06/5/2021 ລາວ ພົບຄົນຕິດເຊື້ອໂຄວິດ-19 ເພີ່ມອີກ 105

- 182088324 1825741897593421 2385552636004350002 n - 06/5/2021 ລາວ  ພົບຄົນຕິດເຊື້ອໂຄວິດ-19 ເພີ່ມອີກ 105
- AGL banner - 06/5/2021 ລາວ  ພົບຄົນຕິດເຊື້ອໂຄວິດ-19 ເພີ່ມອີກ 105

ໃນວັນທີ 6 ພຶດສະພາ 2021 ຢູ່ກະຊວງສາທາລະນະສຸກ ທ່ານ ດຣ. ນາງ ພອນປະເສີດ ໄຊຍະມົງຄຸນ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ພ້ອມດ້ວຍ ທ່ານ ດຣ. ປະນອມ ຟອງມະນີ ຮອງຫົວໜ້າກົມອະນາໄມ ແລະ ສົ່ງເສີມສຸຂະພາບ  ກະຊວງສາທາລະນະສຸກ, ຕາງໜ້າກອງເລຂາ ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດ COVID-19 ໄດ້ລາຍງານໃຫ້ຮູ້ວ່າ: ໃນວັນທີ 05 ພຶດສະພາ 2021 ໄດ້ເກັບຕົວຢ່າງມາກວດວິເຄາະທັງ ໝົດ 3.596 ຕົວຢ່າງ ຜົນກວດວິເຄາະ ແມ່ນພົບຜູ້ຕິດເຊື້ອໃໝ່ 105 ຄົນ. ໃນນັ້ນ, ນະຄອນຫລວງ 15 ຄົນ, ຈໍາປາສັກ 12 ຄົນ, ບໍ່ແກ້ວ 72 ຄົນ (ຕົ້ນເຜີ້ງ 70 ຄົນ ແລະ ບໍ່ແກ້ວ 2 ຄົນ) ແລະ ສະຫວັນນະເຂດ 2  ຄົນ, ແຂວງວຽງຈັນ 2 ຄົນ ແລະ ຜົ້ງສາລີ 2 ຄົນ. ສຳລັບຄົນເຈັບກໍລະນີໃໝ່ ທີ່ພົບຢູ່ນະຄອນ ຫລວງວຽງຈັນ ກໍ່ລ້ວນແລ້ວແຕ່ເປັນຜູ້ສຳຜັດໃກ້ຊິດກັບຜູ້ຕິດເຊື້ອ ທີ່ກ່ຽວພັນກັບກໍລະນີທີ 59 ເຊັ່ນກັນ.

ມາຮອດປັດຈຸບັນ ມີ ລາຍງານຜູ້ຕິດເຊື້ອທັງໝົດ  1.177 ຄົນ (ໃໝ່ 105) ບໍ່ມີຜູ້ເສຍຊີວິດ, ໃນ ຈຳນວນຜູ້ຕິດເຊື້ອທັງໝົດ ແມ່ນໄດ້ຮັບການປິ່ນປົວຫາຍດີ 101 ຄົນ, ຍັງນອນຕິດຕາມປິ່ນປົວຢູ່ສະຖານທີ່ຄະນະສະເພາະກິດກຳນົດໄວ້ ໃນແຕ່ລະແຂວງ ຈຳນວນ 1.076 ຄົນ ລາຍລະອຽດດັ່ງນີ້: ນະຄອນຫລວງວຽງຈັນ 600 ຄົນ (ໃໝ່ 15), ມື້ວານນີ້ອອກໂຮງໝໍ 1 ຄົນ (ມິດຕະພາບ 1 ຄົນ ເພື່ອສືບຕໍ່ຈໍາກັດບໍລິເວນຢູ່ບ້ານ 14 ວັນ. ແຂວງຈຳປາສັກ 169 ຄົນ (ໃໝ່ 12), ສຳລັບຄົນເຈັບແຂວງເຊກອງ ແມ່ນນອນປິ່ນປົວຢູ່ແຂວງຈຳປາສັກ, ແຂວງບໍ່ແກ້ວ 205 ຄົນ (ໃໝ່ 72), ແຂວງສະຫວັນນະເຂດ 40 ຄົນ  (ໃໝ່ 2), ແຂວງຫລວງພະບາງ 13 ຄົນ, ແຂວງວຽງຈັນ 16 ຄົນ (ໃໝ່ 2), ແຂວງສາລະວັນ 7 ຄົນ,  ແຂວງຫລວງນ້ຳທາ 6 ຄົນ, ແຂວງອຸດົມໄຊ 8 ຄົນ, ແຂວງຜົ້ງສາລີ 5 ຄົນ (ໃໝ່ 2), ແຂວງໄຊຍະບູລີ 3 ຄົນ, ແຂວງບໍລິຄຳໄຊ 2 ຄົນ (ມື້ວານນີ້ ອອກໂຮງໝໍ 1 ຄົນ ເພື່ອສືບຕໍ່ຈໍາກັດບໍລິເວນ ຢູ່ບ້ານ 14 ວັນ, ແຂວງຄຳມ່ວນ 1 ຄົນ ແລະ ແຂວງຊຽງຂວາງ 1 ຄົນ. ປັດຈຸບັນ ທົ່ວປະເທດ ມີສູນຈໍາກັດບໍລິເວນທີ່ເປີດນຳໃຊ້ ຢູ່ ທັງໝົດ 56 ສູນ, ມີຜູ້ຈຳກັດບໍລິເວນທັງໝົດ 3.496 ຄົນ, ທຸກຄົນແມ່ນ ໄດ້ເກັບຕົວຢ່າງມາກວດວິເຄາະຫາເຊື້ອພະຍາດ COVID-19.

ທ່ານ ດຣ. ນາງ ພອນປະເສີດ ໄຊຍະມົງຄຸນ ກ່າວວ່າ: ຕໍ່ກັບສະພາບການລະບາດຂອງພະຍາດໂຄວິດ-19 ປັດຈຸບັນ ລັດຖະບານ ກໍ່ຄື ຄະນະສະເພາະກິດ ແລະ ອໍານາດການປົກຄອງທຸກຂັ້ນ ໄດ້ເອົາໃຈໃສ່ ໃນການຕິດຕາມຈັດຕັ້ງປະຕິບັດ ຄຳສັ່ງ, ແຈ້ງການ ແລະ ຄຳແນະນຳ ຂອງແຕ່ລະພາກສ່ວນຢ່າງເຂັ້ມງວດ ເພື່ອສະກັດກັ້ນບໍ່ໃຫ້ພະຍາດ ມີການແຜ່ຂະຫຍາຍເປັນວົງກວ້າງອອກໄປຕື່ມອີກ. ມາດຕະການທີ່ວາງອອກໃນນະຄອນຫລວງໄລຍະນີ້ ກໍ່ເພື່ອແນ່ໃສ່ 3 ບັນຫາຕົ້ນຕໍ ຄື: 1. ປິດການເຂົ້າ-ອອກ ບໍ່ໃຫ້ຜູ້ຕິດເຊື້ອອອກໄປແຜ່ເຊື້ອຕື່ມ ແລະ ບໍ່ໃຫ້ຄົນຈາກບ່ອນອື່ນເຂົ້າມາຈຸດສ່ຽງ; 2. ທີມງານເຝົ້າລະວັງພະຍາດ ກໍ່ເອົາໃຈໃສ່ໃນການຄົ້ນຫາຜູ້ຕິດເຊື້ອໃຫ້ໄດ້ໄວ ໂດຍການເພີ່ມຈຸດບໍລິການກວດເຊື້ອພະຍາດຂຶ້ນຫລາຍຈຸດ ເພື່ອຄົ້ນຫາຜູ້ຕິດເຊື້ອໄດ້ໄວ ແລ້ວນຳເຂົ້າໄປປິ່ນປົວໂດຍທັນທີ; 3. ລະດົມປະຊາຊົນ ແລະ ຜູ້ຢູ່ໃນກຸ່ມເປົ້າໝາຍສັກຢາ ໃຫ້ໄດ້ໄປສັກຢາວັກແຊງກັນພະຍາດໂຄວິດ-19 ເຊິ່ງກໍ່ເປັນຊ່ອງທາງໜຶ່ງ ທີ່ຈະຫລຸດຜ່ອນການແຜ່ເຊື້ອພະຍາດໃນສັງຄົມ. ໃນສະພາບປັດຈຸບັນ ລັດຖະບານ ໄດ້ຂະຫຍາຍການປະຕິບັດຄຳສັ່ງ 15/ນຍ ໄປຮອດວັນທີ 20 ພຶດສະພາ 2021 ກໍ່ຂໍໃຫ້ບັນດາທ່ານ ສືບຕໍ່ປະຕິບັດຕາມມາດຕະການສະບັບດັ່ງກ່າວຢ່າງເຂັ້ມງວດ.

- Wave100S AD to Website 2020 0 - 06/5/2021 ລາວ  ພົບຄົນຕິດເຊື້ອໂຄວິດ-19 ເພີ່ມອີກ 105
- WhatsApp Image 2020 05 27 at 5 - 06/5/2021 ລາວ  ພົບຄົນຕິດເຊື້ອໂຄວິດ-19 ເພີ່ມອີກ 105
- WhatsApp Image 2020 05 27 at 5 - 06/5/2021 ລາວ  ພົບຄົນຕິດເຊື້ອໂຄວິດ-19 ເພີ່ມອີກ 105
error: Alert: ເນື້ອຫາຂ່າວມີລິຂະສິດ !!