6 ວິທີງ່າຍໆເພີ່ມປະສິດທິພາບໃນການເຮັດວຽກໃນ 10 ນາທີ
June 12, 2021 - 9:23 AM
- ຂຽນ 3 ສິ່ງທີ່ທ່ານຢາກຂອບໃຈ : ຫາກເຮົາເບິ່ງຍ້ອນກັບໄປໃນອະດີດ ຍ່ອມມີຜູ້ຄົນຫລວງຫລາຍທີ່ມີສ່ວນຮ່ວມໃນຄວາມສຳເລັດໃນຊີວິດຂອງເຮົາ ບໍ່ວ່າຈະເປັນພໍ່ແມ່, ອ້າຍເອື້ອຍນ້ອງ, ໝູ່ເພື່ອນ, ຄົນຮັກ ຫລື ແມ່ນແຕ່ສັດຕູ ແລະ ປັດໄຈອື່ນໆທີ່ປຽບດັ່ງແຮງຊຸກຍູ້ໃຫ້ເຮົາກ້າວມາເຖິງມື້ນີ້. ຈາກການວິໄຈຂອງມະຫາວິທະຍາໄລໄມອາມີ ປະເທດສະຫະລັດອາເມລິກາ ພົບວ່າ : ຜູ້ທີ່ຂຽນບັນທຶກເຖິງສິ່ງທີ່ຕົນຮູ້ສຶກຢາກຂອບໃຈເປັນປະຈຳທຸກມື້ມັກເຮັດວຽກຢ່າງມີປະສິດທິພາບ, ຫ້າວຫັນ, ຕັ້ງໃຈ ແລະ ມີພະລັງໃນການເຮັດວຽກຫລາຍກ່ວາຄົນທົ່ວໄປ ທັງຍັງເປັນຄົນທີ່ເບິ່ງໂລກໃນແງ່ດີ ແລະ ມີຄວາມສຸກຫລາຍກ່ວານຳອີກ.
- ຈັດໂຕະເຮັດວຽກ : ການຈັດໂຕະເຮັດວຽກໃຫ້ເປັນລະບຽບຮຽບຮ້ອຍຢູ່ສະເໝີຖືເປັນວິທີເພີ່ມປະສິດທິພາບໃນການເຮັດວຽກໄດ້ອີກວິທີໜຶ່ງ ເພາະການຈັດໂຕະຈະເຮັດໃຫ້ພື້ນທີ່ເຮັດວຽກສະອາດຕາ, ເພີ່ມພື້ນທີ່ໃນການໃຊ້ສອຍ, ເພີ່ມຄວາມສະດວກໃນການຈັບໃຊ້ອຸປະກອນຕ່າງໆ ທັງຍັງຊ່ວຍເພີ່ມຄວາມຮູ້ສຶກຢາກເຮັດວຽກນຳອີກ.
- ໂອ້ລົມກັບເພື່ອນຮ່ວມງານ : ການເກັບໂຕງຽບ ບໍ່ເວົ້າຫຍັງກັບເພື່ອນຮ່ວມງານ ນອກຈາກເຮັດໃຫ້ຄວາມສຳພັນລະຫ່ວາງທ່ານ ແລະ ເພື່ອນຮ່ວມງານບໍ່ດີແລ້ວ ຍັງສົ່ງຜົນໃຫ້ປະສິດທິພາບໃນການເຮັດວຽກຫລຸດລົງນຳອີກ ເພາະການທີ່ທ່ານບໍ່ສົນທະນາກັບເພື່ອນຮ່ວມງານເທົ່າກັບປິດຫູປິດຕາຕົນເອງຈາກຄວາມຄິດເຫັນ ແລະ ຄຳແນະນຳຕ່າງໆທີ່ເປັນປະໂຫຍດຕໍ່ການເຮັດວຽກຂອງທ່ານ. ດັ່ງນັ້ນ, ການຮັກສາສຳພັນທະພາບກັບເພື່ອນຮ່ວມງານຈຶ່ງເປັນສິ່ງທີ່ບໍ່ຄວນຖືເບົາ.
- ຂຽນເປົ້າໝາຍສູງສຸດໃນແຕ່ລະມື້ : ການຂຽນເປົ້າໝາຍສູງສຸດໃນການເຮັດວຽກໃນແຕ່ລະມື້ຊ່ວຍເຮັດໃຫ້ເປົ້າໝາຍທີ່ເລືອນລາງຢູ່ໃນຄວາມຄິດກາຍເປັນເລື່ອງທີ່ເປັນຮູບປະທຳ ແລະ ຈະແຈ້ງຫລາຍຍິ່ງຂຶ້ນ. ການກະທຳດັ່ງກ່າວຊ່ວຍໃຫ້ມີແຮງບັນດານໃຈ ແລະ ຫ້າວຫັນໃນການເຮັດວຽກຫລາຍຍິ່ງຂຶ້ນ ເຊິ່ງສົ່ງຜົນດີຕໍ່ວຽກທີ່ເຮັດນັ້ນເອງ.
- ຈົດລາຍການສິ່ງທີ່ຕ້ອງເຮັດ : ໃນແຕ່ລະມື້ບາງຄົນອາດມີເລື່ອງຕ້ອງເຮັດນັບສິບຢ່າງ ບາງວຽກຕ້ອງເຮັດໃຫ້ສຳເລັດລຸລ່ວງພາຍໃນມືນັ້ນ ຂະນະທີ່ບາງວຽກຍັງສາມາດເລື່ອນມື້ໄປເຮັດໃນມື້ໜ້າໄດ້. ສະນັ້ນ, ການຂຽນສິ່ງທີ່ຕ້ອງເຮັດໃນແຕ່ລະມື້ໂດຍຈັດລຽງລຳດັບຄວາມສຳຄັນຈາກຫລາຍໄປຫາໜ້ອຍ ຈະຊ່ວຍໃຫ້ຊີວິດເປັນລະບົບລະບຽບຫລາຍຍິ່ງຂຶ້ນ ແລະ ເຮັດວຽກແລ້ວພາຍໃນຮອບໄລຍະເວລາທີ່ກຳນົດ ທັງຍັງເຮັດໃຫ້ມີເວລາພັກຜ່ອນເພີ່ມຫລາຍຂຶ້ນນຳອີກ.
- ອ່ານຄຳຄົມ ຫລື ເລື່ອງລາວສ້າງແຮງບັນດານໃຈ : ການອ່ານຄຳຄົມ ຫລື ເລື່ອງລາວສ້າງແຮງບັນດານໃຈຈາກບຸກຄົນທີ່ປະສົບຄວາມສຳເລັດສາມາດຊ່ວຍເພີ່ມພູມປະສິດທິພາບໃນການເຮັດວຽກໄດ້ ເພາະເລື່ອງດັ່ງກ່າວຊ່ວຍຈຸດປະກາຍໃນການເຮັດວຽກ ທັງຍັງຊ່ວຍທັດສະນະຄະຕິ ແລະ ມຸມມອງໃຫ້ເປັນໄປໃນແງ່ບວກຫລາຍຍິ່ງຂຶ້ນ. ນອກຈາກນັ້ນ, ເຮົາອາດໄດ້ແນວຄິດ ແລະ ວິທີປະຕິບັດດີໆຈາກບຸກຄົນທີ່ປະສົບຄວາມສຳເລັດເຫລົ່ານີ້ນຳອີກ.
