ການຕ້ານໂຄວິດ-19 ແມ່ນພາລະກິດຂອງທົ່ວປວງຊົນ

- screenshot 20200507 1233242753878116009684116 1024x617 1 - ການຕ້ານໂຄວິດ-19 ແມ່ນພາລະກິດຂອງທົ່ວປວງຊົນ
- AGL banner - ການຕ້ານໂຄວິດ-19 ແມ່ນພາລະກິດຂອງທົ່ວປວງຊົນ

ໂດຍ: ທິດກໍ່າ

ມາຮອດໄລຍະປັດຈຸບັນ, ເຮົາເຫັນວ່າສະພາບການແຜ່ລະບາດຂອງພະຍາດໂຄວິດ-19 ໄດ້ແຜ່ກະຈາຍໄປເກືອບທົ່ວທຸກແຂວງໃນທົ່ວປະເທດ, ສ່ວນແຂວງທີ່ຍັງປອດບໍ່ທັນມີຄົນຕິດເຊື້ອນັ້ນ ກໍຍັງພຽງ 3 ແຂວງ ຄືແຂວງຫົວພັນ, ໄຊສົມບູນ ແລະ ອັດຕະປື. ເມື່ອຕັ້ງໂຈດກັນວ່າ ສາເຫດທີ່ພາໃຫ້ມີການແຜ່ລະບາດໜັກໃນຮອບໃໝ່ນີ້ແມ່ນຍ້ອນຫຍັງ ? ຕາມທິດກໍ່າວ່າ ກໍເນື່ອງມາຈາກຄົນລາວເຮົາໄດ້ນຳເອົາເຊື້ອພະຍາດດັ່ງກ່າວຈາກພາຍນອກເຂົ້າມາໃນປະເທດ ໃນນີ້ກໍມີ 2 ປັດໄຈຫລັກໆຄື: ອັນທີໜຶ່ງ ແມ່ນມາຈາກກຸ່ມຂອງນາງ ຕິນ່າ ທີ່ໄດ້ນຳເອົາເຊື້ອຈາກໄທເຂົ້າມາແຜ່ກະຈາຍກ່ອນຮອດມື້ສະຫລອງປີໃໝ່ລາວ ພສ 2564, ສ່ວນປັດໄຈອັນທີສອງ ແມ່ນມາຈາກແຮງງານລາວທີ່ໄດ້ນຳເຂົ້າມາຈາກປະເທດໄທເປັນສ່ວນຫລາຍ. ຈາກສອງປັດໄຈນີ້ຈຶ່ງເປັນເຫດໃຫ້ມີການແຜ່ລະບາດຂອງພະຍາດໂຄວິດ-19 ໃນຮອບໃໝ່ໄດ້ແຜ່ກະຈາຍໄປຢ່າງກວ້າງຂວາງໃນທົ່ວປະເທດ.
ແຕ່ແນວໃດກໍຕາມ, ສະເພາະແຫລ່ງທີ່ມາຈາກແຮງງານລາວນຳເຂົ້ານັ້ນ ສ່ວນຫລາຍພວກເຮົາກໍສາມາດຈຳກັດບໍລິເວນ ພ້ອມທັງໄດ້ຜ່ານການກວດກາ, ຄັດກອງ ແລະ ກັກບໍລິເວນຢູ່ສູນກັກກັນຄົບກຳນົດ 14 ວັນ ຕາມມາດຕະຖານ. ອີງໃສ່ສະພາບການແຜ່ລະບາດໃນຮອບໃໝ່ຄັ້ງນີ້ ໃນເບື້ອງຕົ້ນເຫັນວ່າຜູ້ຕິດເຊື້ອແມ່ນສູງເຖິງ 118 ຄົນໃນວັນດຽວ, ແຕ່ມາຮອດປັດຈຸບັນແມ່ນຫລຸດລົງມາຢູ່ໃນລະດັບແຕ່ 20 ຫາ 40 ຄົນ ໂດຍສະເລ່ຍແຕ່ລະວັນ. ດັ່ງໃນວັນທີ 18 ພຶດສະພາ 2021 ຜ່ານມາ ແມ່ນມີຄົນຕິດເຊື້ອໂຄວິດ-19 ພຽງ 49 ຄົນ. ສະແດງວ່າຫລຸດລົງມາເຖິງ 50% ແລ້ວ.
ເຖິງຢ່າງໃດກໍດີ, ສິ່ງທີ່ໜ້າເປັນຫ່ວງໃນປັດຈຸບັນນີ້ ຍັງເຫັນວ່າມີຫລາຍບ້ານ, ຫລາຍເມືອງ ໂດຍສະເພາະໃນນະຄອນຫລວງວຽງຈັນມີບຸກຄົນ, ກຸ່ມຄົນຈຳນວນບໍ່ໜ້ອຍຍັງຖືເບົາຕໍ່ການກັກກັນຕົນເອງຢູ່ບ້ານຢູ່ເຮືອນ, ຍິ່ງໄປກວ່ານັ້ນ ຍັງເຫັນຈັບກຸ່ມຊຸມແຊວກັນກິນເຂົ້າ, ກິນເຫລົ້າກິນເບຍ ອັນຈະເປັນສາເຫດໜຶ່ງໃນການຕິດເຊື້ອ ແລະ ແຜ່ເຊື້ອຢ່າງເປັນພວງພະນັງ. ນອກຈາກນັ້ນ ກໍເປັນການຝືນກັບກົດຫ້າມຂອງຂັ້ນເທິງ ແລະ ຄະນະສະເພາະກິດ ກໍຄືຫລັກວິຊາການທາງການແພດຢ່າງໃຫຍ່ຫລວງ ແລະ ອັນຕະລາຍທີ່ສຸຸດ. ຕໍ່ບັນຫາດັ່ງກ່າວນີ້, ທາງແພດໝໍທີ່ເພິ່ນປິ່ນປົວໄດ້ບອກເຕືອນມາວ່າ: ຖ້າພວກເຮົາຍັງຖືເບົາ ແລະ ພາກັນຈັດຕັ້ງກຸ່ມແກ້ງຊຸມແຊວແບບບໍ່ເກງກົວ ແລະ ບໍ່ຢ້ານກົວຄືແນວນີ້ ແນ່ນອນຄວາມສ່ຽງໃນການຕິດເຊື້ອ ແລະ ແຜ່ເຊື້ອນັ້ນຈະມີສູງ ຈົນເຖິງຂັ້ນລົ້ນໂຮງໝໍ, ແພດໝໍຜູ້ປິ່ນປົວກໍຈະຮັບບໍ່ໄຫວ ຍ້ອນເຫລັກຫລາຍກວ່າຖ່ານ. ນອກຈາກນັ້ນ ເຄື່ອງມື, ອຸປະກອນໃນການປິ່ນປົວກໍຈະບໍ່ພຽງພໍ ສຸດທ້າຍມາກໍປະປ່ອຍກັນຕາຍຄືສັດເດຍລະສານດັ່ງເຮົາເຫັນໃນຫລາຍປະເທດທີ່ເຄີຍປະສົບພົບພໍ້ມາແລ້ວ.
ເພາະສະນັ້ນ, ມາຮອດປັດຈຸບັນ ພວກເຮົາຄົນລາວໂດຍລວມ, ເວົ້າສະເພາະແມ່ນຜູ້ມັກກິນມັກດື່ມ, ມັກກ໊ອກທັງຫລາຍ ຂໍໃຫ້ອົດເອົາ. ໄປຄຽງຄູ່ກັນນັ້ນ ຕ້ອງພ້ອມກັນເປັນເຈົ້າການປະຕິບັດບັນດາຂໍ້ກຳນົດກົດລະບຽບໃນການກັກກັນຕົນເອງຢູ່ບ້ານຢູ່ເຮືອນໃຫ້ເຂັ້ມງວດ ແລະ ເດັດຂາດ. ອີກປະການໜຶ່ງ ຜູ້ໃດບໍ່ທັນໄປສັກຢາວັກຊີນປ້ອງກັນໂຄວິດ-19 ກໍໃຫ້ຂ້ຽວໄປ ເພື່ອຮັກສາຊີວິດອິນຊີຂອງຕົນເອງ ແລະ ທັງໝົດທຸກຄົນໃນຄອບຄົວ. ພາລະກິດຕ້ານໂຄວິດ-19 ເປັນຂອງທົ່ວປວງຊົນ ຈຶ່ງຈະສາມາດຢັບຢັ້ງການແຜ່ລະບາດພະຍາດຮ່າກ້ອມນີ້ໄດ້ໂດຍໄວ.

- Wave100S AD to Website 2020 0 - ການຕ້ານໂຄວິດ-19 ແມ່ນພາລະກິດຂອງທົ່ວປວງຊົນ
- WhatsApp Image 2020 05 27 at 5 - ການຕ້ານໂຄວິດ-19 ແມ່ນພາລະກິດຂອງທົ່ວປວງຊົນ
- WhatsApp Image 2020 05 27 at 5 - ການຕ້ານໂຄວິດ-19 ແມ່ນພາລະກິດຂອງທົ່ວປວງຊົນ
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: ເນື້ອຫາຂ່າວມີລິຂະສິດ !!