ຢ່າເອົາຄວາມເຊື່ອມາທ້າທາຍກັບການແພ່ລະບາດພະຍາດໂຄວິດ-19

- FB IMG 1620514517086 - ຢ່າເອົາຄວາມເຊື່ອມາທ້າທາຍກັບການແພ່ລະບາດພະຍາດໂຄວິດ-19
- AGL banner - ຢ່າເອົາຄວາມເຊື່ອມາທ້າທາຍກັບການແພ່ລະບາດພະຍາດໂຄວິດ-19

ໂດຍ: ທິດກໍ່າ

ເຫດການຈັດງານບຸນບັ້ງໄຟຂອງຊາວບ້ານໂພນສິມ ນະຄອນໄກສອນ ພົມວິຫານ ແຂວງສະຫວັນນະເຂດ ໃນວັນທີ 2 ພຶດສະພາ 2021 ໄດ້ເປັນບົດຮຽນອັນໃຫຍ່ຫລວງ ແລະ ຖືວ່າເປັນກະແສຂ່າວທີ່ຮືຮາໂດ່ງດັງແຜ່ລາມໄປໃນສື່ອອນລາຍຢ່າງກວ້າງຂວາງ. ອັນສາເຫດກໍຍ້ອນວ່າການເຮັດບຸນຄັ້ງນີ້ ພວມຢູ່ໃນຊ່ວງໄລຍະລັອກດາວ ເພື່ອຕ້ານກັບການແຜ່ລະບາດຂອງພະຍາດໂຄວິດ-19 ທັງຝືນກັບຄຳສັ່ງເລກທີ 15/ນຍ ຂອງທ່ານນາຍົກລັດຖະມົນຕີ ແລະ ບັນດາມາດຕະການຕ່າງໆຂອງຄະນະສະເພາະກິດຂັ້ນສູນກາງ ແລະ ຂັ້ນທ້ອງຖິ່ນໃນການຕ້ານ, ສະກັດກັ້ນ, ຄວບຄຸມ ແລະ ແກ້ໄຂສະພາບການແຜ່ລະບາດຮອບໃໝ່ຂອງພະຍາດໂຄວິດ-19 ນັບແຕ່ຊ່ວງປີໃໝ່ຜ່ານມາ.
ໃນແຫລ່ງຂ່າວຍັງບອກວ່າ: ສາເຫດທີ່ເຮັດໃຫ້ເກີດມີບຸນບັ້ງໄຟຄັ້ງນີ້ ແມ່ນຍ້ອນຢ້ານຜີມະເຫສັກຫລັກເມືອງມາອາລະວາດກຸກກວນຊາວບ້ານ ເພາະວ່າແຕ່ລະປີເຄີຍເຮັດ ຖ້າບໍ່ເຮັດກໍຢ້ານຜີບ້ານຜີເມືອງມາເຮັດໃຫ້ມີການເຈັບເປັນລົ້ມຕາຍ ວ່າຊັ້ນ ! (ອີງຕາມຄວາມເຊື່ອຂອງຄົນໃນທ້ອງຖິ່ນຕັ້ງແຕ່ໃດໆມາ). ນີ້ຄືຕົ້ນເຫດຫລັກໆຂອງບຸນບັ້ງໄຟບ້ານໂພນສິມທີ່ຮືຮາເປັນຂ່າວໃຫຍ່ໃນອາທິດທີ່ຜ່ານໆມາ. ໃນເບື້ອງຕົ້ນກໍເວົ້າກັນວ່າຈະພາກັນເຮັດແຕ່ຢູ່ພາຍໃນບ້ານພໃຫ້ແລ້ວຮີດແລ້ວຄອງ, ແຕ່ພໍເມື່ອເຮັດຕົວຈິງຈັກວ່າຄົນມາແຕ່ໃສຈົນໜາແໜ້ນ ມີຂະບວນຟ້ອນແຫ່ບັ້ງໄຟເປັນພຶງເປັນແພ, ມີຜູ້ຟ້ອນ, ມີຜູ້ລຳ, ມີຜູ້ຫລິ້ນຫຸ່ນ, ຫລິ້ນເປິະຫລິ້ນເປື້ອນແຫ່ແຫນແໜ້ນໜາ ໃນທີ່ສຸດກໍເຮັດໃຫ້ອຳນາດການປົກຄອງທ້ອງຖິ່ນ ໂດຍສະເພາະເລຂາພັກບ້ານ ທັງເປັນນາຍບ້ານຕ້ອງຖືກປົດຕຳແໜ່ງຢ່າງກະທັນຫັນໃນສະຖານເປັນຫົວໂຈກພາໄທບ້ານໂພນສິມເຮັດ.
ສ່ວນທາງເບື້ອງພຣະອາຈານ ສີວິໄລ ວະນາຣາມ ທີ່ເຄີຍເປັນເຈົ້າອະທິການວັດ ທັງເປັນປະທານ ອພສ ເຂດໂພນສິມ ກໍໄດ້ອອກມາໂພສຢືນຢັນດ້ວຍຄວາມບໍລິສຸດໃຈວ່າ: ການຈັດງານບຸນບັ້ງໄຟຄັ້ງນີ້ແມ່ນປະຊາຊົນພາກັນເຮັດເອງທຳເອງ ເຊິ່ງພະອາຈານກໍໄດ້ຫ້າມບໍ່ເຫັນດີໃຫ້ເຮັດ. ພະອາຈານຍັງເວົ້າແຖມທ້າຍວ່າ: ການເຮັດບຸນບັ້ງໄຟຄັ້ງນີ້ແມ່ນບໍ່ໃຫ້ກ່ຽວຂ້ອງເຖິງພະຢູ່ວັດ ນັບທັງຄູບາອາຈານ ເພາະເຈົ້າຄະນະແຂວງ, ເຈົ້າຄະນະເມືອງເພິ່ນກໍບໍ່ອະນຸຍາດໃຫ້ເຮັດ ແລະ ການເຮັດບຸນຄັ້ງນີ້ແມ່ນເນື່ອງມາຈາກປະຊາຊົນເຂົາເຊື່ອຖືແບບງົມງວາຍ, ນັບຖືຜີຫລາຍກວ່ານັບຖືພະສົງອົງຄະເຈົ້າ. ໃນໄລຍະຜ່ານໆມາກໍເໝືອນກັນ ຈະເຮັດຫຍັງທຳຫຍັງ, ຈະສ້າງສາພັດທະນາອັນໃດໃນວັດວາອາຮາມກໍຕ້ອງໃຫ້ຜີມະເຫສັກຫລັກເມືອງເປັນຜູ້ອະນຸຍາດກ່ອນຈຶ່ງເຮັດໄດ້. ໃນສະພາບປັດຈຸບັນ ທົ່ວໂລກເຂົາຢ້ານໂຄວິດ-19 ແຕ່ພວກເຈົ້າພັດມາຢ້ານຍາພໍ່ຫລັກເມືອງ. ພະອາຈານ ສີວິໄລ ວະນາຣາມ ໄດ້ເວົ້າອັດແຖມທ້າຍຜ່ານສື່ອອນລາຍ.
ເຖິງຢ່າງໃດກໍດີ, ຕາມທິດກໍ່າວ່າ ເລື່ອງຄວາມເຊື່ອນັ້ນກໍຂໍໃຫ້ເປັນເລື່ອງຂອງບຸກຄົນ, ເປັນເລື່ອງສະເພາະຂອງທ້ອງຖິ່ນ ບໍ່ຄວນເອົາມາເປັນຕົວວັດ ແລະ ຕັດສິນຍາມບ້ານເມືອງເກີດວິກິດການໂຄວິດ-19. ທົ່ວພັກ, ທົ່ວກອງທັບ ແລະ ປະຊາຊົນບັນດາເຜົ່າພວມຈັດຕັ້ງປະຕິບັດຄຳສັ່ງຂອງທ່ານນາຍົກລັດຖະມົນຕີ ນັບທັງປະຕິບັດບັນດາມາດຕະການຕ່າງໆຂອງຄະນະສະເພາະກິດຂັ້ນສູນກາງ ແລະ ທ້ອງຖິ່ນຢ່າງເຂັ້ມງວດ ແລະ ເດັດຂາດ. ບົດຮຽນອັນໃຫຍ່ຫລວງຈາກປະເທດອິນເດຍທີ່ພວມຜະເຊີນຢູ່ທຸກວັນນີ້ ກໍຄືຍ້ອນຄວາມເຊື່ອພາກັນໄປອາບໃນແມ່ນໍ້າຄົງຄາ ຖືເປັນປາງບຸນໃຫຍ່ ສຸດທ້າຍໃນສະພາບປັດຈຸບັນ ມີຄົນຕ້າຍຍ້ອນໂຄວິດ-19 ມື້ລະ 3 ແສນກວ່າຄົນຈົນລົ້ນໂຮງໝໍຍ້ອນຄວາມເຊື່ອເກີນເຫດຜົນ ແລະ ຄວາມເປັນຈິງ.

- Wave100S AD to Website 2020 0 - ຢ່າເອົາຄວາມເຊື່ອມາທ້າທາຍກັບການແພ່ລະບາດພະຍາດໂຄວິດ-19
- WhatsApp Image 2020 05 27 at 5 - ຢ່າເອົາຄວາມເຊື່ອມາທ້າທາຍກັບການແພ່ລະບາດພະຍາດໂຄວິດ-19
- WhatsApp Image 2020 05 27 at 5 - ຢ່າເອົາຄວາມເຊື່ອມາທ້າທາຍກັບການແພ່ລະບາດພະຍາດໂຄວິດ-19
error: Alert: ເນື້ອຫາຂ່າວມີລິຂະສິດ !!