ເລັ່ງສັກຢາວັກຊີນຄືທາງອອກເພື່ອໜີພົ້ນໂຄວິດ-19

- AGL banner - ເລັ່ງສັກຢາວັກຊີນຄືທາງອອກເພື່ອໜີພົ້ນໂຄວິດ-19

ໂດຍ: ທິດກໍ່າ
ຕອນພະຍາດໂຄວິດ-19 ເລີ່ມແຜ່ລະບາດໃໝ່ໆ ຖືວ່າໃນໂລກນີ້ບໍ່ທັນມີປະເທດໃດສາມາດຜະລິດຢາປົວ ຫລືວ່າມາຕ້ານອາການຜູ້ທີ່ຕິດເຊື້ອພະຍາດນີ້ໄດ້ຢ່າງຂາດຕົວ. ດ້ວຍສາເຫດດັ່ງກ່າວ ຈຶ່ງເຮັດໃຫ້ມີຜູ້ຕິດເຊື້ອໃນທົ່ວໂລກຕາຍໄປຫລາຍລ້ານຄົນ. ໃນເບື້ອງຕົ້ນ ປະເທດທີ່ປະສົບບັນຫາໜັກໜ່ວງກວ່າໝູ່ກໍແມ່ນປະເທດຈີນ, ອິຕາລີ, ຕໍ່ມາກໍລາມໄປຮອດອາເມລິກາ, ອິນເດຍ ແລະ ລາມໄປໃນປະເທດອື່ນໆໃນທົ່ວໂລກ. ຈົນມາຮອດໄລຍະປັດຈຸບັນໄດ້ມີຜູ້ຕິດເຊື້ອໃນທົ່ວໂລກເຖິງ 165 ລ້ານ 5 ແສນກວ່າຄົນ. ໃນຈຳນວນທີ່ກ່າວມານີ້ໄດ້ມີຜູ້ເສຍຊີວິດໄປແລ້ວ 3 ລ້ານ 4 ແສນກວ່າຄົນ ແລະ ປິ່ນປົວໃຫ້ຫາຍດີທັງໝົດ 145 ລ້ານກວ່າຄົນ. ປະເທດທີ່ຕິດອັນດັບນຳໜ້າຜູ້ຕິດເຊື້ອຫລາຍກວ່າໝູ່ກໍຍັງແມ່ນສະຫະລັດອາເມລິກາ, ອິນເດຍ, ບຣາຊິນ, ຝຣັ່ງ ແລະ ປະເທດອື່ນໆຕາມລຳດັບ. ສຳລັບ ສປປ ລາວຂອງພວກເຮົາ ມາຮອດວັນທີ 20 ພຶດສະພາ 2021 ໄດ້ມີຜູ້ຕິດເຊື້ອທັງໝົດ 1.751 ຄົນ, ປິ່ນປົວຫາຍດີໄປແລ້ວ 740 ຄົນ, ກຳລັງປິ່ນປົວຢູ່ໂຮງໝໍ 1.009 ຄົນ ແລະ ເສຍຊີວິດ 2 ຄົນ.
ແຕ່ແນວໃດກໍຕາມ, ມາຮອດໄລຍະນີ້ ໄດ້ມີຫລາຍປະເທດມີຄວາມສາມາດຜະລິດວັກຊີນເພື່ອມາຕ້ານກັບພະຍາດຊະນິດນີ້ໄດ້ເປັນຢ່າງດີ ທັງມີຄຸນນະພາບໃນລະດັບ 80 ຫາ 90% ຂຶ້ນໄປ ເປັນຕົ້ນສະຫະລັດອາເມລິກາ, ອັງກິດ, ຣັດເຊຍ, ອິນເດຍ, ເຢຍລະມັນ ເຫລົ່ານີ້ເປັນຕົ້ນ. ມາຮອດປັດຈຸບັນໄດ້ມີຫລາຍປະເທດໃນທົ່ວໂລກສາມາດເຂົ້າເຖິງຈຳນວນຫລາຍລ້ານຄົນແລ້ວ ໂດຍສະເພາະປະເທດທີ່ມີການພັດທະນາສາມາດຜະລິດເອງກໍຍິ່ງໄດ້ເຂົ້າເຖິງກ່ອນໝູ່ ແລະ ມີຈຳນວນຫລາຍກວ່າໝູ່. ສ່ວນ ສປປ ລາວເຮົາ ມາຮອດໄລຍະນີ້ກໍພວມປຸກລະດົມກັນໄປສັກໃຫ້ໄດ້ຫລາຍເທົ່າທີ່ຈະຫລາຍໄດ້. ຕາມແຜນຄາດກະແມ່ນໝົດປີ 2021 ຈະໃຫ້ມີຜູ້ເຂົ້າເຖິງວັກຊີນ 50% ຂອງຈຳນວນພົນລະເມືອງທັງໝົດໃນທົ່ວປະເທດ.
ແນວໃດກໍດີ, ສິ່ງທີ່ປະຊາຊົນບາງຄົນ, ບາງກຸ່ມຍັງລັ່ງເລໃຈນັ້ນ ເມື່ອສັກໄປແລ້ວຢ້ານມີຜົນຂ້າງຄຽງຕາມມາ ເປັນຕົ້ນແມ່ນສັກຢາໄປແລ້ວຢ້ານຕາຍຖວາຍຊີວິດນຳຢາວັກຊີນ, ແຕ່ທາງເບື້ອງແພດໝໍເພິ່ນກໍຢືນຢັນຕາມຫລັກວິຊາການວ່າ: ບໍ່ເປັນຫຍັງ ນັ້ນເປັນພຽງຂ່າວຊ່າລື ມັນບໍ່ແມ່ນຄວາມຈິງ ເພາະສັກຜ່ານມາມີຫລາຍແສນຫລາຍລ້ານຄົນຍັງບໍ່ທັນມີໃຜຕາຍຍ້ອນ ເພາະຢາແຕ່ລະຊະນິດມີການວິເຄາະໃຊ້ຕາມອາຍຸກະສຽນ ແລະ ອີງໃສ່ພະຍາດຕິດຕົວຂອງແຕ່ລະຄົນ. ຕົວຢ່າງ ກ່ອນແພດໝໍເພິ່ນຈະສັກວັກຊີນໃຫ້ແຕ່ລະຄົນແມ່ນຕ້ອງໄດ້ກວດກາສຸຂະພາບຢ່າງລະອຽດ, ຜູ້ໃດສົມຄວນສັກ ແລະ ຜູ້ໃດໂຈະ ຫລື ຍົກເວັ້ນ, ເພິ່ນບໍ່ໄດ້ເຮັດສຸມສີ່ສຸມຫ້າຄືເຮົາຄິດ.
ເຖິງຢ່າງໃດກໍດີ, ມາຮອດໄລຍະປັດຈຸບັນນີ້ ຂະບວນສັກວັກຊີນເພື່ອປ້ອງກັນໂຣກໂຄວິດ-19 ຢູ່ປະເທດຂອງພວກເຮົາແມ່ນພວມດຳເນີນໄປຢ່າງຈົດຈໍ່ເຄັ່ງຮ້ອນ. ຄາດກະວ່າໃຫ້ເປັນໄປຕາມແຜນຂອງລັດຖະບານວາງອອກຢ່າງແນ່ນອນ. ສິ່ງທີ່ພວກເຮົາມີຄວາມຫວັງໃນອະນາຄົດນັ້ນ ເມືອທຸກຄົນ ຫລື ທຸກເປົ້າໝາຍໄດ້ສັກວັກຊີນແລ້ວ ພວກເຮົາກໍຈະມີໂອກາດໄດ້ທຳມາຫາກິນຕາມປົກກະຕິ. ຕໍ່ຈາກນັ້ນພວກເຮົາກໍມີແຕ່ພ້ອມກັນເປັນເຈົ້າການເຝົ້າລະວັງຫາວິທີຕ້ານບໍ່ໃຫ້ເຊື້ອພະຍາດໂຄວິດ-19 ກັບມາລາມພະລາມຈົວອີກ. ດັ່ງທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ເວົ້າວ່າ: “ຕ້ອງຖືເອົາການຕ້ານສະກັດກັ້ນເປັນບັນຫາຕົ້ນຕໍ ບໍ່ເຮັດເດັດຂາດ ຕິດຈຶ່ງພາກັນມາປິ່ນປົວ”.

- Wave100S AD to Website 2020 0 - ເລັ່ງສັກຢາວັກຊີນຄືທາງອອກເພື່ອໜີພົ້ນໂຄວິດ-19
- WhatsApp Image 2020 05 27 at 5 - ເລັ່ງສັກຢາວັກຊີນຄືທາງອອກເພື່ອໜີພົ້ນໂຄວິດ-19
- WhatsApp Image 2020 05 27 at 5 - ເລັ່ງສັກຢາວັກຊີນຄືທາງອອກເພື່ອໜີພົ້ນໂຄວິດ-19
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: ເນື້ອຫາຂ່າວມີລິຂະສິດ !!