ໂຮງຮຽນຖືກປິດຍ້ອນໂຄວິດ-19

ໂຮງຮຽນຖືກປິດຍ້ອນໂຄວິດ-19 - AGL banner - ໂຮງຮຽນຖືກປິດຍ້ອນໂຄວິດ-19

ໂດຍ: ທິດກໍ່າ
ວັນທີ 1 ມິຖຸນາຫາກໍຜ່ານພົ້ນໄປບໍ່ພໍເທົ່າໃດວັນ. ປີນີ້ຄວາມຫວັງໃນການສະເຫລີມສະຫລອງວັນເດັກສາກົນຂອງລູກຫລານເຍົາວະຊົນລາວຕ້ອງພາດໂອກາດໄປຢ່າງໜ້າເສຍດາຍ ອັນສາເຫດກໍຍ້ອນການແຜ່ລະບາດຂອງພະຍາດໂຄວິດ-19 ມາກີດກັ້ນກົດໜ່ວງ ແລະ ຂວາງໜ້າ. ນັບແຕ່ໂຣກລະບາດໂຄວິດ-19 ໄດ້ມາອາລະວາດໃນຮອບໃໝ່ ຈົນເຮັດໃຫ້ການຮຽນ-ການສອນຂອງຄູ-ອາຈານນັກຮຽນ-ນັກສຶກສາເຮົາຕ້ອງຢຸດສະງັກໄປຊົ່ວຄາວເປັນເວລາຫລາຍອາທິດ. ໃນອະນາຄົດຕໍ່ໜ້າ ເຮົາກໍຍັງບໍ່ທັນຮູ້ວ່າການຮຽນ-ການສອນຂອງລູກຫລານເຮົາຈະປົກກະຕິ ແລະ ມີໂອກາດຮຽນໄດ້ສໍ່າໃດ ໃນເມື່ອພະຍາດໂຄວິດ-19 ຍັງສືບຕໍ່ຄອບງຳແຜ່ລະບາດຄືແນວນີ້.
ແຕ່ວ່າແນວໃດກໍຕາມ, ອີງໃສ່ມາດຕະການຜ່ອນຜັນນັບແຕ່ວັນທີ 5 ຫາວັນທີ 19 ມິຖຸນາ ຢູ່ແຂວງທີ່ບໍ່ມີການລະບາດແມ່ນສາມາດເປີດການຮຽນ-ການສອນໄດ້. ດັ່ງພວກເຮົາຮັບຮູ້ແລ້ວວ່າ, ບັນຫາອະນາຄົດຂອງເດັກເຍົາວະຊົນເປັນຄວາມຫວັງອັນຍິ່ງໃຫຍ່ຂອງປະເທດຊາດ. ຍ້ອນວ່າເດັກເຍົາວະຊົນຈະກາຍເປັນຊັບພະຍາກອນອັນປະເສີດຂອງຊາດ. ເພາະສະນັ້ນ ຖ້າການສຶກສາ ກໍຄືການສ້າງຄົນບໍ່ເປັນໄປຕາມກົນໄກແລ້ວ ຈະເຮັດໃຫ້ການຮຽນ-ການສອນບໍ່ມີປະສິດທິພາບ ແລະ ຄຸນນະພາບ.
ເມື່ອຕັ້ງໂຈດກັນວ່າ, ເພື່ອໃຫ້ການຮຽນ-ການສອນຂອງລູກຫລານເຮົາເປັນໄປຕາມລະບົບປົກກະຕິ ພວກເຮົາຄວນເຮັດແນວໃດ ? ຄຳຕອບໂຈດກໍຄືຕ້ອງພ້ອມກັນເປັນເຈົ້າການຕ້ານສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໃຫ້ໝົດໄປຈາກສັງຄົມລາວ ປະເທດລາວໂດຍໄວ ດ້ວຍການປະຕິບັດບັນດາມາດຕະການຂອງລັດຖະບານ ແລະ ຄະນະສະເພາະກິດວາງອອກໃຫ້ເຂັ້ມງວດ, ພ້ອມກັນປະຕິບັດຂໍ້ຫ້າມ, ມາດຕະການຜ່ອນຜັນດ້ວຍຈິດໃຈເປັນເຈົ້າຕົນເອງຢ່າງເຂັ້ມງວດ. ອັນສຳຄັນທີ່ສຸດແມ່ນບໍ່ພາກັນມົ້ວສຸມຊຸມແຊວ ອັນເປັນທີ່ມາຂອງການຕິດເຊື້ອ. ໄປໃສມາໃສຕ້ອງມີສະຕິໃຊ້ຜ້າອັດປາກ-ອັດດັງ, ໃຊ້ໄລຍະຫ່າງ, ໝັ່ນລ້າງມືດ້ວຍນໍ້າຢາຂ້າເຊື້ອ. ນອກຈາກນັ້ນ ກໍຂ້ຽວພາກັນໄປສັກຢາວັກຊີນໃຫ້ຄົບຖ້ວນຕາມແພດໝໍເພິ່ນແນະນຳກໍເປັນອັນວ່າຈົບເລື່ອງ. ແຕ່ກົງກັນຂ້າມ ເມື່ອໃດພວກເຮົາຖືເບົາບໍ່ພ້ອມກັນເປັນເຈົ້າການຕ້ານພະຍາດໂຄວິດ-19 ກໍຍັງບໍ່ມີທ່າທີໝົດໄປຈາກສັງຄົມລາວ ປະເທດລາວ ຍ້ອນພວກເຮົາເອງ ແລ້ວຄວາມຫຍຸ້ງຍາກກາກກຳຂາດເຂີນ ນັບທັງການເຄື່ອນໄຫວຊອກຢູ່ຫາກິນຕ່າງໆກໍຍິ່ງຈະສັບສົນອົນລະເວງ ການຮຽນ-ການສອນຂອງລູກຫລານເຮົາກໍຈະຖືກຢຸດສະງັກຊັກຊ້າໄປຕໍ່.
ອີກປະການໜຶ່ງ, ບັນຫາທີ່ພວກເຮົາຍັງພົບຂໍ້ຫຍຸ້ງຍາກນັ້ນ ຊະນິດວັກຊີນທີ່ຈະມານຳໃຊ້ສຳລັບເດັກນ້ອຍນັ້ນປາກົດວ່າຍັງບໍ່ທັນມີ. ຄາດວ່າໃນຕໍ່ໜ້ານັ້ນ ອາດຈະມີແນ່ນອນໃນເມື່ອມີວັກຊີນມາປ້ອງກັນຕ້ານໂຄວິດ-19 ແລ້ວ ການຮຽນ-ການສອນອາດຈະດຳເນີນໄປເປັນປົກກະຕິ.
ເຖິງຢ່າງໃດກໍດີ, ມາຮອດປັດຈຸບັນນີ້ການແຜ່ລະບາດຂອງພະຍາດໂຄວິດ-19 ໃນຮອບໃໝ່ເຫັນວ່າມີການຫລຸດຜ່ອນລົງຫລາຍ ບ້ານໃດ, ເມືອງໃດ ແລະ ແຂວງໃດທີ່ບໍ່ມີການລະບາດກໍສາມາດເປີດການຮຽນ-ການສອນຕາມມາດຕະການຜ່ອນຜັນຂອງຂັ້ນເທິງວາງອອກ.

ໂຮງຮຽນຖືກປິດຍ້ອນໂຄວິດ-19 - WhatsApp Image 2020 05 27 at 5 - ໂຮງຮຽນຖືກປິດຍ້ອນໂຄວິດ-19
ໂຮງຮຽນຖືກປິດຍ້ອນໂຄວິດ-19 - WhatsApp Image 2020 05 27 at 5 - ໂຮງຮຽນຖືກປິດຍ້ອນໂຄວິດ-19
ໂຮງຮຽນຖືກປິດຍ້ອນໂຄວິດ-19 - Wave100S AD to Website 2020 0 - ໂຮງຮຽນຖືກປິດຍ້ອນໂຄວິດ-19
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: ເນື້ອຫາຂ່າວມີລິຂະສິດ !!