ນ້ຳອັດລົມມີນ້ຳຕານກັບບໍ່ມີນ້ຳຕານ ແບບໃດອັນຕະລາຍກ່ວາກັນ ?
ນ້ຳອັດລົມທີ່ມີການປະສົມແຮ່ທາດວິຕາມິນຕ່າງໆນັ້ນບໍ່ໄດ້ຊ່ວຍໃຫ້ດີຕໍ່ສຸຂະພາບຫລາຍກ່ວາເກົ່າດັ່ງທີ່ໂຄສະນາ. ສຳລັບຄົນສ່ວນຫລາຍບໍ່ຈຳເປັນຕ້ອງໄດ້ຮັບແຮ່ທາດ ຫລື ວິຕາມິນເພີ່ມຕື່ມຈາກນ້ຳອັດລົມ ເພາະສານອາຫານທີ່ຜູ້ຜະລິດເພີ່ມເຂົ້າໄປມັກບໍ່ແມ່ນສານອາຫານທີ່ຮ່າງກາຍບໍ່ໄດ້ຮັບພຽງພໍຈາກອາຫານ ເຊັ່ນ : ທາດການຊຽມ, ວິຕາມິນ D, ໂຟເລດ ຫລື ໂປຕັສຊຽມ. ສ່ວນການດື່ມນ້ຳອັດລົມທີ່ໃຊ້ສານໃຫ້ຄວາມຫວານແທນນ້ຳຕານຈະສົ່ງຜົນເສຍຕໍ່ສຸຂະພາບໜ້ອຍກ່ວານ້ຳອັດລົມທີ່ມີນ້ຳຕານແທ້ຫລືບໍ່ນັ້ນ ປັດຈຸບັນຍັງມີຄວາມຄຸມເຄືອຢູ່ຫລາຍ ແລະ ບໍ່ສາມາດສະຫລຸບໄດ້ຢ່າງຈະແຈ້ງ ເພາະເຖິງວ່ານ້ຳອັດລົມທີ່ບໍ່ມີນ້ຳຕານນັ້ນໜ້າຈະຊ່ວຍຫລຸດຄວາມສ່ຽງຕໍ່ພະຍາດຕຸ້ຍ ຫລື ພະຍາດເບົາຫວານລົງໄປ, ແຕ່ກໍມີການສຶກສາພຽງເລັກໜ້ອຍທີ່ຢັ້ງຢືນຂໍ້ສັນນິຖານດັ່ງກ່າວ. ນອກຈາກນີ້, ການສຶກສາໜຶ່ງໃນປີ 2008 ພົບວ່າຜູ້ທີ່ດື່ມນ້ຳອັດລົມບໍ່ມີນ້ຳຕານພຽງມື້ລະ 1 ກະປ໋ອງ ມີໂອກາດສ່ຽງຕໍ່ການເກີດຄວາມຕຸ້ຍລົງພຸງ ລວມເຖິງການມີນ້ຳໜັກເກີນ ແລະ ລະດັບນ້ຳຕານໃນເລືອດທີ່ສູງ ເຊິ່ງປັດໄຈເຫລົ່ານີ້ລ້ວນອາດນໄປສູ່ການເກີດພະຍາດເບົາຫວານໄດ້ໃນທີ່ສຸດ. ການທົດລອງໃຫ້ດື່ມນ້ຳອັດລົມທີ່ມີນ້ຳຕານ ແລະ ບໍ່ມີນ້ຳຕານ ຜົນຮັບຫລັງຈາກຜ່ານໄປ 1 ປີ ເຖິງຈະພົບວ່າກຸ່ມທີ່ດື່ມນ້ຳອັດລົມບໍ່ມີນ້ຳຕານມີນ້ຳໜັກຫລຸດລົງເລັກໜ້ອຍ, ແຕ່ເມື່ອຜ່ານໄປ 2 ປີ ຊ້ຳບໍ່ພົບຄວາມແຕກຕ່າງຂອງນ້ຳໜັກໂຕລະຫ່ວາງທັງສອງກຸ່ມຫລາຍພໍປານໃດ.
ແນວໃດກໍຕາມ, ຜູ້ຊ່ຽວຊານສ່ວນຫລາຍລົງຄວາມເຫັນວ່າ ຫາກປຽບທຽບກັນແລ້ວເຄື່ອງດື່ມນ້ຳອັດລົມທີ່ມີກາລໍຣີຕ່ຳ ຫລື ບໍ່ມີກາລໍຣີຍ່ອມດີກ່ວາເຄື່ອງດື່ມນ້ຳອັດລົມປົກກະຕິທີ່ມີສ່ວນປະສົມຂອງນ້ຳຕານ ຫາກດື່ມໃນປະລິມານທີ່ພໍດີ ໂດຍບໍ່ໃຊ້ເປັນຂໍ້ອ້າງເພື່ອທີ່ຈະກິນອາຫານທີ່ມີກາລໍຣີສູງຊະນິດອື່ນໆໄດ້ຫລາຍຂຶ້ນ.
ຄວບຄຸມການດື່ມນ້ຳອັດລົມເພື່ອສຸຂະພາບທີ່ດີ : ຍ້ອນຄວາມຈິງທີ່ວ່ານ້ຳອັດລົມທັງທີ່ມີນ້ຳຕານ ຫລື ບໍ່ມີນ້ຳຕານ ລ້ວນແຕ່ບໍ່ດີຕໍ່ສຸຂະພາບປານໃດ ສຳລັບຜູ້ທີ່ຕິດນ້ຳອັດລົມ ການເອົາຊະນະຄວາມຢາກ ແລະ ຄວາມກະຫາຍອາດເປັນເລື່ອງຍາກ ຕໍ່ໄປນີ້ເປັນແນວທາງໃນການຫລຸດນ້ຳອັດລົມຢ່າງໄດ້ຜົນທີ່ສາມາດເຮັດຕາມຢ່າງຄ່ອຍເປັນຄ່ອຍໄປໄດ້.
- ຄ່ອຍໆປ່ຽນຈາກນ້ຳອັດລົມທີ່ມີນ້ຳຕານເປັນນ້ຳອັດລົມຊະນິດບໍ່ມີນ້ຳຕານ ເຊິ່ງແນ່ນອນວ່ານ້ຳອັດລົມທີ່ບໍ່ມີນ້ຳຕານນັ້ນບໍ່ແມ່ນທາງເລືອກທີ່ດີສຸດ, ແຕ່ກໍມີຄວາມສ່ຽງຕໍ່ພະຍາດຕຸ້ຍໜ້ອຍກ່ວາ.
- ຄ່ອຍໆຫລຸດປະລິມານການດື່ມ ໂດຍເລືອກເຄື່ອງດື່ມຊະນິດອື່ນໆທົດແທນ ຈາກທີ່ເຄີຍດື່ມນ້ຳອັດລົມທີ່ມີນ້ຳຕານ ຫລື ບໍ່ມີນ້ຳຕານມື້ລະ 1 ກະປ໋ອງ ເຊິ່ງເຄື່ອງດື່ມທີ່ດີ ແລະ ເປັນທຳມະຊາດທີ່ສຸດກໍຄື ນ້ຳດື່ມບໍລິສຸດ ຫລື ວ່າຈະເລືອກດື່ມນ້ຳໝາກໄມ້ 100% ຫລື ນົມໄຂມັນຕ່ຳມື້ລະ 1 ຈອກກໍດີຕໍ່ສຸຂະພາບຄືກັນ.
- ຫາກຮູ້ສຶກຢາກເຄື່ອງດື່ມທີ່ມີລົດຊາດຄືນ້ຳອັດລົມຫລາຍໆໃຫ້ລອງດື່ມໂຊດາປະສົມກັບສານແຕ່ງລົດຊາດທີ່ບໍ່ມີກາລໍຣີ.
- ເມື່ອຕ້ອງການກາເຟອີນ ການດື່ມຊາ ຫລື ກາເຟໂດຍເພີ່ມນ້ຳຕານພຽງເລັກໜ້ອຍຍ່ອມເປັນທາງເລືອກທີ່ດີກ່ວາ.
- ເຄື່ອງດື່ມເກືອແຮ່ທັງຫລາຍບໍ່ແມ່ນວ່າຈະດີກ່ວານ້ຳອັດລົມ ເນື່ອງຈາກອາດມີປະລິມານອານກໍຮໍທຽບເທົ່າໄດ້ກັບນ້ຳອັດລົມ ຫາກເປັນການອອກກຳລັງກາຍທີ່ບໍ່ໜັກໜ່ວງ ການດື່ມພຽງນ້ຳດື່ມບໍລິສຸດຖືວ່າພຽງພໍແລ້ວ, ແຕ່ຫາກເລືອກຊື້ເຄື່ອງດື່ມປະເພດນີ້ໃຫ້ອ່ານສະຫລາກໂພຊະນາການປຽບທຽບປະລິມານອານກໍຮໍ ແລະ ນ້ຳຕານກ່ອນຕັດສິນໃຈຊື້.
