ທ່ານ ເນທັນຢາຮູ ປະນາມເຫດໂຈມຕີ ລະຫວ່າງຊາວອາຣັບກັບຊາວຢິວ

- 389948 01 05 - ທ່ານ ເນທັນຢາຮູ ປະນາມເຫດໂຈມຕີ ລະຫວ່າງຊາວອາຣັບກັບຊາວຢິວ
- AGL banner - ທ່ານ ເນທັນຢາຮູ ປະນາມເຫດໂຈມຕີ ລະຫວ່າງຊາວອາຣັບກັບຊາວຢິວ

ທ່ານ ເບັນຈາມິນ ເນຕັນຢາຮູ ນາຍົກລັດຖະມົນຕີອິສລາແອນ ປະນາມເຫດການປະທະກັນລະຫວ່າງຊາວອາຣັບກັບຊາວຢິວ ທີ່ເກີດຂຶ້ນໃນຫລາຍເມືອງຂອງອິສລາແອນ ແລະ ທະວີຄວາມຮຸນແຮງ ຈົນເຮັດໃຫ້ມີຜູ້ໄດ້ຮັບບາດເຈັບ ແລະ ເສຍຊີວິດເປັນຈຳນວນຫລາຍ ຊີ້ເປັນເລື່ອງທີ່ຍອມຮັບບໍ່ໄດ້.

“ບໍ່ມີເຫດຜົນສົມຄວນໃຫ້ຊາວອາຣັບລຸມປະຊາທັນຊາວຢິວ ແລະ ບໍ່ມີເຫດຜົນສົມຄວນໃຫ້ຊາວຢິວລຸມປະຊາທັນຊາວອາຣັບ” ທ່ານ ເນທັນຢາຮູ ກ່າວໃນຖະແຫລງການ.

“ສຳລັບຊາວອິສລາແອນ ຂ້າພະເຈົ້າບໍ່ສົນວ່າທ່ານກຳລັງເປັນເດືອດເປັນແຄ້ນ, ທ່ານບໍ່ສາມາດຖືກົດໝາຍເອົາໄວ້ໃນມືຂອງທ່ານເອງ” ທ່ານ ເນທັນຢາຮູ ກ່າວ. “ທ່ານບໍ່ສາມາດຈັບຊາວອາຣັບມາລຸມປະຊາທັນ ເຊັ່ນດຽວກັບທີ່ພວກເຮົາບໍ່ສາມາດເຝົ້າຕິດຕາມເບິ່ງຊາວອາຣັບເຮັດແບບນັ້ນກັບຊາວຢິວ”.

ພ້ອມກັນນີ້, ນາຍົກລັດຖະມົນຕີອິສລາແອນຍັງເປີດເຜີຍວ່າ: ທ່ານໄດ້ສັ່ງໃຫ້ຕຳຫລວດໃຊ້ອຳນາດສຸກເສີນເພື່ອເພີ່ມກຳລັງກັບໜ່ວຍຕຳຫວດຊາຍແດນ ແລະ ບັງຄັບໃຊ້ຄຳສັ່ງເຄີຟິວຖ້າມີຄວາມຈຳເປັນ.

ຄຳຖະແຫລງຂອງທ່ານ ເນຕັນຢາຮູ ມີຂຶ້ນໃນຂະນະທີ່ປະຊາຊົນຊາວອາຣັບ ແລະ ຊາວຢິວປະທະກັນຢ່າງດຸເດືອດໃນເມືອງຕ່າງໆຂອງອິສລາແອນ ແລະ ສະຖານະການຍິ່ງຮຸນແຮງຂຶ້ນ ເມື່ອກອງທັບອິສລາແອນ ແລະ ກຸ່ມຕິດອາວຸດຮາມາດຂອງປາແລັສຕິນເປີດສາກໂຈມຕີກັນ.

ໂດຍກອງກຳລັງຕິດອາວຸດຮາມາດໃນເຂດກາຊາຍິງຈະຫລວດກວ່າ 1.000 ລູກຂ້າມຊາຍແດນໄປຝັ່ງອິສລາແອນ ນັບແຕ່ການສູ້ຮົບຄັ້ງຫລ້າສຸດເກີດຂຶ້ນໃນວັນທີ 10 ພຶດສະພາຜ່ານມາ ແລະ ອິສລາແອນຕອບໂຕ້ດ້ວຍການໂຈມຕີທາງອາກາດທີ່ສ້າງຄວາມເສຍຫາຍຢ່າງຮຸນແຮງໃນເຂດກາຊາ.

ກະຊວງສາທາລະນະສຸກຂອງປາແລັສຕິນລາຍງານໃນວັນທີ 13 ພຶດສະພາວ່າ: ການຖິ້ມລະເບີດຂອງອິສລາແອນໃນເຂດກາຊາສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 83 ຄົນ ເຊິ່ງລວມທັງເດັກນ້ອຍ 17 ຄົນ ແລະ ຜູ້ຍິງ 7 ຄົນ ອີກທັງມີຜູ້ໄດ້ຮັບບາດເຈັບຢ່າງໜ້ອຍ 487 ຄົນ.

- Wave100S AD to Website 2020 0 - ທ່ານ ເນທັນຢາຮູ ປະນາມເຫດໂຈມຕີ ລະຫວ່າງຊາວອາຣັບກັບຊາວຢິວ

ສ່ວນກອງທັບອິສລາແອນລະບຸວ່າ: ມີຊາວອິສລາແອນເສຍຊີວິດ 7 ຄົນ ແລະ ມີຜູ້ໄດ້ຮັບບາດເຈັບຫລາຍກວ່າ 200 ຄົນ ນັບແຕ່ວັນທີ 10 ພຶດສະພາ. ຂະນະທີ່ມີລາຍງານວ່າ: ເດັກຜູ້ຊາຍອາຍຸ 6 ປີຄົນໜຶ່ງເສຍຊີວິດໃນວັນທີ 12 ພຶດສະພາ ຫລັງຈະຫລວດທີ່ຍິງມາຈາກເຂດກາຊາຕຳອາຄານທີ່ຢູ່ອາໄສແຫ່ງໜຶ່ງໃນເມືອງເອສເດຣອດຂອງອິສລາແອນ.

ເຫດການຮຸນແຮງທີ່ກຳລັງດຳເນີນຢູ່ໃນເວລານີ້ມີສາເຫດມາຈາກຄວາມຂັດແຍ່ງກ່ຽວກັບແຜນການຂັບໄລ່ຄອບຄົວຊາວປາແລັສຕິນໃນເຢລູຊາແລັມ ແລະ ການບັງຄັບໃຊ້ຂໍ້ຈຳກັດຕ່າງໆໃນພື້ນທີ່ເຢລູຊາແລັມຕາເວັນອອກ ເຊິ່ງເປັນສະຖານທີ່ລວມຕົວຂອງຊາວອາຣັບໃນຊ່ວງເດືອນລໍມາດອນ ໂດຍຄວາມຂັດແຍ່ງລະຫວ່າງອິສລາແອນ ແລະ ປາແລັສຕິນທະວີຄວາມຮຸນແຮງຢ່າງວ່ອງໄວຈົນກາຍເປັນເຫດການສູ້ຮົບຮ້າຍແຮງທີ່ສຸດຄັ້ງໜຶ່ງລະຫວ່າງທັງສອງຝ່າຍໃນຮອບຫລາຍປີຜ່ານມາ.

ທັງນີ້, ບັນດາປະເທດຕ່າງເຝົ້າຕິດຕາມສະຖານະການທີ່ເກີດຂຶ້ນໃນອິສລາແອນ ພ້ອມຮຽກຮ້ອງໃຫ້ທັງສອງຝ່າຍຢຸດການຂະຫຍາຍຄວາມຮຸນແຮງ ໂດຍສະຫະປະຊາຊາດເຕືອນວ່າ: ຄວາມຂັດແຍ່ງຄັ້ງນີ້ອາດນຳໄປສູ່ການເຮັດສົງຄາມເຕັມຮູບແບບ.

ອ້າງອີງ:

https://edition.cnn.com/2021/05/13/middleeast/israel-palestinian-violence-intl/index.html

- WhatsApp Image 2020 05 27 at 5 - ທ່ານ ເນທັນຢາຮູ ປະນາມເຫດໂຈມຕີ ລະຫວ່າງຊາວອາຣັບກັບຊາວຢິວ
- WhatsApp Image 2020 05 27 at 5 - ທ່ານ ເນທັນຢາຮູ ປະນາມເຫດໂຈມຕີ ລະຫວ່າງຊາວອາຣັບກັບຊາວຢິວ
error: Alert: ເນື້ອຫາຂ່າວມີລິຂະສິດ !!