ຖ້າຂາດຄວາມສາມັກຄີ ຄວາມມີໄຊ ກໍຈະບໍ່ເກີດ

- 59d1f658 city 18085 169df1a81d1 - ຖ້າຂາດຄວາມສາມັກຄີ ຄວາມມີໄຊ ກໍຈະບໍ່ເກີດ
- AGL banner - ຖ້າຂາດຄວາມສາມັກຄີ ຄວາມມີໄຊ ກໍຈະບໍ່ເກີດ

ໂດຍ: ມຶກບໍ່ແຫ້ງ

ສົງຄາມການຕໍ່ສູ້ຂອງມວນມະນຸດ ກັບພະຍາດລະບາດ ໂຄວິດ 19 ກຳລັງດຳເນີນໄປຢ່າງດຸເດືອດ ເພາະສະນັ້ນ ຖ້າພວກເຮົາບໍ່ສາມັກຄີກັນຕອນນີ້ ຈະບໍ່ມີເວລາອື່ນໃດອີກທີ່ຈະເອົາຊີວິດລອດໄດ້.

ໃນຊົ່ວຊີວິດຂອງຍຸກພວກເຮົາ ໃຜກໍຕ່າງບໍ່ຄາດຄິດເລີຍວ່າຈະໄດ້ມາພົບພໍ້ກັບໄພຄຸກຄາມ ທີ່ເປັນພະຍາດ ລະບາດໄປທົ່ວໂລກ ເຮັດໃຫ້ ກິດຈະກຳອັນຍິ່ງໃຫຍ່ ທີ່ມະນຸດສ້າງຂຶ້ນ ຈຳຕ້ອງໄດ້ຢຸດຕິລົງ ເຊິ່ງສະແດງໃຫ້ ພວກເຮົາເຫັນວ່າໂລກນີ້, ມວນມະນຸດ ກວ່າ 7 ຕື້ຄົນນີ້ ບໍ່ໄດ້ຍິ່ງໃຫຍ່ດັ່ງທີ່ເຮົາຄິດຕອນບໍ່ມີພະຍາດລະບາດເລີຍ ແລະ ມາຮອດດຽວນີ້ ພວກເຮົາຈຶ່ງໄດ້ສະດຸ້ງວ່າ ຄວາມສາມັກຄີ ແມ່ນປັດໄຈທີ່ຈະເອົາໄຊຊະນະເໜືອໄວຣັສນີ້ໄດ້.

ສປປລາວ ທີ່ປະຊາກອນ 7 ລ້ານຄົນ ດ້ວຍ ເງື່ອນໄຂເສດຖະກິດທີ່ກຳລັງຕົກຢູ່ໃນຊ່ວງທີ່ຫຍຸ້ງຍາກພໍສົມຄວນ ທີ່ລະດັບ ໜີ້ສິນຂອງລັດເພີ່ມຂຶ້ນ ແຕ່ການເກັບລາຍຮັບບໍ່ໄດ້ຕາມຄາດໝາຍ ໜຳຊໍ້າຖືກໄພພິບັດທຳມະຊາດ ຊໍ້າເຕີມ ແລະ ລະດັບການຂະຫຍາຍຕົວເສດຖະກິດຊັກຊ້າລົງ ແລ້ວກໍມາພົບກັບ ການລະບາດຂອງ ພະຍາດ ໂຄວິດ 19 ຍິ່ງເຮັດໃຫ້ ຄວາມຫຍຸ້ງຍາກເພີ່ມທະວີຂຶ້ນ ແຕ່ເໜືອສິ່ງອື່ນໃດ ການເອົາຊະນະ ສົງຄາມກັບພະຍາດລະບາດນີ້ ຕ້ອງມາກ່ອນ.

ການລະບາດຂອງ ພະຍາດໂຄວິດ ຮອບສອງ ຂອງ ສປປລາວ ໃນປີ 2021 ນີ້ຮ້າຍແຮງກວ່າ ຮອບທຳອິດທີ່ເກີດຂຶ້ນໃນປີ 2020 ຫຼາຍເທົ່າ. ພາຍຫຼັງການສະຫຼອງປີໃໝ່ລາວມາ ການຕິດເຊື້ອພາຍໃນ ຊຸມຊົນ ແມ່ນພຸ່ງຂຶ້ນສູງ ຫຼາຍກວ່າ ເມື່ອປີຜ່ານມາຫຼາຍເທົ່າ ເຊິ່ງມາຮອດປັດຈຸບັນ (25 ພຶດສະພາ 2021) ການຕິດເຊື້ອສະສົມຮອດ 1.878 ຄົນ ມີຜູ້ເສຍຊີວິດ 2​ຄົນ ແລະ ການຕິດເຊື້ອຍັງມີນັບມື້.

ຄະນະສະເພາະກິດ ກ່າວວ່າ “ພວກເຮົາ ຍັງມີຄວາມສ່ຽງໃນການຕິດເຊື້ອ ໃນຊຸມຊົນຢູ່ ເພາະວ່າ ຍັງມີກຸ່ມຄົນ ທີ່ບໍ່ມີຄວາມຮັບຜິດຊອບ ເຊັ່ນ ເມື່ອຮູ້ໂຕວ່າ ຢູ່ໃນກຸ່ມສ່ຽງຕໍ່ການຕິດເຊື້ອພັດບໍ່ບອກຄວາມຈິງຕໍ່ແພດໝໍ, ເຂົ້າໄປປິ່ນປົວຊັກຊ້າ, ບໍ່ປະຕິບັດຕາມ ມາດຕະການຂອງ ເຈົ້າໜ້າທີ່ ເຊັ່ນ ພາກັນ ໄປມາຫາສູ່ກັນ ຄືກັນກັບ ສະພາບປັກກະຕິ, ບໍ່ໃສ່ຜ້າປິດປາກ-ດັງ ແລະ ຄວາມລະເຫຼີງອື່ນໆ” ທີ່ເຮັດໃຫ້ ການຕິດເຊື້ອໃນຊຸມຊົນ ທີ່ບໍ່ສາມາດ ກຳນົດມື້ສິ້ນສຸດໄດ້.

ເພາະສະນັ້ນ ສຽງວີງວອນຂອງແພດໝໍ ໄດ້ດັ່ງກ້ອງ ອອກທົ່ວສັງຄົມວ່າ “ຂໍໃຫພວກເຮົາຮ່ວມກັນ ປ້ອງກັນ, ມີຄວາມຮັບຜິດຊອບຫຼາຍກວ່ານີ້ ທີ່ຈະເປີດເຜີຍຂໍ້ມູນຂອງຕົນເອງ ເພື່ອທີ່ຈະເຮັດໃຫ້ ການກວດຫາເຊື້ອ ແລະ ການປິ່ນປົວເປັນໄປຕາມ ໄລຍະເວລາທີ່ເໝາະສົມ, ຢ່າລໍຖ້າຈົນອາການຮ້າຍແຮງ ແລ້ວຈຶ່ງໄປຫາທ່ານໝໍ ຈົນມີກໍລະນີ ທີ່ເສຍຊີວິດມາແລ້ວ ເຊິ່ງໄດ້ເປັນອຸທາຫອນ ແລະບົດຮຽນທີ່ສຸດແກ່ສັງຄົມ”.

- Wave100S AD to Website 2020 0 - ຖ້າຂາດຄວາມສາມັກຄີ ຄວາມມີໄຊ ກໍຈະບໍ່ເກີດ

ເຮັດແນວໃດ ຖ້າຫາກປະຊາຊົນຍັງບໍ່ປະຕິບັດ ຕາມມາດຕະການ? ແນ່ນອນ ສາເຫດ ທີ່ບໍ່ສາມາດ ປະຕິບັດ ໄດ້ ອາດມີເຫດຜົນທີ່ແຕກຕ່າງກັນໄປ ໂດຍສະເພາະການ ໄປມາຫາສູ່ກັນ ນັ້ນ ຫຼາຍຄົນກໍວ່າ ຍ້ອນປາກທ້ອງ, ຫາກິນສືບມື້ສືບວັນ ຖ້າບໍ່ໄປ ກໍບໍ່ໄດ້. ໃນກໍລະນີນີ້ ທາງລັດຖະບານຄວນ ພິຈາລະນາ ເປັນອັນພິເສດ ວ່າການປິດບ້ານ ປິດເມືອງ ຈະກະທົບ ກຸ່ມຄົນໃດຫຼາຍທີ່ສຸດ ແລະ ຈະຫາວິທີ ຊ່ວຍເຂົາເຈົ້າ ໄດ້ແນວໃດ?

ແລະ ສຳລັບກຸ່ມຄົນ ທີ່ຈົງໃຈ ບໍ່ປະຕິບັດຕາມມາດຕະການນັ້ນ ຜູ້ຂຽນວ່າ ມັນບໍ່ແມ່ນເວລາທີ່ພວກເຮົາ ຈະຜ່ອນສັ້ນຜ່ອນຍາວກັນແລ້ວ, ພວກເຮົາ ກຳລັງແຂ່ງກັບເວລາ ຕາມກຳລັງວັງຊາ ທີ່ວ່າດ້ານງົບປະມານ, ບຸກຄະລາກອນ ພະນັກງານ ແພດໝໍ ທີ່ຮັບຜິດຊອບ ແມ່ນເປັນສິ່ງຈຳກັດທີ່ສຸດ ແລະ ພວກເຮົາ ບໍ່ສາມາດ ກາງຕໍ່ ໃສ່ການຊ່ວຍເຫຼືອຈາກພາຍນອກໃນໄລຍະຍາວອີກ ເພາະສະນັ້ນ ພວກເຮົາ ຈົ່ງເດັດຂາດ ເດັດດ່ຽວ ໃນການຫັນໜ້າໃສ່ ຕໍ່ສູ້ກັບສັດຕູກຳລັງຮຸກຮານພວກເຮົານີ້.

ຄຽງຄູ່ກັນກັບ ຄວາມສາມັກຄີປະຕິບັດ ຕາມມາດຕະການຢ່າງເຄັ່ງຄັດ ແລະໃຫ້ການຮ່ວມມືຢ່າງດີ ຂອງປະຊາຊົນນັ້ນ, ການສື່ສານຂອງ ການນຳຂັ້ນສູງ ທີ່ຊັດເຈນແຈ່ມແຈ້ງ, ໜັກແໜ້ນ ເດັດຂາດ ແລະ ເປັນປະຈຳ ຍັງແມ່ນ ປັດໄຈສຳຄັນ ທີ່ພວກເຮົາຈະສາມາດເອົາໄຊຊະນະເໜືອໄວຣັສນີ້ໄດ້.

- WhatsApp Image 2020 05 27 at 5 - ຖ້າຂາດຄວາມສາມັກຄີ ຄວາມມີໄຊ ກໍຈະບໍ່ເກີດ
- WhatsApp Image 2020 05 27 at 5 - ຖ້າຂາດຄວາມສາມັກຄີ ຄວາມມີໄຊ ກໍຈະບໍ່ເກີດ
error: Alert: ເນື້ອຫາຂ່າວມີລິຂະສິດ !!