ຂໍສົ່ງກຳລັງໃຈໃຫ້ນັກຮົບເສື້ອຂາວທີ່ພວມຕໍ່ສູ້ກັບພະຍາດໂຄວິດ-19

- 183667600 947765536041404 6024667760607686192 n - ຂໍສົ່ງກຳລັງໃຈໃຫ້ນັກຮົບເສື້ອຂາວທີ່ພວມຕໍ່ສູ້ກັບພະຍາດໂຄວິດ-19
- AGL banner - ຂໍສົ່ງກຳລັງໃຈໃຫ້ນັກຮົບເສື້ອຂາວທີ່ພວມຕໍ່ສູ້ກັບພະຍາດໂຄວິດ-19

ໂດຍ: ທິດກໍ່າ
ນັບແຕ່ມີການລະບາດຮອບໃໝ່ຂອງພະຍາດໂຄວິດ-19 ເປັນຕົ້ນມາ, ຜູ້ທີ່ໄດ້ຄຸກຄີຕໍ່ສູ້ໂດຍກົງກັບພະຍາດດັ່ງກ່າວ ທັງເປັນຜູ້ໃກ້ຊິດຕິດແທດກັບຄົນເຈັບຄົນເປັນກໍແມ່ນແພດໝໍທີ່ຕ້ອງໄດ້ຕໍ່ສູ້ເພື່ອກູ້ເອົາຊີວິດອິນຊີໃຫ້ລອດພົ້ນອອກຈາກຄວາມເຈັບ, ຄວາມຕາຍຫາຍນະະ ແລະ ຄວາມທຸກຂະເວດທະນາ ເຊິ່ງມາຮອດປັດຈຸບັນນີ້ ຢູ່ ສປປ ລາວພວກເຮົາ ໄດ້ມີຄົນຕິດເຊື້ອສະສົມເຖິງ 1.000 ກວ່າຄົນແລ້ວ ໃນຈຳນວນທີ່ກ່າວມານີ້ ແມ່ນຫາກໍມີຜູ້ປິ່ນປົວໃຫ້ຫາຍດີພຽງ 100 ກວ່າຄົນເທົ່ານັ້ນ.
ແຕ່ແນວໃດກໍຕາມ, ຜ່ານການປິ່ນປົວ ນັບແຕ່ມື້ເລີ່ມຕົ້ນມາຮອດປັດຈຸບັນແມ່ນຫາກໍມີຜູ້ເສຍຊີວິດຍ້ອນພຽງ 1 ຄົນເທົ່ານັ້ນ. ໃນກໍລະນີຜູ້ເສຍຊີວິດນີ້ ແມ່ນຍ້ອນຜູ້ກ່ຽວມີບັນຫາພະຍາດແຊກຊ້ອນໃນຕົວ ຄືເປັນເບົາຫວານຂຶ້ນສູງເຖິງ 200 ເຊິ່ງແພດໝໍເຮົາກໍໄດ້ເອົາໃຈໃສ່ເບິ່ງແຍງຈົນສຸດຄວາມສາມາດ ແຕ່ຜູ້ກ່ຽວກໍໄດ້ເສຍຊີວິດໃນເວລາຕໍ່ມາ. ຕາມເຮົາວ່າ ນີ້ກໍສະແດງໃຫ້ເຫັນເຖິງວິທະຍາສາດ ແລະ ວິທະຍາການໃນການປິ່ນປົວຂອງແພດໝໍລາວເຮົານັ້ນເປັນທີ່ຍອມຮັບ ແລະ ກໍໜ້າຍ້ອງຍໍຊົມເຊີຍເປັນຢ່າງຍິ່ງ.
ນອກຈາກນີ້ແລ້ວ ກໍຍັງເປັນການເຊື່ອໝັ້ນ ແລະ ໄວ້ວາງໃຈໃຫ້ຜູ້ໄປປິ່ນປົວໄດ້ເປັນຢ່າງດີ. ສິ່ງທີ່ໜ້າຊົມເຊີຍ ແລະ ສັນລະເສີນແພດໝໍລາວເຮົາອີກປະການໜຶ່ງນັ້ນ ກໍຄືຄວາມເສຍສະຫລະ, ມານະອົດທົນ, ການອຸທິດພາລະກິດ ແລະ ວິຊາສະເພາະຂອງຕົນຮັບໃຊ້ຊາດ, ຮັບໃຊ້ປະຊາຊົນດ້ວຍຄວາມຈົງຮັກພັກດີ ສົມກັບວ່າເປັນແພດໝໍປະຕິວັດແທ້ໆ. ເມື່ອເຫັນພາລະກິດຂອງແພດໝໍໃນຍຸກນີ້ມີການພັດທະນາ, ກ້າວໜ້າໂດດເດັ່ນ, ທິດກໍ່າກໍຍັງຄິດເຫັນແພດໝໍປະຕິວັດລາວເຮົາໃນສະໄໝສົງຄາມ ມີຫລາຍທ່ານ, ຫລາຍສະຫາຍຈົນກາຍເປັນນັກຮົບວິລະຊົນຂອງຊາດ ແລະ ການປະຕິວັດ. ນີ້ຄືມູນເຊື້ອຂອງແພດໝໍລາວເຮົາທີ່ມີມາແຕ່ຍຸກການປະຕິວັດຈົນມາຮອດຍຸກປັດຈຸບັນກໍຍັງສະແດງໃຫ້ເຫັນໃນຄວາມສາມາດ ແລະ ຄວາມເສຍສະຫລະເພື່ອຊາດ ແລະ ເພື່ອປະຊາຊົນ ກໍຄືດັ່ງທົ່ວພັກ, ທົ່ວກອງທັບ ແລະ ປະຊາຊົນບັນດາເຜົ່າໃນທົ່ວປະເທດໄດ້ຮັບຮູ້ນຳກັນແລ້ວວ່າ, ການລະບາດຮອບໃໝ່ຂອງພະຍາດໂຄວິດ-19 ໄດ້ສ້າງຄວາມເສຍຫາຍຢ່າງໃຫຍ່ຫລວງຕໍ່ເສດຖະກິດ-ສັງຄົມຂອງປະເທດ. ນອກຈາກນັ້ນ ກໍສ້າງຄວາມວິຕົກກັງວົນຢ່າງຍິ່ງຕໍ່ຄຸນນະພາບຊີວິດການເປັນຢູ່ຂອງປະຊາຊົນ ເປັນຕົ້ນໃນຊ່ວງລັອກດາວ ທຸກຄົນຕ້ອງຢູ່ໃນເຮືອນ, ໂອກາດໄປຊອກຢູ່ຫາກິນກໍຍາກ ມັນບໍ່ເປັນປົກກະຕິຄືຕອນບໍ່ທັນມີໂຄວິດ-19, ຍິ່ງໄປກວ່ານັ້ນ ທຸລະກິດການທ່ອງທ່ຽວ, ການບໍລິການ, ຮ້ານອາຫານ, ຮ້ານກິນດື່ມ ຫລື ບັນດາຂະແໜງການທຸລະກິດອື່ນໆ ຕ່າງກໍໄດ້ຮັບຜົນກະທົບໄປຕາມໆກັນ ຍ້ອນບໍ່ມີລາຍຮັບ ໂດຍສະເພາະແມ່ນພວກກຳມະກອນ ຫາເຊົ້າກິນຄໍ່າ ຄືດັ່ງແຫລ່ງຂ່າວໄດ້ບອກວ່າ: ໃນຊ່ວງໃຊ້ມາດຕະການຕ່າງໆ ເພື່ອຕ້ານກັບການແຜ່ລະບາດຂອງພະຍາດໂຄວິດ-19 ນີ້ ມີຄົນລາວຫວ່າງງານເຖິງ 6 ໝື່ນກວ່າຄົນ.
ແຕ່ເຖິງຢ່າງໃດກໍດີ, ອັນນີ້ມັນເປັນເລື່ອງທີ່ຈຳເປັນທີ່ພັກ ແລະ ລັດຖະບານຈະຕ້ອງໄດ້ເຮັດ ເພື່ອປົກປ້ອງຊີວິດອິນຊີຂອງປະຊາຊົນບັນດາເຜົ່າ. ເວົ້າແຈ້ງແລ້ວແມ່ນບໍ່ຢາກໃຫ້ຜູ້ໃດເສຍຊີວິດຍ້ອນໂຄວິດ-19 ໃນຊ່ວງເວລາລັອກດາວ ຈຶ່ງຂໍໃຫ້ທຸກຄົນປະຕິບັດມາດຕະການຕ່າງໆຢ່າງເຄັ່ງຂັດ ຈຶ່ງຈະສາມາດຢັບຢັ້ງການແຜ່ລະບາດຂອງພະຍາດໂຄວິດ-19 ໄດ້ຢ່າງທັນຄວັນ. ສິ່ງທີ່ໜ້າເຫັນໃຈທີ່ສຸດກໍຄືການເຮັດໜ້າທີ່ຂອງແພດໝໍທີ່ໄດ້ຄຸກຄີ, ອົດທົນຜ່ານຜ່ານຸ່ງຊຸດຂາວເພື່ອປິ່ນປົວຜູ້ຕິດເຊື້ອໂຄວິດ-19 ແລະ ທັງປ້ອງກັນຕົນເອງ ທັງປິ່ນປົວຄົນອື່ນດ້ວຍຄວາມຢູ່ຍາກລຳບາກ ຈຶ່ງຂໍໃຫ້ກຳລັງໃຈແພດໝໍເຮົາຈົ່ງສູ້ຕໍ່ໄປເພື່ອຄວາມປອດໄພຊີວິດຂອງຕົນເອງ ທັງຊີວິດຂອງຜູ້ເຈັບຜູ້ເປັນ ພວກເຮົາສຸດທີ່ເຫັນໃຈຕໍ່ພາລະກິດຂອງແພດໝໍທີ່ຕ້ອງໄດ້ຕໍ່ສູ້ເໝືອນດັ່ງຢູ່ໃນສະໜາມຮົບອັນເດັດດ່ຽວຂ້ຽວຂາດ ຈຶ່ງສາມາດຊະນະກັບໂຣກລະບາດໂຄວິດ-19 ນີ້ໄດ້.

- Wave100S AD to Website 2020 0 - ຂໍສົ່ງກຳລັງໃຈໃຫ້ນັກຮົບເສື້ອຂາວທີ່ພວມຕໍ່ສູ້ກັບພະຍາດໂຄວິດ-19
- WhatsApp Image 2020 05 27 at 5 - ຂໍສົ່ງກຳລັງໃຈໃຫ້ນັກຮົບເສື້ອຂາວທີ່ພວມຕໍ່ສູ້ກັບພະຍາດໂຄວິດ-19
- WhatsApp Image 2020 05 27 at 5 - ຂໍສົ່ງກຳລັງໃຈໃຫ້ນັກຮົບເສື້ອຂາວທີ່ພວມຕໍ່ສູ້ກັບພະຍາດໂຄວິດ-19
error: Alert: ເນື້ອຫາຂ່າວມີລິຂະສິດ !!