ລາວ ພົບຜູ້ຕິດເຊື້ອໂຄວິດ-19 ເພີ່ມ 28 ຄົນ

- WhatsApp Image 2021 05 07 at 3 - ລາວ ພົບຜູ້ຕິດເຊື້ອໂຄວິດ-19 ເພີ່ມ 28 ຄົນ
- AGL banner - ລາວ ພົບຜູ້ຕິດເຊື້ອໂຄວິດ-19 ເພີ່ມ 28 ຄົນ

ໃນວັນທີ 7 ພຶດສະພາ 2021, ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ຕາງໜ້າກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດ COVID-19 ໄດ້ລາຍງານວ່າ: ວັນທີ 6 ພຶດສະພາ 2021 ໄດ້ເກັບຕົວຢ່າງມາກວດວິເຄາະທັງໝົດ 1.688 ຄົນ, ຜົນກວດພົບຜູ້ຕິດເຊື້ອໃໝ່ 28 ຄົນ. ໃນນັ້ນຢູ່ນະ ຄອນຫລວງ 10 ຄົນ, ແຂວງຈໍາປາສັກ 4 ຄົນ, ບໍ່ແກ້ວ 8 ຄົນ, ສາລະວັນ 5 ຄົນ ແລະ ແຂວງວຽງຈັນ 1 ຄົນ. ມາຮອດປັດຈຸບັນ, ມີລາຍງານຜູ້ຕິດເຊື້ອໂຄວິດ-19 ຢູ່ ສປປ ລາວ ທັງໝົດ 1.205 ຄົນ (ໃໝ່ 28), ບໍ່ມີຜູ້ເສຍຊີວີດ. ໃນນີ້, ປິ່ນປົວຫາຍດີ ມີ 122 ຄົນ ແລະ ຍັງປິ່ນປົວຢູ່ສະຖານທີ່ຄະນະສະເພາະກິດກຳນົດໄວ້ໃນແຕ່ລະແຂວງ ຈຳນວນ 1.083 ຄົນ. ສ່ວນຜູ້ເດີນທາງເຂົ້າມາປະເທດລາວ ໃນມື້ດຽວກັນມີທັງໝົດ 2.254 ຄົນ. ຜ່ານດ່ານ ລາວ-ໄທ 1.267 ຄົນ, ດ່ານລາວ-ຈີນ 84 ຄົນ, ດ່ານລາວ-ຫວຽດ ນາມ 851 ຄົນ ແລະ ຜ່ານສະໜາມບິນສາກົນວັດໄຕ 52 ຄົນ. ທຸກຄົນຜ່ານການວັດແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້, ເກັບຕົວຢ່າງທຸກຄົນມາກວດຫາເຊື້ອ COVID-19 ກ່ອນນຳສົ່ງໄປຈຳກັດບໍລິເວນ ຢູ່ສູນທີ່ຄະນະສະເພາະກິດກຳນົດໄວ້. ປັດຈຸບັນ, ມີຜູ້ຖືກຈຳກັດບໍລິເວນທັງໝົດ 3.416 ຄົນຢູ່ໃນ 50 ສູນທົ່ວປະເທດ.

ສຳລັບຄົນເຈັບກໍລະນີໃໝ່ ທີ່ພົບຢູ່ນະຄອນຫລວງວຽງຈັນ ລ້ວນແຕ່ເປັນຜູ້ສຳຜັດໃກ້ຊິດກັບຜູ້ຕິດ ເຊື້ອທີ່ກ່ຽວພັນກັບກໍລະນີທີ 59 ເຊັ່ນກັນ. ສ່ວນກໍໍລະນີຕິດເຊື້ອໃໝ່ ຢູ່ແຂວງຈຳປາສັກ, ບໍ່ແກ້ວ, ສາລະວັນ ແລະ ແຂວງວຽງຈັນ ກໍລ້ວນແຕ່ມີປະຫວັດສຳຜັດ ກັບກໍລະນີຕິດເຊື້ອເກົ່າຢູ່ໃນແຂວງຂອງເຂົ້າເຈົ້າເຊັ່ນກັນ. ຂະນະດຽວກັນ, ມີຜູ້ມາກວດວິເຄາະຈໍານວນໜຶ່ງ ໃຫ້ຂໍ້ມູນບໍ່ລະອຽດຕໍ່ຄະນະສະເພາະກິດ ຄື: ທ້າວ ມິນຕາ ອາຍຸ 23 ປີ, ທ້າວ ສຸພາລີ ອາຍຸ 23 ປີ, ນາງ ມະນີວັນ 40 ປີ ແລະ ທ້າວ ວິຊຽນ 38 ປີ, ໃຫ້ຮີບຮ້ອນໂທປະສານຫາ ທ່ານ ດຣ. ນາງ ວຽງສາຄອນ ຫລວງປະດິດ ເບີໂທ 020 94095533 ແລະ ເບີ 020 55663579 ເພື່ອຕິດຕໍ່ຫາພະນັກງານແພດໝໍດ່ວນ, ຖ້າຫາກທ່ານໃດຈົງໃຈລົບຫລີກ ຈະຖືກປະຕິບັດລະບຽບວິໄນຕາມລະບຽບກົດໝາຍ. ຕໍ່ກັບສະພາບການລະບາດຂອງພະຍາດໃນປັດຈຸບັນ, ລັດ ຖະບານໄດ້ຂະຫຍາຍການປະຕິບັດຄຳສັ່ງ ເລກທີ 15/ນຍ ໄປຮອດວັນທີ 20 ພຶດສະພາ 2021 ແລ້ວ ກໍຂໍໃຫ້ປະຊາຊົນບັນດາເຜົ່າ ສືບຕໍ່ປະຕິບັດຢ່າງເຂັ້ມງວດ ເປັນຕົ້ນແມ່ນ ຫ້າມບໍ່ໃຫ້ຄົນຢູ່ນະຄອນຫລວງວຽງຈັນ ເດີນທາງໄປຕ່າງແຂວງ ແລະ ຫ້າມຄົນຢູ່ຕ່າງແຂວງເດີນທາງເຂົ້າມາໃນນະຄອນຫລວງ, ຍົກເວັ້ນຜູ້ທີ່ມີພູມລຳເນົາ, ຜູ້ທີ່ເຮັດວຽກປະຈຳຢູ່ນະຄອນຫລວງ, ຜູ້ທີ່ໄດ້ຮັບອະນຸຍາດຈາກຄະນະສະເພາະກິດນະຄອນ ຫລວງວຽງຈັນ ຫລື ຄະນະສະເພາະກິດຂັ້ນສູນກາງ, ການຂົນສົ່ງສິນຄ້າເທົ່ານັ້ນ. ເພື່ອຮັກສາໄລຍະຫ່າງທາງສັງຄົມບັນດາກະຊວງ, ອົງການທຽບເທົ່າ, ນະຄອນຫລວງວຽງຈັນ, ວິສາຫະກິດທົ່ວນະຄອນຫລວງ ຕ້ອງຫລຸດຈຳນວນ ແລະ ຈັດຕັ້ງຜຽນພະນັກງານ, ລັດຖະກອນ, ກຳມະກອນ ມາປະຈຳການໃນແຕ່ລະວັນ ຕາມຄວາມເໝາະສົມ, ຍົກເວັ້ນ: ທະຫານ, ຕຳຫລວດ, ເຈົ້າໜ້າທີ່ດັບເພິງ, ພະນັກງານຮັບຜິດຊອບລະ ບົບການບໍລິການໄຟຟ້າ, ນ້ຳປະປາ, ໂທລະຄົມມະນາຄົມ, ການສື່ສານ, ຂົນສົ່ງ, ສາທາລະນະສຸກ, ອາ ສາສະໝັກ ຜູ້ທີ່ຖືກມອບໝາຍໃຫ້ເຮັດວຽກສະກັດກັ້ນ, ຄວບຄຸມ ແລະ ປິ່ນປົວ ຜູ້ຕິດເຊື້ອພະຍາດ.

ຂະນະດຽວກັນ ກໍຫ້າມປະຊາຊົນ, ພະນັກງານ, ລັດຖະກອນ, ທະຫານ, ຕຳຫລວດ, ກຳມະກອນ, ນັກຮຽນ, ນັກສຶກສາ, ຜູ້ປະກອບການ, ນັກບວດ, ຊາວຕ່າງດ້າວ, ຜູ້ບໍ່ມີສັນຊາດ ແລະ ຊາວຕ່າງປະເທດ ທີ່ຢູ່ນະຄອນຫລວງວຽງຈັນ, ອອກຈາກເຮືອນ ຫລື ທີ່ພັກອາໄສຂອງຕົນ, ຍົກເວັ້ນກໍລະນີທີ່ຈຳເປັນ ເຊັ່ນ: ໄປຊື້ເຄື່ອງອຸປະໂພກ-ບໍລິໂພກ, ໄປໂຮງໝໍ, ໄປປະຕິບັດໜ້າທີ່ ໃນກິດຈະການທີ່ລະບຸໄວ້ໃນຂ້າງເທິງກ່າວມານັ້ນ ແລະ  ອະນຸຍາດໃຫ້ສືບຕໍ່ດຳເນີນກິດຈະການ ທີ່ມີຄວາມຈຳເປັນ ເປັນຕົ້ນ: ບັນດາໂຄງການໃຫຍ່, ໂຮງຊ່າງ-ໂຮງງານ, ທະນາຄານ, ສະຖາບັນການເງິນ ທີ່ບໍ່ແມ່ນທະນາຄານ, ຕະຫລາດຫລັກຊັບ, ບໍລິສັດຫລັກຊັບ, ໂຮງໝໍ, ສູນການແພດ, ຮ້ານຂາຍຢາ, ໜ່ວຍກູ້ໄພ, ກິດຈະການໄປສະນີ, ໂທລະຄົມມະນາຄົມ, ໄຟຟ້າ, ນ້ຳປະປາ, ການບໍລິການເກັບ ແລະ ຖິ້ມຂີ້ເຫຍື້ອ, ຕະຫລາດກະສິກຳ, ຮ້ານຂາຍເຄື່ອງຍ່ອຍ, ຮ້ານຄ້າ (ຊຸບເປີ້ມາເກັດ), ປ້ຳນ້ຳມັນ, ຮ້ານອາຫານ ແລະ ຮ້ານກາເຟ. ສຳລັບໂຮງແຮມ, ຣີສອດ ໃຫ້ເປີດສະເພາະການໃຫ້ບໍລິການທີ່ພັກ ແລະ ຮ້ານອາຫານ.

- Wave100S AD to Website 2020 0 - ລາວ ພົບຜູ້ຕິດເຊື້ອໂຄວິດ-19 ເພີ່ມ 28 ຄົນ

ສຳລັບຜູ້ໄປສັກວັກແຊງ ກໍຍັງສາມາດສືບຕໍ່ໄປສັກໄດ້ຕາມຈຸດບໍລິການ ທີ່ໄດ້ກຳນົດໄວ້ ແລະ ຜູ້ທີ່ເປັນຜູ້ສຳຜັດໃກ້ຊິດກັບຜູ້ຕິດເຊື້ອ ແລະ ເປັນກຸ່ມສ່ຽງ ກໍຂໍໃຫ້ຮີບຮ້ອນໄປສະເໜີໂຕ ເພື່ອເກັບຕົວຢ່າງຊອກຫາເຊື້ອໂຄວິດ-19 ຕາມຈຸດບໍລິການທີ່ກໍານົດໄວ້, ແຕ່ຕ້ອງປະຕິບັດມາດຕະການຮັກສາໄລຍະຫ່າງ ແລະ ໃສ່ຜ້າປິດປາກ-ດັງ ຕະຫລອດເວລາ ເພື່ອປ້ອງກັນໂຕທ່ານເອງ ແລະ ທຸກຄົນອ້ອມຂ້າງ.

- WhatsApp Image 2020 05 27 at 5 - ລາວ ພົບຜູ້ຕິດເຊື້ອໂຄວິດ-19 ເພີ່ມ 28 ຄົນ
- WhatsApp Image 2020 05 27 at 5 - ລາວ ພົບຜູ້ຕິດເຊື້ອໂຄວິດ-19 ເພີ່ມ 28 ຄົນ
error: Alert: ເນື້ອຫາຂ່າວມີລິຂະສິດ !!