ຈຳປາສັກ ໄດ້ຮັບ ຕຽງນອນສຳລັບຜູ້ປ່ວຍຕິດເຊື້ອໂຄວິດ-19 100 ຊຸດ ຈາກອົງການປົກຄອງນະຄອນຫຼວງວຽງຈັນ
ວັນທີ 19 ກໍລະກົດ 2021 ຜ່ານມານີ້ ແຂວງຈຳປາສັກໄດ້ຮັບການຊ່ວຍເຫລືອ ຕຽງນອນສຳລັບຜູ້ປ່ວຍຕິດເຊື້ອໂຄວິດ-19 ຈາກອົງການປົກຄອງນະຄອນຫຼວງວຽງຈັນ ຈໍານວນ 100 ຊຸດ ລວມມູນຄ່າທັງໝົດ 142 ລ້ານກີບ ຮັບໂດຍ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ມີທ່ານຮອງເຈົ້າແຂວງຈຳປາສັກ, ກອງເລຂາຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະ ບາດພະຍາດໂຄວິດ-19 ຂັ້ນແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານເຈົ້າແຂວງຈຳປາສັກ ໃຫ້ຮູ້ວ່າ: ເນື່ອງຈາກແຮງງານລາວທີ່ຢູ່ປະເທດໃກ້ຄຽງ ກັບຄືນມາ ສປປ ລາວ ນັບມື້ເພີ່ມຂຶ້ນ ເຮັດໃຫ້ໂຕເລກການຕິດເຊື້ອຈາກການນຳເຂົ້າໃນທົ່ວປະເທດ ແມ່ນເພີ່ມຂຶ້ນສູງ ຊຶ່ງບາງວັນມີຫຼາຍກວ່າ 100 ກໍລະນີ ທີ່ແມ່ນທັງສາຍພັນເດວຕາ ແລະ ອານຟາ ຊຶ່ງສາມາດແພ່ເຊື້ອໄດ້ງ່າຍ ແລະ ໄວກວ່າສາຍພັນດັ່ງເດີມ.
ດັ່ງນັ້ນ, ແຂວງຈຳປາສັກ ຈຶ່ງມີຄວາມຈຳເປັນທີ່ຈະຂະຫຍາຍໂຮງໝໍພາກສະໜາມ ເພີ່ມຈຳນວນຕຽງ ເພື່ອຮອງຮັບປິ່ນປົວຜູ້ທີ່ຕິດເຊື້ອພະຍາດໂຄວິດ-19 ດັ່ງກ່າວ.
