ບັນດາອະດີດການນຳຂອງໂລກ ຫຼາຍຮ້ອຍທ່ານ ຊຸກຍູ້ໃຫ້ກຸ່ມ G7 ອຸດໜູນເງິນຄ່າວັກຊີນໃຫ້ບັນດາປະເທດທຸກຈົນ

ສຳນັກຂ່າວຕ່າງປະເທດ ລາຍງານເມື່ອວັນທີ 7 ມິຖຸນານີ້ວ່າ: ມີອະດີດການນຳໂລກຫຼາຍຮ້ອຍທ່ານ ຮຽກຮ້ອງໃຫ້ບັນດາປະເທດທີ່ຮັ່ງມີໃນກຸ່ມ G7 ຈ່າຍເງິນຄ່າວັກຊີນໃຫ້ກັບໂລກ ເພື່ອສະກັດກັ້ນ ໄວຣັສ ກາຍພັນທີ່ກຳລັງຂົ່ມຂູ່ຊີວິດຂອງປະຊາກອນໂລກໃນຂະນະນີ້.

ຄຳຮຽກຮ້ອງດັ່ງກ່າວມີຂຶ້ນກ່ອນທີ່ຈະມີກອງປະຊຸມສຸດຍອດກຸ່ມ G7 ທີ່ຈະຈັດຂຶ້ນໃນລະຫວ່າງວັນສຸກ ໃນອາທິດນີ້ ທີ່ປະເທດ ອັງກິດ ຊຶ່ງເປັນສະຖານທີ່ ທີ່ທ່ານ ໂຈໄບເດັນຈະພົບປະກັບບັນດາຜູ້ນຳຂອງ ອັງກິດ, ຝຣັ່ງ, ເຢຍລະມັນ, ອີຕາລີ, ການາດາ ແລະ ຍີ່ປຸ່ນ.

ໃນຈົດໝາຍສົ່ງເຖິງກຸ່ມ G7 ນັ້ນ, ບັນດາອະດີດການນຳໂລກລະບຸວ່າ ການຮ່ວມມືກັນຂອງໂລກ ບໍ່ມີຜົນສຳເລັດປີ 2020, ແຕ່ໃນປີ 2021 ນີ້ ອາດຈະເປັນປີໄຂສັງກາດໃໝ່ກໍເປັນໄປໄດ້.

ລົງນາມໃນຈົດໝາຍດັ່ງກ່າວລວມມີອະດີດ ນາຍົກລັດຖະມົນຕີ ອັງກິດ ທ່ານ Gordon Brown ແລະ ທ່ານ Tony Blair, ອະດີດເລຂາທິການໃຫ່ຍອົງການສະຫະປະຊາຊາດ Ban-Ki Moon ພ້ອມກັບ 15 ອະດີດການນຳຂອງທະວີບ ແອຟຣິກກາອີກດ້ວຍ.