ໂຣກມະເຮັງ: ໄພຂົ່ມຂູ່ ທີ່ການປ້ອງກັນຄວນມາກ່ອນ

- advert banner 728 90 728x90 - ໂຣກມະເຮັງ: ໄພຂົ່ມຂູ່ ທີ່ການປ້ອງກັນຄວນມາກ່ອນ

ມະເຮັງ ໄດ້ກາຍເປັນພະຍາດທີ່ຄຸກຄາມຕໍ່ຊີວິດຂອງມວນມະນຸດຢ່າງໜ້າຢ້ານກົວທີ່ສຸດໃນຍຸກນີ້ ເຖິງແມ່ນວິທີການປິ່ນປົວຈະໄດ້ຮັບການພັດທະນາດີຂຶ້ນ ແຕ່ຍັງມີຄົນເສຍຊີວິດຍ້ອນພະຍາດດັ່ງກ່າວເພີ່ມຂຶ້ນ ຢ່າງໄວວາ, ດັ່ງນັ້ນການປ້ອງກັນຈາກໂຣກດັ່ງກ່າວຈຶ່ງສຳຄັນທີ່ສຸດ.

- new3 - ໂຣກມະເຮັງ: ໄພຂົ່ມຂູ່ ທີ່ການປ້ອງກັນຄວນມາກ່ອນ

ອີງຕາມບົດລາຍງານກ່ຽວກັບໂຣກມະເຮັງໃນໂລກ ຂອງອົງການອະນາໄມໂລກສະບັບຫຼັງສຸດແຕ່ປີ 2014​  ໃຫ້ຮູ້ວ່າ ອີກປະມານສອງທົດສະວັດຂ້າງໜ້ານີ້ ຈະມີຜູ້ເປັນມະເຮັງເພີ່ມຂຶ້ນຈາກ 14​ ລ້ານຄົນ ມາເປັນ 22​ລ້ານຄົນຕໍ່ປີ ແລະຈະມີຜູ້ເສຍຊີວິດຈາກ 8.2 ລ້ານຄົນມາເປັນ 13 ລ້ານຄົນຕໍ່ປີ ໃນນັ້ນ 60% ຂອງຜູ້ທີ່ເປັນ ໂຣກມະເຮັງ ແລະ 70% ທີ່ເສຍຊີວິດແມ່ນພົບໃນທະວີບ ອາຟຣິກກາ, ອາຊີ ແລະອາເມລິກາກາງ ແລະໃຕ້.

ການເປັນໂຣກມະເຮັງນີ້ສ້າງຄວາມເສຍຫາຍທາງດ້ານເສດຖະກິດຄິດເປັນມູນຄ່າກວ່າ 1.16 ພັນຕື້ໂດລາສະຫະລັດ, ຈາກຕົວເລກດັ່ງກ່າວ ທ່ານ ຄຣິດສຕົບເຟີ ໄວດ໌ (Dr. Cristopher Wild) ຫົວໜ້າອົງການຕ້ານມະເຮັງຂອງອົງການສະຫະປະຊາຊາດ ກ່າວວ່າ: ການເພີ່ມຂຶ້ນຂອງໂຣກມະເຮັງ ແມ່ນອຸປະສັກຕົ້ນຕໍໃນການພັດທະນາມະນຸດ ເຊິ່ງມັນເປັນສັນຍານຢ່າງຊັດແຈ້ງວ່າການຕອບໂຕ້ຕໍ່ໄພຂົ່ມຂູ່ທີ່    ຮ້າຍແຮງນີ້ ແມ່ນສິ່ງຈຳເປັນຢ່າງຮີບດ່ວນທີ່ສຸດ.

ປະເພດມະເຮັງທີ່ພົບຫຼາຍທີ່ສຸດແມ່ນມະເຮັງປອດທີກວມເອົາປະມານ 13%​ ຂອງຜູ້ເປັນໂຣກມະເຮັງທັງໝົດ, ນອກນັ້ນກໍມີ ມະເຮັງເຕົ້ານົມ ກວມເອົາປະມານ 11.9% ແລະ ມະເຮັງລຳໄສ້ແກ່ ກວມເອົາປະມານ 9.7% ແລະສາເຫດທີ່ພາໃຫ້ຄົນເສຍຊີວິດຫຼາຍກວ່າໝູ່ແມ່ນມະເຮັງປອດ, ມະເຮັງກະເພາະອາຫານ, ມະເຮັງຕັບ ເປັນຕົ້ນ, ເພາະສະນັ້ນ ອົງການສະຫະປະຊາຊາດ ຈຶ່ງຮຽກຮ້ອງມາຍັງ ລັດຖະບານຂອງບັນດາປະເທດຕ່າງໆໃນໂລກ ຈົ່ງພ້ອມກັນຕັດໃຈສູງເພື່ອຕ້ານຢັນກັບພະຍາດນີ້ຢ່າງຈິງຈັງ.

ການເຂົ້າເຖິງການປິ່ນປົວທີ່ມີຄຸນນະພາບ ແລະທຸກຄົນສາມາດຈ່າຍໄດ້ ໃນບັນດາປະເທດ ທີ່ກຳລັງພັດທະນາ ແມ່ນເປັນປັດໄຈທີ່ຈະນຳໄປສູ່ການຫຼຸດຜ່ອນອັດຕາການຕາຍຢ່າງໄດ້ຜົນ. ນອກນັ້ນການມີນິຕິກຳ ແລະບັງຄັບໃຊ້ຢ່າງມີປະສິດທິຜົນນັ້ນ ຈະເປັນການປ້ອງກັນໂຣກມະເຮັງໄດ້ດີທີ່ສຸດ ໂດຍສະເພາະແມ່ນນິຕິກຳທີ່ກ່ຽວຂ້ອງກັບການຄວບຄຸມຢາສູບ, ການດຶ່ມທາດເຫຼົ້າ ຜ່ານການເກັບພາສີ ແລະມາດຕະການອື່ນໆ ເພື່ອຄວບຄຸມ ກໍຈະຫຼຸດຜ່ອນຜູ້ເປັນໂຣກມະເຮັງໄດ້ຢ່າງຫຼວງຫຼາຍ ເພາະການສູບຢາ ໃນປະເທດທີ່ກຳລັງພັດທະນາ ຮວມທັງສປປລາວເຮົາ (ຂໍ້ມູນຈາກກະຊວງ ສາທາລະນະສຸກໃຫ້ຮູ້ວ່າ ຄົນລາວແມ່ນໜຶ່ງໃນຜູ້ທີ່ສູບຢາຫຼາຍຂອງ ກຸ່ມປະເທດອາຊຽນ) ແມ່ນເປັນສາເຫດຕົ້ນຕໍໃນການເປັນໂຣກມະເຮັງ. ພ້ອມນັ້ນ, ການຕັ້ງສູນບໍລິການທາງດ້ານສຸຂະພາບຂອງລັດຖະບານ ກໍຍັງເປັນສິ່ງຈຳເປັນບໍ່ໜ້ອຍ ເພື່ອປ້ອງກັນ ພະຍາດດັ່ງກ່າວຢ່າງທົ່ວເຖິງ.

- lattana 1 - ໂຣກມະເຮັງ: ໄພຂົ່ມຂູ່ ທີ່ການປ້ອງກັນຄວນມາກ່ອນ

ສປປລາວ ກໍເປັນໜຶ່ງໃນປະເທດກຳລັງພັດທະນາ ທີ່ພົບພໍ້ຜູ້ເປັນໂຣກມະເຮັງຫຼາຍສົມຄວນ ແຕ່ໃນເວລາດຽວກັນ ພວກເຮົາຍັງມີຂີດຄວາມສາມາດຈຳກັດໃນການປິ່ນປົວ ຫຼືຮັກສາຜູ້ທີ່ເປັນໂຣກນີ້, ດ້ວຍເຫດຜົນນັ້ນ ຈຶ່ງເປັນສິ່ງຈະແຈ້ງວ່າ ການປ້ອງກັນເປັນວິທີທາງທີ່ຄວນເອົາໃຈໃສ່ເປັນພິເສດເພາະວ່າ ການປ້ອງກັນບໍ່ວ່າວິທີທາງໃດ ກໍແມ່ນການລົງທຶນທີ່ມີຄວາມໝາຍ ແລະຄຸ້ມຄ່າທີ່ສຸດ.

 

error: Content is protected !!