ເກີດຫຍັງຂຶ້ນຢູ່ໄຕ້ຫວັນ-ສິງກະໂປ ແມ່ນຫຍັງຄືຊ່ອງຫວ່າງທີ່ເຮັດໃຫ້ຜູ້ຕິດເຊື້ອໂຄວິດ-19 ເພີ່ມສູງຂຶ້ນອີກ

-              1 - ເກີດຫຍັງຂຶ້ນຢູ່ໄຕ້ຫວັນ-ສິງກະໂປ ແມ່ນຫຍັງຄືຊ່ອງຫວ່າງທີ່ເຮັດໃຫ້ຜູ້ຕິດເຊື້ອໂຄວິດ-19 ເພີ່ມສູງຂຶ້ນອີກ
- AGL banner - ເກີດຫຍັງຂຶ້ນຢູ່ໄຕ້ຫວັນ-ສິງກະໂປ ແມ່ນຫຍັງຄືຊ່ອງຫວ່າງທີ່ເຮັດໃຫ້ຜູ້ຕິດເຊື້ອໂຄວິດ-19 ເພີ່ມສູງຂຶ້ນອີກ

ວັນທີ 20 ພຶດສະພາ 2021, ຫລາຍປະເທດກຳລັງຜະເຊີນສະຖານະການການແຜ່ລະບາດຂອງໂຄວິດ-19 ທີ່ມີຜູ້ຕິດເຊື້ອ ແລະ ຜູ້ເສຍຊີວິດເພີ່ມສູງຂຶ້ນຢ່າງຕໍ່ເນື່ອງ. ໄຕ້ຫວັນ ແລະ ສິງກະໂປ ທີ່ເຄີຍໄດ້ຮັບສຽງຍ້ອງຍໍຈາກບັນດາປະເທດເຖິງວິທີຮັບມືການແຜ່ລະບາດໄດ້ຢ່າງມີປະສິດທິພາບກຳລັງປະສົບບັນຫານີ້, ເກີດຫຍັງຂຶ້ນ ແມ່ນຫຍັງຄືຊ່ອງຫວ່າງທີ່ເຮັດໃຫ້ຜູ້ຕິດເຊື້ອໂຄວິດ-19 ເພີ່ມສູງຂຶ້ນອີກ.

ໄຕ້ຫວັນ ເປັນໜຶ່ງໃນປະເທດທຳອິດທີ່ປະກາດຫ້າມນັກທ່ອງທ່ຽວຕ່າງປະເທດທັນທີທີ່ທາງການຈີນລາຍງານພົບການແຜ່ລະບາດຂອງເຊື້ອໄວຣັສປິດສະໜານັບແຕ່ທ້າຍປີ 2019 ມີມາດຕະການທີ່ຮັດກຸມ ແລະ ເຂັ້ມງວດເພື່ອຈຳກັດການເດີນທາງເຂົ້າໄຕ້ຫວັນ ແລະ ຍັງນຳໃຊ້ຈົນເຖິງປັດຈຸບັນ. ຜ່ານມາທາງການໄຕ້ຫວັນສາມາດຄວບຄຸມສະຖານະການການແຜ່ລະບາດໄດ້ ຜູ້ຕິດເຊື້ອໃໝ່ເພີ່ມຂຶ້ນພຽງຫລັກໜ່ວຍຕໍ່ວັນເທົ່ານັ້ນ ບາງວັນບໍ່ພົບຜູ້ຕິດເຊື້ອໃໝ່ ປະຊາຊົນເກີດຄວາມເພິ່ງພໍໃຈໃນການເຮັດວຽກຂອງລັດຖະບານ.

ໄຕ້ຫວັນພົບຜູ້ຕິດເຊື້ອໃໝ່ສູງເຖິງ 335 ຄົນພາຍໃນວັນດຽວ (17 ພຶດສະພາ) ມີຜູ້ຕິດເຊື້ອເພີ່ມ 1.200 ກວ່າຄົນໃນໄລຍະ 1 ອາທິດນີ້ ສົ່ງຜົນໃຫ້ຍອດຜູ້ຕິດເຊື້ອສະສົມສູງເຖິງ 2.260 ຄົນ ເພີ່ມຂຶ້ນເກືອບ 2 ເທົ່າ ເມື່ອທຽບໃສ່ຈຳນວນຜູ້ຕິດເຊື້ອໃນໄລຍະເກືອບ 3 ອາທິດກ່ອນໜ້ານີ້, ເສຍຊີວິດແລ້ວ 14 ຄົນ, ປິ່ນປົວຢູ່ປະມານ 1.400 ຄົນ.

ເຖິງວ່າຈະມີມາດຕະການຕາມເຂດຊາຍແດນທີ່ຮັດກຸມ, ຈຳກັດການລວມກຸ່ມໃນພື້ນທີ່ສາທາລະນະ, ປິດສະຖາບັນການສຶກສາຊົ່ວຄາວ ລວມທັງແນະນຳໃຫ້ມີການໃສ່ຜ້າປິດປາກ-ດັງ ເພື່ອຫລຸດຄວາມສ່ຽງໃນການຕິດເຊື້ອ, ແຕ່ຜູ້ຕິດເຊື້ອໃໝ່ທີ່ເພີ່ມສູງຂຶ້ນໃນໄຕ້ຫວັນເກີດຈາກສາເຫດຫຍັງ ?.

  1. ຫລຸດຄວາມເຂັ້ມງວດ ບໍ່ກວດຫາຜູ້ຕິດເຊື້ອຢ່າງຈິງຈັງ: ຈາກຄວາມເພິ່ງພໍໃຈ ອາດປ່ຽນເປັນຄວາມໃຈເຢັນ. ຮອງສາສະດາຈານ Hsien-Ho Lin ປະຈຳມະຫາວິທະຍາໄລແຫ່ງຊາດໄຕ້ຫວັນ ເປີດເຜີຍວ່າ: ໂຮງໝໍຫລາຍແຫ່ງໃນໄຕ້ຫວັນຢຸດການກວດຫາ ແລະ ຕິດຕາມຜູ້ຕິດເຊື້ອໂຄວິດ-19 ຢ່າງຈິງຈິງ ເຖິງວ່າຜູ້ຕິດເຊື້ອຈະເດີນທາງເຂົ້າມາພົບແພດດ້ວຍອາການມີໄຂ້ ເຊິ່ງເປັນອາການທົ່ວໄປຂອງການຕິດເຊື້ອໄວຣັສ. ອີກທັງຈາກການຕິດຕາມສະຖານະການການແຜ່ລະບາດຂອງໂຄວິດ-19 ໂດຍ Our World in Data ລະບຸວ່າ: ໄຕ້ຫວັນມີອັດຕາການກວດຫາເຊື້ອພຽງ 10,32 ຕໍ່ 1.000 ເທົ່ານັ້ນ ເມື່ອທຽບໃສ່ອາເມລິກາທີ່ມີອັດຕາການກວດຫາເຊື້ອສູງເຖິງ 1.309,87 ຕໍ່ 1.000.
  2. ຜ່ອນຄາຍມາດຕະການກັກຕົວ ຈົນເກີດກຸ່ມກ້ອນຂະໜາດໃຫຍ່: ຍິ່ງໄປກວ່ານັ້ນ ທາງການໄຕ້ຫວັນໄດ້ຜ່ອນຄາຍມາດຕະການກັກຕົວໃຫ້ບັນດານັກບິນທີ່ຍັງບໍ່ໄດ້ຮັບການສັກວັກຊີນ ຈາກເບື້ອງຕົ້ນ 14 ວັນ ກາຍເປັນ 5 ວັນ ແລະ ເຫລືອພຽງ 3 ວັນ ຫລັງຈາກນັ້ນບໍ່ດົນກໍເກີດກຸ່ມກ້ອນທີ່ເຊື່ອມໂຍງກັບນັກບິນສາຍການບິນ China Airlines ທີ່ພັກຢູ່ Novotel ໃກ້ກັບສະໜາມບິນ Taoyuan Airport ເຊິ່ງຜູ້ທີ່ກ່ຽວຂ້ອງກັບກຸ່ມກ້ອນນີ້ກວດພົບການຕິດໂຄວິດ-19 ກາຍພັນ ສາຍພັນທີ່ພົບຄັ້ງທຳອິດໃນອັງກິດ (1.1.7).

ກ່ອນຈະແຜ່ລະບາດໃນເຂດສະຖານບັນເທີງຂອງໄຕ້ຫວັນໃນເວລາຕໍ່ມາ ກາຍເປັນຊຸບເປີສະເປຣດເດີ້ໃນວົງກວ້າງ. ອີກທັງຍັງມີນັກທ່ອງທ່ຽວຈຳນວນຫລາຍປົກປິດທາມລາຍ ແລະ ບໍ່ເຕັມໃຈຈະລະບຸວ່າຕົນເດີນທາງໄປເຂດສະຖານບັນເທີງດັ່ງກ່າວ ເຊິ່ງອາດຈະຍິ່ງເຮັດໃຫ້ເກີດຄວາມຍາກລຳບາກໃນການຕິດຕາມ.

ສ່ວນທ່ານ ອາເລັກ ຄຸກ ປະຈຳມະຫາວິທະຍາໄລແຫ່ງຊາດສິງກະໂປ ລະບຸວ່າ: ສະຖານະການໃນໄຕ້ຫວັນຄືພາບສະທ້ອນຄວາມສ່ຽງທີ່ເກີດຂຶ້ນຈາກຍຸດທະສາດທີ່ໃຫ້ຄວາມສຳຄັນຕໍ່ການເຂັ້ມງວດຕາມເຂດຊາຍແດນຫລາຍຈົນເກີນໄປ ແລະ ບໍ່ມີມາດຕະການພຽງພໍທີ່ຈະປ້ອງກັນການແຜ່ລະບາດພາຍໃນປະເທດຂອງຕົນໄດ້.

ຂະນະທີ່ ສິງກະໂປ ເປັນໜຶ່ງໃນປະເທດທີ່ຂຶ້ນຊື່ເລື່ອງກົດລະບຽບ ແລະ ຄວາມເຂັ້ມງວດຂອງມາດຕະການຮັບມືໂຄວິດ-19 ໃນເຂດອາຊຽນ ເຖິງວ່າຈະຢູ່ໃນຊ່ວງທີ່ຜູ້ຕິດເຊື້ອໃໝ່ໃນສິງກະໂປຈະຢູ່ໃນເກນຕໍ່າກໍຕາມ, ທາງການຈຳກັດການລວມກຸ່ມໃນພື້ນທີ່ສາທາລະນະໄດ້ບໍ່ເກີນ 8 ຄົນ ພ້ອມສັ່ງປິດເທັກ ແລະ ສະຖານບັນເທີງຕ່າງໆຊົ່ວຄາວ.

ການບໍລິຫານໃນສະໜາມບິນມີຊ່ອງຫວ່າງ ສົ່ງຜົນໃຫ້ເກີດການແຜ່ລະບາດຄັ້ງໃຫຍ່ ທີ່ມີສ່ວນກ່ຽວຂ້ອງກັບສະໜາມບິນ Changi Airport ມີຜູ້ຕິດເຊື້ອໃໝ່ເພີ່ມຢ່າງໜ້ອຍ 248 ຄົນໃນໄລຍະ 1 ອາທິດຜ່ານມາ ສົ່ງຜົນໃຫ້ຍອດຜູ້ຕິດເຊື້ອສະສົມມີ 61.651 ຄົນ, ເສຍຊີວິດແລ້ວ 31 ຄົນ, ປິ່ນປົວຢູ່ 500 ຄົນ.

ທາງການລະບຸວ່າ: ຜູ້ຕິດເຊື້ອສ່ວນຫລາຍເປັນເຈົ້າໜ້າທີ່ສະໜາມບິນທີ່ເຮັດວຽກໃນພື້ນທີ່ທີ່ຕ້ອງກ່ຽວຂ້ອງກັບນັກທ່ອງທ່ຽວທີ່ເດີນທາງມາຈາກປະເທດກຸ່ມສ່ຽງທີ່ພົບການແຜ່ລະບາດຂອງໂຄວິດ-19 ຢ່າງໜັກ ໂດຍສະເພາະກຸ່ມປະເທດໃນເຂດອາຊີໃຕ້. ອີກທັງເຈົ້າໜ້າທີ່ບາງຄົນເດີນທາງໄປຮັບປະທານອາຫານຢູ່ສູນອາຫານໃນສະໜາມບິນທີ່ເປີດຕ້ອນຮັບປະຊາຊົນທົ່ວໄປ ສົ່ງຜົນໃຫ້ເກີດການແຜ່ກະຈາຍຂອງເຊື້ອຫລາຍຍິ່ງຂຶ້ນໄປອີກ ຈົນທາງການສິງກະໂປມີຄຳສັ່ງຫ້າມປະຊາຊົນທົ່ວໄປເຂົ້າໄປບາງພື້ນທີ່ໃນສະໜາມບິນ ແລະ ແຍກພື້ນທີ່ສຳລັບເຈົ້າໜ້າທີ່ ແລະ ຜູ້ທີ່ເດີນທາງມາຈາກປະເທດກຸ່ມສ່ຽງຢ່າງຊັດເຈນ ກ່ອນຈະກວດພົບຜູ້ຕິດເຊື້ອໂຄວິດ-19 ກາຍພັນ ສາຍພັນທີ່ພົບຄັ້ງທຳອິດໃນອິນເດຍ (B.1.6.1.7).

- Wave100S AD to Website 2020 0 - ເກີດຫຍັງຂຶ້ນຢູ່ໄຕ້ຫວັນ-ສິງກະໂປ ແມ່ນຫຍັງຄືຊ່ອງຫວ່າງທີ່ເຮັດໃຫ້ຜູ້ຕິດເຊື້ອໂຄວິດ-19 ເພີ່ມສູງຂຶ້ນອີກ

ໂດຍນັກວິຊາການດ້ານສາທາລະນະສຸກຍັງເຊື່ອວ່າ: ສິງກະໂປຍັງຢູ່ໃນຈຸດຈະສາມາດຄວບຄຸມສະຖານະການການແຜ່ລະບາດໄດ້ອີກ, ພ້ອມຊີ້ວ່າ: ຜູ້ຕິດເຊື້ອໃໝ່ທີ່ເພີ່ມສູງຂຶ້ນນັ້ນເປັນສິ່ງທີ່ຫລີກລ່ຽງບໍ່ໄດ້ ເນື່ອງຈາກສິງກະໂປເປັນຮັບທາງດ້ານການຄ້າທີ່ສຳຄັນ, ການປິດຊາຍແດນປະເທດຢ່າງສົມບູນຄືຈີນຈຶ່ງເປັນສິ່ງທີ່ເຮັດໄດ້ຍາກ.

ທັງໄຕ້ຫວັນ ແລະ ສິງກະໂປຕ່າງກຳລັງຜະເຊີນບັນຫາດຽວກັນຄື: ວັກຊີນມີບໍ່ພຽງພໍຕໍ່ການສັກໃຫ້ພົນລະເມືອງໃນປະເທດ ອີກທັງພົນລະເມືອງບາງສ່ວນ ໂດຍສະເພາະໃນໄຕ້ຫວັນຍັງບໍ່ໝັ້ນໃຈ ຫລື ຍັງມີຄຳຖາມກ່ຽວກັບຄວາມປອດໄພ ແລະ ປະສິດທິພາບຂອງວັກຊີນໂຄວິດ-19 ທີ່ລັດຈັດຫາມາໃຫ້ຢູ່.

ທາງການໄຕ້ຫວັນອະນຸມັດການໃຊ້ວັກຊີນໂຄວິດ-19 ຈາກ AstraZeneca ແລ້ວ ສັກວັກຊີນຕ້ານໂຄວິດ-19 ແລ້ວ ຍັງບໍ່ເຖິງ 2,5 ແສນໂດສ ມີຊາວໄຕ້ຫວັນ 32.389 ຄົນ ເຂົ້າຮັບວັກຊີນແລ້ວຢ່າງໜ້ອຍ 1 ໂດສ (16 ພຶດສະພາ) ຫລື 0,1% ຈາກປະຊາກອນທັງໝົດ 23,82 ລ້ານຄົນ. ຂະນະທີ່ສິງກະໂປອະນຸມັດການໃຊ້ວັກຊີນໂຄວິດ-19 ຈາກ Pfizer ແລະ Moderna ແລ້ວ ນັບແຕ່ທ້າຍປີ 2020 ຜ່ານມາ ສັກວັກຊີນໂຄວິດ-19 ແລ້ວ 3,41 ລ້ານໂດສ (17 ພຶດສະພາ) ຊາວສິງກະໂປປະມານ 1 ໃນ 3 ເຂົ້າຮັບວັກຊີນແລ້ວຢ່າງໜ້ອຍ 1 ໂດສ. ຂະນະທີ່ປະມານ 24,6% ຫລື ເກືອບ 1 ໃນ 4 ຂອງປະຊາກອນທັງໝົດ 5,85 ລ້ານຄົນເຂົ້າຮັບວັກຊີນຄົບໂດສແລ້ວ.

ການຕັ້ງກາດໃຫ້ໝັ້ນ ກຽມວິທີການຮັບມືຖ້າເກີດສະຖານະການສຸກເສີນ ລວມທັງການສ້າງຄວາມເຊື່ອໝັ້ນ ແລະ ລະບຽບວິໄນໃຫ້ປະຊາຊົນ ແລະ ທຸກພາກສ່ວນໃນສັງຄົມຖືເປັນສິ່ງຈຳເປັນ ໂດຍສະເພາະໃນຍຸກ New Normal ທີ່ຮູບແບບການດຳລົງຊີວິດຂອງຄົນຈະປ່ຽນໄປ ທ່າມກາງການແຜ່ລະບາດຂອງພະຍາດທີ່ຍັງດຳເນີນໄປຢ່າງຕໍ່ເນື່ອງ.

ອ້າງອີງ:

- WhatsApp Image 2020 05 27 at 5 - ເກີດຫຍັງຂຶ້ນຢູ່ໄຕ້ຫວັນ-ສິງກະໂປ ແມ່ນຫຍັງຄືຊ່ອງຫວ່າງທີ່ເຮັດໃຫ້ຜູ້ຕິດເຊື້ອໂຄວິດ-19 ເພີ່ມສູງຂຶ້ນອີກ
- WhatsApp Image 2020 05 27 at 5 - ເກີດຫຍັງຂຶ້ນຢູ່ໄຕ້ຫວັນ-ສິງກະໂປ ແມ່ນຫຍັງຄືຊ່ອງຫວ່າງທີ່ເຮັດໃຫ້ຜູ້ຕິດເຊື້ອໂຄວິດ-19 ເພີ່ມສູງຂຶ້ນອີກ
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: ເນື້ອຫາຂ່າວມີລິຂະສິດ !!