ມາເລເຊຍຂະຫຍາຍຄຳສັ່ງຄວບຄຸມການເດີນທາງທົ່ວປະເທດເຖິງມິຖຸນານີ້ ຫລັງຜູ້ຕິດເຊື້ອໂຄວິດ-19 ເພີ່ມສູງຂຶ້ນ

- index - ມາເລເຊຍຂະຫຍາຍຄຳສັ່ງຄວບຄຸມການເດີນທາງທົ່ວປະເທດເຖິງມິຖຸນານີ້ ຫລັງຜູ້ຕິດເຊື້ອໂຄວິດ-19 ເພີ່ມສູງຂຶ້ນ
- AGL banner - ມາເລເຊຍຂະຫຍາຍຄຳສັ່ງຄວບຄຸມການເດີນທາງທົ່ວປະເທດເຖິງມິຖຸນານີ້ ຫລັງຜູ້ຕິດເຊື້ອໂຄວິດ-19 ເພີ່ມສູງຂຶ້ນ

ວັນທີ 10 ພຶດສະພາ 2021, ທ່ານ ມູຢິດດິນ ຢັສຊິນ ນາຍົກລັດຖະມົນຕີມາເລເຊຍ ປະກາດໃນວັນທີ 9 ພຶດສະພາວ່າ: ມາເລເຊຍຈະຂະຫຍາຍຄຳສັ່ງຄວບຄຸມການເດີນທາງທີ່ຢູ່ລະຫວ່າງບັງຄັບໃຊ້ໃນຫລາຍພື້ນທີ່ໃຫ້ຄວບຄຸມທົ່ວປະເທດຈົນຮອດເດືອນມິຖຸນາ ເພື່ອຢັບຢັ້ງການແຜ່ລະບາດຂອງພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19).

ທ່ານ ມູຢິດດິນ ລະບຸວ່າ: ຄຳສັ່ງດັ່ງກ່າວຈະເລີ່ມມີຜົນບັງຄັບໃຊ້ນັບແຕ່ວັນທີ 12 ພຶດສະພາ ເຖິງ 7 ມິຖຸນານີ້ ຫລັງຈາກຈຳນວນຜູ້ຕິດເຊື້ອໂຄວິດ-19 ໃໝ່ເພີ່ມສູງຂຶ້ນທົ່ວປະເທດ ໂດຍສະເພາະຫລັງກວດພົບພະຍາດໂຄວິດ-19 ຊະນິດກາຍພັນ ແລະ ປະຊາຊົນບໍ່ປະຕິບັດຕາມມາດຕະການປ້ອງກັນພະຍາດຢ່າງເຂັ້ມງວດ.

ທ່ານ ມູຢິດດິນ ກ່າວວ່າ: ການກວດພົບພະຍາດໂຄວິດ-19 ຊະນິດກາຍພັນທີ່ມີອັດຕາແຜ່ເຊື້ອສູງຂຶ້ນ ລະບົບສາທາລະນະສຸກທີ່ແບກຮັບພາລະໜັກ ແລະ ການບໍ່ປະຕິບັດຕາມມາດຕະການປ້ອງກັນພະຍາດ ລ້ວນເປັນເຫດຜົນທີ່ເຮັດໃຫ້ລັດຖະບານຕ້ອງດຳເນີນມາດຕະການທີ່ເຂັ້ມງວດຂຶ້ນ ເພື່ອບໍ່ໃຫ້ປະເທດພົບໄພພິບັດທາງສາທາລະນະສຸກທີ່ຮ້າຍແຮງກວ່າເກົ່າ.

ຂໍ້ມູນຊີ້ວ່າ: ກິດຈະກຳສາທາລະນະ ໂດຍສະເພາະການລວມຕົວກັນໃນພື້ນທີ່ອັບອາກາດ ສົ່ງຜົນໃຫ້ຈຳນວນຜູ້ຕິດເຊື້ອໂຄວິດ-19 ເພີ່ມສູງຂຶ້ນ ໂດຍໜຶ່ງໃນຄຳສັ່ງທີ່ກຳລັງຈະມີຜົນບັງຄັບໃຊ້ ລວມທັງການຫ້າມເດີນທາງລະຫວ່າງລັດ ແລະ ລະຫວ່າງເຂດ ຍົກເວັ້ນກໍລະນີສຸກເສີນ, ເດີນທາງໄປເຮັດວຽກ ຫລື ສັກວັກຊີນ ພ້ອມທັງຫ້າມຈັດກິດຈະກຳທາງສັງຄົມທຸກຮູບແບບ ທັງງານສະເຫລີມສະຫລອງ, ງານແຕ່ງດອງ ແລະ ການເດີນທາງທ່ອງທ່ຽວໃນມື້ພັກ.

ນອກຈາກນີ້, ສະຖາບັນການສຶກສາຈະຍັງປິດ ແລະ ຢຸດການຮັບປະທານອາຫານພາຍໃນຮ້ານ, ສ່ວນການຂັບຂີ່ຍານພາຫະນະຈະອະນຸຍາດໃຫ້ມີຜູ້ໂດຍສານພຽງ 3 ຄົນ ລວມຄົນຂັບເທົ່ານັ້ນ ອີກທັງການສະເຫລີມສະຫລອງເທດສະການອີດິສຟີຕຣີ (Eid al-Fitr) ທີ່ກຳລັງຈະມາເຖິງຈະຖືກຈຳກັດເຊັ່ນກັນ, ແຕ່ເສດຖະກິດທຸກພາກສ່ວນຈະໄດ້ຮັບອະນຸຍາດໃຫ້ດຳເນີນງານຫາກປະຕິບັດຕາມມາດຕະການປ້ອງກັນໂຄວິດ.

- Wave100S AD to Website 2020 0 - ມາເລເຊຍຂະຫຍາຍຄຳສັ່ງຄວບຄຸມການເດີນທາງທົ່ວປະເທດເຖິງມິຖຸນານີ້ ຫລັງຜູ້ຕິດເຊື້ອໂຄວິດ-19 ເພີ່ມສູງຂຶ້ນ

ທັງນີ້, ລັດຖະບານມາເລເຊຍປະກາດໃຊ້ຄຳສັ່ງຄວບຄຸມການເດີນທາງເປັນເວລາ 2 ອາທິດໃນນະຄອນຫລວງກົວລາລຳເປີ ແລະ ອີກຫລາຍພື້ນທີ່ທົ່ວປະເທດທີ່ກວດພົບຜູ້ຕິດເຊື້ອໂຄວິດ-19 ເພີ່ມຂຶ້ນ ນັບແຕ່ອາທິດກ່ອນ.

ໃນວັນທີ 9 ພຶດສະພາ, ກະຊວງສາທາລະນະສຸກມາເລເຊຍລາຍງານການກວດພົບຜູ້ຕິດເຊື້ອໂຄວິດ-19 ເພີ່ມ 3.807 ຄົນ ແບ່ງເປັນຜູ້ຕິດເຊື້ອຈາກຕ່າງປະເທດ 5 ຄົນ ແລະ ຜູ້ຕິດເຊື້ອໃນທ້ອງຖິ່ນ 3.802 ຄົນ ສົ່ງຜົນໃຫ້ມີຜູ້ຕິດເຊື້ອສະສົມ 444.484 ຄົນ ແລະ ພົບຜູ້ເສຍຊີວິດເພີ່ມ 17 ຄົນ ເຮັດໃຫ້ມີຜູ້ເສຍຊີວິດສະສົມ 1.700 ຄົນ.

ອ້າງອີງ: ສຳນັກຂ່າວຊິນຮົວ

- WhatsApp Image 2020 05 27 at 5 - ມາເລເຊຍຂະຫຍາຍຄຳສັ່ງຄວບຄຸມການເດີນທາງທົ່ວປະເທດເຖິງມິຖຸນານີ້ ຫລັງຜູ້ຕິດເຊື້ອໂຄວິດ-19 ເພີ່ມສູງຂຶ້ນ
- WhatsApp Image 2020 05 27 at 5 - ມາເລເຊຍຂະຫຍາຍຄຳສັ່ງຄວບຄຸມການເດີນທາງທົ່ວປະເທດເຖິງມິຖຸນານີ້ ຫລັງຜູ້ຕິດເຊື້ອໂຄວິດ-19 ເພີ່ມສູງຂຶ້ນ
error: Alert: ເນື້ອຫາຂ່າວມີລິຂະສິດ !!