ໂຄງການທາງດ່ວນບໍ່ເຕັນ ຫາ ຫ້ວຍຊາຍ ໄລຍະທາງ 176,3 ກິໂລແມັດມູນຄ່າ 3,8 ຕື້ໂດລາ
ຫົວໜ້າທີມງານສຳຫຼວດອອກແບບໂຄງການກໍ່ສ້າງເສັ້ນທາງດ່ວນບໍ່ແກ້ວ ຫາ ບໍ່ເຕັນ ໄດ້ລາຍງານ ຕໍ່ ທ່ານ ປອ ບົວຄົງ ນາມມະວົງ ເຈົ້າແຂວງບໍ່ແກ້ວ 2021 ນີ້ ໃຫ້ຮູ້ວ່າ:.ໂຄງການກໍ່ສ້າງເສັ້ນທາງດ່ວນບໍ່ແກ້ວ ຫາ ບໍ່ເຕັນ ແມ່ນເລີ່ມແຕ່ດ່ານຊາຍແດນບໍ່ເຕັນ (ຊາຍແດນລາວ-ຈີນ) ໄປຮອດດ່ານຊາຍແດນຫ້ວຍຊາຍ (ຊາຍແດນລາວ-ໄທ) , ໄລຍະການກໍ່ສ້າງທາງ ແມ່ນ 176,3 ກິໂລແມັດ, ອີງຕາມມາດຕະຖານການກໍ່ສ້າງທາງດ່ວນທາງຄູ່ໄປກັບທີ່ມີ 4 ເລນ, ການອອກແບບຄວາມໄວແມ່ນ 80 ກິໂລແມັດ/ຊົ່ວໂມງ, ຄວາມກວ້າງໜ້າທາງແມ່ນ 21 ແມັດ, ມູນຄ່າການລົງທຶນຄາດຄະເນ ປະມານ 24,126 ຕື້ຢວນ ( 3,8 ຕື້ໂດລາ).ຫຼັງຈາກສຳເລັດໂຄງການກໍ່ສ້າງນີ້ແລ້ວ, ຈາກບໍ່ເຕັນ ຫາ ຫ້ວຍຊາຍ ຈະໃຊ້ເວລາພຽງແຕ່ 1,5 ຊົ່ວໂມງ.
ໂຄງການດັ່ງກ່າວໄດ້ດຳເນີນໄປຕາມແຜນ ໃຫ້ເກີດຜົນປະໂຫຍດທັງສອງຝ່າຍ ກໍ່ຄືການສ້າງຄວາມສະດວກໃຫ້ແກ່ການຄົມມະນາຄົມຂົນສົ່ງສິນຄ້າພາຍໃນແຂວງ, ຕ່າງແຂວງ ແລະ ບັນດາປະເທດໄກຄຽງ,ການສັນຈອນໄປມາຂອງປະຊາຊົນ ຂື້ນຕື່ມ, ໄດ້ປະຢັດເວລາ, ປະຢັດງົບປະມານ ແລະ ມີຄວາມປອດໄພສູງ ເຊິ່ງຈະເປັນອີກທ່າແຮງໜຶ່ງທີ່ຈະດຶງດູດນັກທຸລະກິດເຂົ້າມາລົງທຶນຫຼາຍຂື້ນເຮັດໃຫ້ເສດຖະກິດ-ສັງຄົມຂອງແຂວງບໍ່ແກ້ວ ຂະຫຍາຍຕົວຂຶ້ນເລື່ອຍໆ.
ທ່ານ ປອ ບົວຄົງ ນາມມະວົງ ເຈົ້າແຂວງບໍ່ແກ້ວ ເນັ້ນໃຫ້ບໍລິສັດຜູ້ທີ່ລົງທຶນໃຫ້ຄຳນຶງເຖິງການພັດທະນາຕ້ອງຮັບປະກັນຄວາມຍືນຍົງ ທາງດ້ານວັດທະນະທຳ-ສັງຄົມ ຮັກສາເອກະລັກຂອງລາວ, ສິ່ງແວດລ້ອມ, ທຳມະຊາດ ແລະ ການດຳລົງຊີວິດຂອງປະຊາຊົນ ໃຫ້ສົ່ງຜົນກະທົບໜ້ອຍທີ່ສຸດ ແລະ ປະຊາຊົນຕ້ອງມີວຽກເຮັດງານທຳໃນການກໍ່ສ້າງເສັ້ນທາງດ່ວນບໍ່ແກ້ວ ຫາ ບໍ່ເຕັນນີ້ດ້ວຍ. ສະນັ້ນ ຖ້າມີຂໍ້ຫຍຸ້ງຍາກອັນໃດທີ່ທາງພາກສ່ວນກ່ຽວຂ້ອງຂອງແຂວງ ທາງຄະນະນຳຂອງແຂວງບໍ່ແກ້ວ ພ້ອມແລ້ວຈະອຳນວຍຄວາມສະດວກ ເພື່ອເຮັດໃຫ້ການຈັດຕັ້ງປະຕິບັດສຳຫຼວດອອກແບບຂອງທີມງານໄດ້ມີຜົນສຳເລັດໂດຍໄວ້ ແລະ ເຮັດໃຫ້ໂຄງການນີ້ໄດ້ລົງມືກໍ່ສ້າງໂດຍໄວ້.
