ສືບຕໍ່ຍົກລະດັບການພົວພັນຮ່ວມມື ຫວຽດນາມ-ລາວເຂົ້າສູ່ລວງເລິກ
ສຳນັກຂ່າວຕ່າງປະເທດ ຈາກ ຫວຽດນາມ ເມື່ອວັນທີ 9 ມິຖຸນານີ້ ລາຍງານວ່າ: ທ່ານ ບຸນແທັງເຊີນ ລັດຖະມົນຕີກະຊວງການຕ່າງປະເທດ ຫວຽດນາມ ໄດ້ມີການພົບປະສອງຝ່າຍກັບ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ລາວ ຢູ່ນອກກອງປະຊຸມພິເສດລັດຖະມົນຕີກະຊວງການຕ່າງປະເທດ ອາຊຽນ – ຈີນ ແລະ ກອງປະຊຸມລັດຖະມົນຕີຮ່ວມມື ແມ່ນໍ້າຂອງ – ລ້ານຊ້າງ ຄັ້ງທີ 6. ສອງຝ່າຍໄດ້ເຫັນດີເປັນເອກະພາບໃນຫຼາຍບັນຫາເພື່ອສືບຕໍ່ຍົກລະດັບການພົວພັນຮ່ວມມື ຫວຽດນາມ – ລາວເຂົ້າສູ່ລວງເລິກ.
ທ່ານລັດຖະມົນຕີ ບຸ່ຍແທັງເຊີນ ໄດ້ສະແດງຄວາມຍິນດີຕໍ່ການຮ່ວມມື ແລະ ການຊ່ວຍເຫຼືອເຊິ່ງກັນແລະກັນລະຫວ່າງສອງປະເທດ ຫວຽດນາມ – ລາວ ໃນການປ້ອງກັນພະຍາດ ໂຄວິດ – 19, ສະແດງຄວາມຂອບອົກຂອບໃຈຕໍ່ການນຳຂອງພັກ ແລະ ລັດລາວ ທີ່ໄດ້ໃຫ້ຄວາມເປັນຫ່ວງເປັນໃຍສຳລັບສະຖານະການການລະບາດຂອງພະຍາດ ໂຄວິດ – 19 ໃນປະຈຸບັນຢູ່ຫວຽດນາມ, ພ້ອມກັນນັ້ນກໍຫວັງວ່າ ວ່າການອຸປະຖຳດ້ານການເງິນ, ອຸປະກອນການແພດ ແລະ ຜູ້ຊ່ຽວຊານດ້ານການແພດຂອງຫວຽດນາມ ຈະປະກອບສ່ວນເຂົ້າໃນການປ້ອງກັນ ແລະ ຄວບຄຸມການລະບາດຂອງພະຍາດ ໂຄວິດ – 19 ຢູ່ ລາວໄດ້.
ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ລາວ ກໍສະແດງຄວາມຊົມເຊີຍຫວຽດນາມທີ່ປະສົບຜົນສໍາເລັດໃນການຈັດການເລືອກຕັ້ງຜູ້ແທນສະມາຊິກສະພາແຫ່ງຊາດຊຸດທີ 15 ແລະ ສະພາປະຊາຊົນທຸກຂັ້ນສະໄໝ 2021-2026 ໃນທ່າມກາງການຜັນແປທີ່ສັບສົນຂອງພະຍາດ ໂຄວິດ – 19 ຢູ່ຫລາຍທ້ອງຖິ່ນ; ສະແດງຄວາມຂອບອົກຂອບໃຈຕໍ່ພັກ, ລັດ ແລະ ປະຊາຊົນຫວຽດນາມທີ່ໄດ້ໃຫ້ການຊ່ວຍເຫຼືອ ລາວ ທັງທາງດ້ານວັດຖຸ ແລະ ຈິດໃຈ ເພື່ອຮັບມືກັບໂລກລະບາດ ແລະ ຢືນຢັນວ່າປະເທດລາວ ພ້ອມແລ້ວທີ່ຈະຄຽງບ່າຄຽງໄຫຼ່ກັບ ຫວຽດນາມຕາມຈິດໃຈການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງປະເທດ.
