູ້ ​ແລະ ​ເຫັນນໍາ​ກັນ, ມີ​ແຕ່​ວ່າ​​ໃຫ້​ພາກັນ​ຊອກ​ເອົາ​ເງິນ​ໄວ້​ຕາມ​ທີ່​ໄດ້​ເຫັນ​ໃນ​ຕາຕະລາງ​ໃຜ​ມີ​ລົດ​ໃຫຍ່​ລົດ​ນ້ອຍ, ລົດ​ໜັກ​ລົດ​ເບົາ, ​ໃຜ​ເສຍ​ໜ້ອຍ​ເສຍຫລາຍ​ກໍຕ້ອງ​ໄດ້​​ເບິ່ງ​ເອົາ​ຕາມ​ນັ້ນ.

ຄັນ​ເວົ້າ​ເຖິງ​ການ​ສ້າງ​ຕັ້ງ​ກອງ​ທຶນ, ຫລາຍ​ບ້ານ, ຫລາຍ​ເມືອງ ​ແລະ ຫລາຍ​ໝ້ອງ ​ເຂົາ​ກໍ​ພາກັນ​ເຮັດ​ຢູ່​ ເປັນ​ຕົ້ນ​ກອງ​ທຶນ​ບ້ານ, ກອງ​ທຶນ​ສະຫະພັນ​ແມ່ຍິງ, ກອງ​ທຶນ​ສະມາຄົມຕ່າງໆທີ່​ຂຶ້ນ​ກັບ​ລັດຖະບານ ​ແລະ ​ບໍ່​ຂຶ້ນ​ກັບ​ລັດຖະບານ ນັບ​ທັງ​ກອງ​ທຶນ​ສາກົນ​ຕ່າງໆ​ແຕ່ລະ​ປະ​ເທດທີ່​ເຂົ້າ​ເປັນ​ສະມາຊິກ. ໃນ​ບັນດາກ​ອງທຶນເຫລົ່ານີ້​ເປົ້າ​ໝາຍເຂົາ​ນໍາ​ໃຊ້​​ເຂົ້າ​ໃນການ​ພັດທະນາ​ອົງ​ກອນ, ວຽກ​ງານ​ສະຫວັດດີ​ການ​ໃຫ້​ຜູ້ເປັນ​ສະມາຊິກ ຫລື ​ໄປຊ່ວຍ​ເຫລືອຜູ້​ຄົນ​ທີ່​ດ້ອຍ​ໂອກາດ, ປະຊາຊົນ​ຜູ້​ທຸກ​ຍາກ​ຂາດ​ເຂີນ ຫລື ​ຊຸກຍູ້​ສົ່ງ​ເສີມ​ເສດຖະກິດ-ສັງຄົມ​ຂອງ​ປະ​ເທດ​ສະ​ມາ​ຊິກ​ຕາມ​ກົ​ດຂອງກອງ​ທຶນ ຫລື ​ຂອງ​ສະມາຄົມນັ້ນໆ. ຜ່ານ​ຂະ​ບວນວິວັດ​ພັດທະນາ​ມາ​ຫລາຍ​ປີກ​ອງທຶນເຫລົ່າ​ນັ້ນ​ເຂົາ​ກໍ​ມີ​ເງິນ​ຈົນ​ເຖິງ​ຂັ້ນ​ໄດ້​ໄປ​ພັດທະນາ​ ແລະ​ ຊ່ວຍ​ເຫລືອ​ຢູ່​ບ່ອນ​ອື່ນ.

- lattana 1 - ປຸກປານຢາບ້ານຫ້ອມ

​ເຖິງ​ຢ່າງ​ໃດ​ກໍ​ດີ, ຕາມ​ເຮົາ​ວ່າການ​ສ້າງ​ຕັ້າງກອງ​ທຶນ​ຂຶ້ນ​ໃນ​ແຕ່ລະ​ຂົງ​ເຂດ​ວຽກ​ງານ​ ບໍ່​ວ່າ​ຢູ່​ໃສຂັ້ນ​ໃດ​ກໍ​ຕາມແມ່ນ​ເປັນ​ການ​ດີ​ທີ່​ສຸດ, ແຕ່​ສິ່ງ​ສໍາຄັນ​ຄືການ​ຄຸ້ມ​ຄອງ​ກອງ​ທຶນ, ການ​ນໍ​າ​ໃຊ້​ກອງ​ທຶນ​ໃຫ້​ມີ​ຜົນ​ປະ​ໂຫຍ​ດສູງ​ສຸດ​ກັບ​ຜູ້​ທີ່​ປະກອບສ່ວນ​ໃຫ້​ພາລະກິດ​ຂອງ​ບ້ານ​ເມືອງ​ອີ່​ຫຼີເຊິ່ງກ່ອນ​ອື່ນ​ໝົດ​ແມ່ນ​ເພື່ອການ​ພັດທະນາອົງ​ກອນ​ໃຫ້​ກ້າວ​ໄກ, ​ເພື່ອ​ຜົນ​ປະ​ໂຫຍ​ດຂອງຜູ້​​​ເສຍ​ເງິນ ​ແລະ ​ເພື່ອ​ຜົນ​ປະ​ໂຫຍ​ດຂອງ​ສັງຄົມເປັນ​ຫລັກ. ຫລີກເວັ້ນ​ຫາງ​ສຽງ​ຈົ່ມ​ຂອງສັງຄົມ​ວ່າ​ກອງ​ທຶນ​ທາງ​ນະຄອນຫລວງ​ມັນ​ປຸກ​ປານ​ຢາ​ບ້ານ​ຫ້ອມ.

error: Content is protected !!