ວັດທະນະທຳການເຮັດວຽກ 8 ຊົ່ວໂມງໄດ້ມາຈາກໃສ ?

- advert banner 728 90 728x90 - ວັດທະນະທຳການເຮັດວຽກ 8 ຊົ່ວໂມງໄດ້ມາຈາກໃສ ?

ການເຮັດວຽກມື້ລະ 8 ຊົ່ວ ໂມງເປັນມາດຕະຖານທີ່ບໍລິສັດທົ່ວໂລກເອົາມາໃຊ້ເພື່ອໃຫ້ພະນັກງານ ຫລື ແຮງງານຮູ້ສຶກຜ່ອນ ຄາຍ ແລະ ບໍ່ເຮັດວຽກໜັກຫລາຍຈົນເກີນໄປ.

ໜຶ່ງໃນກິດຈະວັດທີ່ມະນຸດທຸກຄົນຕ້ອງເຮັດໃນແຕ່ລະມື້ ແມ່ນການເຮັດວຽກຢ່າງໜ້ອຍທີ່ສຸດແມ່ນມື້ລະ 8 ຊົ່ວໂມງ ເຊິ່ງເປັນ ມາດຕະຖານສາກົນທີ່ຫລາຍບໍລິສັດທົ່ວໂລກເອົາມາໃຊ້ ເພື່ອສ້າງ ບັນຍາກາດຜ່ອນຄາຍ ໃຫ້ພະນັກ ງານຮູ້ສຶກວ່າບໍ່ເຮັດວຽກໜັກຈົນເກີນໄປ ຈຶ່ງນຳມາສູ່ຄຳຖາມທີ່ມະນຸດເງິນເດືອນ ຫລື ແຮງງານທົ່ວໄປເປັນຫຍັງຕ້ອງເຮັດວຽກມື້ລະ 8 ຊົ່ວໂມງ ແລະ ມາດຕະຖານນີ້ມາຈາກໃສ ?

ໃນຍຸກປະຕິວັດອຸດສາຫະກຳສັດຕະວັດທີ 19 ແຮງງານຈຳນວນຫລາຍມີຄຸນນະພາບຊີວິດທີ່ລຳບາກ ໃນແຕ່ລະມື້ພວກເຂົາ ຕ້ອງເຮັດວຽກຫລາຍກ່ວາ 16 ຊົ່ວໂມງ ບາງເທື່ອກໍນອນໃນໂຮງງານ ເພື່ອຜະລິດສິນຄ້າໃຫ້ທັນກັບຄວາມຕ້ອງການຂອງຕະຫລາດໂລກ. ທ່ານ ໂຣເບີດ ໂອເວັນ ນັກສັງຄົມນິຍົມເພີ້ຝັນຄົນອັງກິດ ຈຶ່ງໄດ້ສົ່ງເສີມຜ່ານສະໂລແກນທີ່ວ່າ ເຮັດວຽກ 8 ຊົ່ວໂມງ, ພັກຜ່ອນ 8 ຊົ່ວໂມງ ແລະ ນອນ 8 ຊົ່ວໂມງ ເພື່ອພັດທະນາຄຸນນະພາບຊີວິດຂອງແຮງງານໃຫ້ດີຂຶ້ນໃນ 1 ມື້.

ແນວໃດກໍຕາມ, ແນວຄິດຂອງ ທ່ານ ໂອເວັນ ບໍ່ປະສົບຄວາມສຳເລັດປານໃດ ເມື່ອປຽບທຽບກັບແນວຄິດສັງຄົມນິຍົມຂອງ ທ່ານ ຄາລ ມາກ ທີ່ສະໜັບສະໜູນໃຫ້ແຮງງານຕໍ່ສູ້ກັບນາຍທຶນຜູ້ຂູດຮີດ  ເຖິງວ່າ ມາກ ຈະເບິ່ງວ່າຊົ່ວໂມງການເຮັດວຽກຍ່ອມສົ່ງຜົນຕໍ່ສຸຂະພາບຂອງແຮງງານກໍຕາມ, ແຕ່ວ່າແນວຄິດເພີ້ຝັນຂອງ ທ່ານ ໂອ ເວັນ ເລີ່ມເປັນຈິງເມື່ອສະມາຄົມ ສະໂຕນເມສັນ ແລະ ແຮງງານຈຳນວນຫລາຍມາຮວມໂຕກັນຢູ່ເມືອງເມລເບິນ ຂອງອົດສະຕຣາລີ ໃນວັນທີ 21 ເມສາ 1856  ເດີນຂະບວນຮຽກຮ້ອງໃຫ້ສະພາທ້ອງຖິ່ນສະໜັບສະໜູນແນວຄິດດັ່ງກ່າວ ເຊິ່ງ 3 ອາທິດຕໍ່ມາ ສະພາຕອບຮັບຂໍ້ສະເໜີຂອງສະມາຄົມສະໂຕນເມສັນໃຫ້ແຮງງານເຮັດວຽກມື້ລະ 8 ຊົ່ວໂມງໄດ້ໂດຍບໍ່ຖືກຕັດຄ່າຈ້າງ ເຊິ່ງຖືເປັນຂະບວນການແຮງງານທຳອິດຂອງໂລກທີ່ເຄື່ອນໄຫວຮຽກຮ້ອງສິດຂອງຕົນໄດ້ສຳເລັດ ແລະ ແນວຄິດນີ້ກໍໄດ້ຮັບການເຜີຍແຜ່ໄປທົ່ວໂລກ ຈົນຢູ່ກອງປະຊຸມສະມາພັນ ກຳມະກອນສາກົນ ຄັ້ງທີ 1 ຢູ່ນະຄອນຫລວງເຈນີວາ ປະເທດສະວິດເຊີແລນ ປະກາດສະໜັບສະໜູນແນວຄິດດັ່ງກ່າວໃນປີ 1866.

- lattana 1 - ວັດທະນະທຳການເຮັດວຽກ 8 ຊົ່ວໂມງໄດ້ມາຈາກໃສ ?
- 1 1 - ວັດທະນະທຳການເຮັດວຽກ 8 ຊົ່ວໂມງໄດ້ມາຈາກໃສ ?

ໃນອີກຟາກໂລກໜຶ່ງ ແຮງງານອາເມລິກາໃນນະຄອນຫລວງຊິກາໂກ ນັດຢຸດງານຄັ້ງໃຫຍ່ໃນປີ 1886 ເພື່ອຮຽກຮ້ອງມາດຕະຖານການເຮັດວຽກມື້ລະ 8 ຊົ່ວໂມງ, ແຕ່ການນັດຢຸດງານຄັ້ງນັ້ນກາຍເປັນການສັງຫານໝູ່ຢູ່ເຮມາເກັດ ໃນວັນທີ 1 ພຶດສະພາ 1886 ໃນອີກ 12 ປີຕໍ່ມາ ສະພາບແຮງງານເໝືອງແຮ່ກາຍເປັນແຮງງານກຸ່ມທຳອິດໃນສະຫະລັດທີ່ໄດ້ຮັບສິດທິດັ່ງກ່າວ ແລະ ໃນທີ່ສຸດກໍມີການຖືເອົາວັນທີ 1 ພຶດສະພາ ເປັນວັນແຮງງານສາກົນ ເພື່ອລະນຶກເຖິງການປະທ້ວງເລື່ອງການເຮັດ ວຽກ 8 ຊົ່ວໂມງຢູ່ເຮມາເກັດ.

ແນວຄິດການເຮັດວຽກ 8 ຊົ່ວໂມງກາຍເປັນມາດຕະຖານສາກົນຫລາຍຂຶ້ນ ເມື່ອບໍລິສັດຟອດມໍເຕີ ຜູ້ຜະລິດລົດເຈົ້າໃຫຍ່ຂອງສະຫະລັດອາເມລິກາໄດ້ເອົາແນວຄິດນີ້ມາໃຊ້ໃນປີ 1914 ແລະ ຫລັງການປະຕິວັດຣັສເຊຍໃນປີ 1917 ລັດຖະບານສະຫະພາບໂຊຫວຽດກໍບັນຍັດໃຫ້ການເຮັດວຽກ 8 ຊົ່ວໂມງຕໍ່ມື້ເປັນກົດໝາຍເຊັ່ນກັນ.

ທຸກມື້ນີ້ການເຮັດວຽກມື້ລະ 8  ຊົ່ວໂມງກາຍເປັນເລື່ອງປົກກະຕິໃນຊີວິດປະຈຳວັນຂອງແຕ່ລະຄົນ.

error: Content is protected !!