ກົດໝາຍ, ນະໂຍບາຍ ແລະ ມາດຕະການ ທີ່ມີຈິງແຕ່ອ່າວແປກ

- advert banner 728 90 728x90 - ກົດໝາຍ, ນະໂຍບາຍ ແລະ ມາດຕະການ ທີ່ມີຈິງແຕ່ອ່າວແປກ

ໂດຍ: ວິ​ເສດ ສະ​ແຫວ​ງສຶກສາ

- new3 - ກົດໝາຍ, ນະໂຍບາຍ ແລະ ມາດຕະການ ທີ່ມີຈິງແຕ່ອ່າວແປກ

ບັນດາ​ປະ​ເທດ​ທີ່​ມີ​ລະບົບ​ລັດຖະສະພານັ້ນລ້ວນ​ແຕ່​ມີ​ກົດໝາຍ​ວ່າ​ດ້ວຍ​ສະພາ​ທີ່​ເຮັດ​ໜ້າ​ທີ່​ຄຸ້ມ​ຄອງ​ການ​ເຄື່ອນ​ໄຫວ​ຂອງ​ລະບົບ​ທີ່​ກຳນົດ​ພາລະ​ບົດບາດ ​ແລະ ຄວາມ​ຮັບຜິດຊອບ​ຂອງ​ສະພາ ​ແລະ ສະມາຊິກ​ສະພາ ນັບ​ແຕ່​ສະພາ​ຂັ້ນສູນ​ກາງ​ລົງ​ຮອດ​ສະພາ​ທ້ອງ​ຖິ່ນ. ​ໃນ​ບົດ​ບັນຍັດ​ກ່ຽວ​ກັບ​ຄວາມ​ຮັບຜິດຊອບ​ຂອງ​ຜູ້​ແທນ​ທີ່​ປະຊາຊົນ​ເລືອກ​ຂຶ້ນມາກ​ັບມືນັ້ນ ​ແນ່ນອນ​ມີ​ຫລາຍ​ຂໍ້ ​ແລະ ຫລາຍ​ດ້ານ ລວມທັງ​ຂໍ້​ຫ້າມ​ບໍ່​ໃຫ້​ຜູ້​ແທນ​ຂາດ​ກອງ​ປະຊຸມ ​ໂດຍ​ບໍ່​ໄດ້​ຮັບ​ອະນຸຍາດ, ​ແຕ່​ປານ​ນັ້ນຫລາຍ​ປະ​ເທດ​ກໍ​ຍັງ​ພົບ​ກັບ​ບັນຫາ​ຜູ້​ແທນ​ຂາດ​ກອງ​ປະຊຸມ ບໍ່​ສົມ​ກັບ​ໄດ້​ປະກາດ​ໄວ້​ເມື່ອ​ເວລາ​ໂຄສະນາ​ຫາ​ສຽງ​ວ່າ​ຈະ​ເຮັດ​ໜ້າ​ທີ່​ເປັນ​ກະບອກ​ສຽງ​ໃຫ້​ປະຊາຊົນ​ໃນ​ກອງ​ປະຊຸມ. ຢູ່ກຳ​ປູ​ເຈຍ​ກໍ​ມີບັນຫາ​ຜູ້​ແທນ​ຂາດ​ປະຊຸມ​ເຊັ່ນ​ກັນ ​ໂດຍ​ສະ​ເພາະ​ແມ່ນ​ຜູ້​ແທນ​ພັກ​ຝ່າຍ​ຄ້ານ​ບໍ່​ຍອມ​ເຂົ້າຮ່ວມ​ກອງ​ປະຊຸມ​ເປັນ​ເວລາ​ຫລາຍ​ເດືອນ (ດຽວ​ນີ້​ເຂົ້າຮ່ວມ​ແລ້ວ) ອາດ​ເປັນ​ຍ້ອນ​ແນວ​ນີ້​ຕິ​ບໍ ທາງ​ສະພາ​ຜູ້​ແທນ​ລາສະດອນ (ສະພາ​ຕໍ່າ) ຂອງ​ກຳປູ​ເຈຍ​ຈຶ່ງ​ໄດ້​ສ້າງ ​ແລະ ຮັບຮອງ​ເອົາ​ກົດໝາຍ​ລົງ​ໂທດ​ສະມາຊິກ​ສະພາ​ແຫ່ງ​ຊາດ (ສສຊ) ທີ່​ຂາດ​ກອງ​ປະຊຸມ ​ແລະ ​ໄດ້​ປະກາດ​ໃຊ້​ກົດໝາຍ​ດັ່ງກ່າວ​ມາ​ແຕ່​ວັນ​ທີ 27 ​ເດືອນ​ຕຸລາ 2016 ພຸ້ນ. ກົດໝາຍ​ໄດ້​ກຳນົດ​ໂທດ​ປັບ​ໄໝ ສສຊ ທີ່​ຂາດ​ກອງ​ປະຊຸມ​ໂດຍ​ບໍ່​ໄດ້​ຮັບ​ອະນຸຍາດ​ຈາກ​ທ່ານ​ປະທານ​ສະພາ​ແຫ່ງ​ຊາດ. ກົດໝາຍ​ຍັງ​ໄດ້​ກຳນົດ​ລາມ​ໄປ​ເຖິງ​ໂທດ​ປັບ​ໄໝ ສສຊ ທີ່​ມີ​ການ​ປະພຶດ​ເປັນ​ການ​ໝິ່ນປະໝາດ​ເຈົ້າຊີວິດ, ປະທານ​ສະພາ​ແຫ່ງ​ຊາດ ​ແລະ ຜູ້ນຳ​ທ່ານ​ອື່ນໆ. ພັກ​ຝ່າຍ​ຄ້ານ​​ໃນ​ກຳປູ​ເຈຍ​ວິຈານ​ວ່າ: ກົດໝາຍ​ສະບັບ​ນີ້​ປະກາດ​ໃຊ້​ເພື່ອ​ໂຈມ​ຕີ​ຝ່າຍ​ຄ້ານ, ​​ແຕ່​ໂຄສົກ​ສະພາ​ແຫ່ງ​ຊາດ​ຕອບ​ໂຕ້​ຄືນ​ວ່າ: ກົດໝາຍ​ບໍ່​ມີ​ອະຄະຕິ​ທາງ​ການ​ເມືອງ​ໃດໆ​ທັງ​ຊິ້ນ. ຢູ່​ຟີ​ລິບ​ປິນ, ປະ​ເທດ​ໃນ​ຄອບຄົວ​ໃຫຍ່​ອາ​ຊຽນນັ້ນ​ໄດ້​ອອກ​ນະ​ໂຍບາຍ​ເອີ້ນ​ວ່າ: “​ແອ໋ກ 2016 ສຳລັບ​ຄົນ​ອາຍຸ​ຄົບ 100 ປີ” (Conterarians Act of 2016) ​ເຊິ່ງ​ເປັນ​ຂໍ້​ກຳນົດ​ນະ​ໂຍບາຍ​ສຳລັບ​ພົນລະ​ເມືອງ​ຟີ​ລິບ​ປິນທຸກ​ຄົນ​ຢູ່​ພາຍ​ໃນ ກໍ​ຄື​ຢູ່​ນອກ​ປະ​ເທດ​ທີ່​ມີ​ອາຍຸ​ຄົບ 100 ປີ. ນະ​ໂຍບາຍ​ດີໆ​ດັ່ງກ່າວ​ລວມມີ​ລາງວັນ​ເງິນສົດ​ໃນ​ມູນ​ຄ່າ 100.000 ​ເປ​ໂຊ (ສະກຸນ​ເງິນ​ຟີ​ລິບ​ປິນ ​ເທົ່າ​ກັບ 2.000 ​ໂດ​ລາ​ສະຫະລັດ) ນອກຈາກ​ເງິນລ້ວ ຜູ້​ມີ​ອາຍຸ​ຄົບ 100 ປີ ຍັງ​ໄດ້​ຮັບ​ເຄື່ອງ​ຕ້ອນ​ຂອງຂວັນ, ​ໂລ້​ກຽດ​ຕິ​ຄຸນ “ອາຍຸ​ຍືນ” ​ແລະ ໜັງສື​ສ່ວນ​ຕົວ​ຈາກ​ປະທານາທິບໍດີ ​ເພື່ອ​ຊົມ​ເຊີຍ​ຜົນງານ​ອາຍຸ​ຫລາຍ, ສ່ວນ​ບັນດາ​ເຈົ້າຂອງ​ອາຍຸ​ນັ້ນຕ້ອງ​ຍື່ນ​ເອກະສານ​ຢັ້ງຢືນ​ໃຫ້​ທາງ​ການ​ເຊັ່ນ: ​ໃບ​ລາຍ​ເກີດ, ໜັງສືຜ່ານ​ແດນ​ພົນລະ​ເມືອງ ​ແລະ ​ເອກະສານ​ຈຳ​ເປັນ​ອື່ນໆ. ​ເພື່ອ​ປະຕິບັດ​ຂໍ້​ກຳນົດ​ນີ້​ຢ່າງ​ມີ​ປະສິດທິ​ຜົນ ​ແລະ ທົ່ວ, ທາງ​ກະຊວງ​ພາຍ​ໃນ ​ແລະ ອຳນາດ​ການ​ປົກຄອງ​ທ້ອງ​ຖິ່ນ ​ໄດ້​ມີ​ຄຳ​ສັ່ງ​ລະອຽດ​ໃນ​ການ​ປະຕິບັດ​ຂໍ້​ກຳນົດ​ພາຍ​ໃນ 60 ວັນ. ຫລັງ​ຈາກ​ທ່ານ​ປະທານາທິບໍດີ ດູ​ເຕັກ​ເຕ ​ໄດ້​ເຊັນ​ຂໍ້​ກຳນົດ​ນະ​ໂຍບາຍ​ສະບັບ​ນີ້ ​ໃນ​ວັນ​ທີ 23 ​ເດືອນ​ມິຖຸນາ ປີ 2016. ຢູ່​ປະ​ເທດ​ກູ​ບາ​ແດນ​ໄກ ຂ່າວ​ທີ່​ປິ່ນ​ອ້ອມການ​ເຖິງ​ແກ່​ກຳ​ຂອງ​ທ່ານ ຟີ​ເດນ ກັດສະ​ໂຕຼ ຜູ້ນຳ​ທີ່​ເປັນ​ຕຳນານ​ແຫ່ງ​ການ​ປະຕິວັດ​ກູ​ບາ ​ໃນ​ວັນ​ທີ 25 ​ເດືອນ​ພະຈິກ ປີ 2016 ​ໄດ້​ເຮັດ​ໃຫ້​ຫລາຍ​ຄົນ​ຕະລຶງ​ຊຶງ​ເຊີ້ ​ເພາະ​ກ່ອນ​ຈາກ​ໄປ​ໃນ​ໄວ​ອາຍຸ​ນ້ອງ​ຮ້ອຍ (90 ປີ) ທ່ານ ຟີ​ເດນ ​ໄດ້​ປະ​ພິ​ໄນ​ກຳ​ໃນ​ຮູບ​ຄຳ​ສັ່ງ​​ໄວ້​ວ່າ: ຫ້າມ​ສ້າງ​ອະນຸ​ສາ​ວະລີ ຫລື ອະນຸສອນ​ສະຖານ​ຕ່າງໆ​ເປັນ​ກຽດ​ແກ່​ທ່ານ​ເດັດຂາດ, ຫ້າມ​ເອົາ​ຊື່​ຂອງ​ທ່ານ​ໄປ​ເປັນ​ຊື່​ເມືອງ, ຖະໜົນ​ຫົນທາງ ກໍ​ຄື​ອາຄານ​ສະຖານ​ທີ່​ຕ່າງໆ, ຫ້າມ​ໃຊ້​ຊື່​ຂອງ​ທ່ານ​ເພື່ອ​ຜົນ​ປະ​ໂຫຍ​ດທາງ​ການ​ຄ້າ​ການ​ໂຄສະນາ​ຫາ​ຜົນ​ປະ​ໂຫຍ​ດ ​ແຕ່​ສາມາດ​ໃຊ້​ຊື່​ຂອງ​ທ່ານ​ໃນ​ແງ່​ສິລະ​ປະ, ອະນຸຍາດ​ໃຫ້​ເອີ່ຍ​ຊື່​ຂອງ​ທ່ານ​ໃນ​ງານ​ໂຮມ​ຊຸມນຸມ​ທາງ​ການ​ເມືອງ ​ແລະ ບ່ອນ​ເຮັດ​ວຽກ ​ເພື່ອ​ການຄົ້ນຄວ້າ​ກ່ຽວ​ກັບ​ບົດບາດ​ຂອງ​ທ່ານ​ໃນ​ໜ້າ​ປະຫວັດສາດ​ຂອງ​ປະ​ເທດ​ຊາດ​ກູ​ບາ​ເທົ່າ​ນັ້ນ. ຢູ່​ສະຫະລັດ​ອາ​ເມ​ລິ​ກາ, ຂ່າວ​ເສົ້າທີ່​ມັກ​ເກີດ​ຂຶ້ນອ່າວ​ຖີ່ ກໍ​ຄື​ກໍລະນີ​ເຫດການ​ໃຊ້​ປືນ​ກວາດ​ຍິງ​ກັນ​ຕາມ​ສະຖານ​ທີ່​ສາທາລະນະ ​ແຕ່​ທີ່​ສະຫລົດ​ໃຈ​ແຮງ​ກໍ​ແມ່ນ​ການ​ຍິງ​ກັນ​ຢູ່​ຕາມ​ໂຮງຮຽນ ກໍ​ຄື​ສະ​ຖາ​ບັນ​ສຶກສາ​ ຈົນ​ທາງ​ການ ສ.​ອາ​ເມ​ລິ​ກາ ຕ້ອງ​ໄດ້​ປັບປຸງ​ກົດໝາຍ​ຄວບ​ຄຸມ​ອາວຸດ​ບໍ່​ແລ້ວ​ເປັນ​ຈັກ​ເທື່ອ. ປາກົດ​ວ່າ​ອະດີດ​ປະທານາທິບໍດີ ບາຣັກ ​ໂອ​ບາ​ມາ ​ເປັນ​ຜູ້ນຳ​ທີ່​ເອົາ​ຈິງ​ເອົາ​ຈັງ​ກ່ຽວ​ກັບ​ເລື່ອງ​ນີ້​ເປ​ັນພິ​ເສດ ​ແຕ່​ແລ້ວ​ພັດ​ມີ​ຂ່າວ​ອອກ​ມາ​ວ່າ ມະຫາວິທະຍາ​ໄລ​ເທັກ​ຊັສທີ່​ອອດ​ສະຕິ​ນ (University of Texas at Austin) ​ໄດ້​ອະນຸຍາດ​ໃຫ້​ນັກ​ສຶກສາ​ພົກ​ປືນ​ເຂົ້າ​ໄປ​ສະຖານ​ທີ່​ສຶກສາ​ໄດ້. ການ​ອະນຸຍາດ​ດັ່ງກ່າວ​ເປັນ​ໄປ​ຕາມ​ເນື້ອ​ໃນ​ຂອງ​ກົດໝາຍ​ທີ່​ທາງ​ການ​ຂອງ​ລັດ​​ໄດ້​ຮັບຮອງ​ເອົາ​ເມື່ອ​ເດືອນ​ສິງຫາ ປີ 2015 ທີ່​ອະນຸຍາດ​ໃຫ້​ຖື​ປືນ​ເຂົ້າ​ໄປ​ໃນ​ບັນດາ​ມະຫາວິທະຍາ​ໄລ​ຂອງ​ລັດ​ໄດ້ (ວຽງ​ຈັນ​ໃໝ່ 24/02/2016). ​ເຖິງ​ແມ່ນ​ວ່າ​ຄູ​ອາຈານ, ​ເຈົ້າໜ້າ​ທີ່​​ໂຮງຮຽນ, ກະ​ໂຕ​ນັກ​ສຶກສາ​ເອງ ກໍ​ຄື​ຜູ້​ປົກຄອງ​ຈະ​ຄັດຄ້ານ​ການ​ອະນຸຍາດ​ດັ່ງກ່າວ ​ແຕ່​ປະທານ​ຂອງ​ມະຫາວິທະຍາ​ໄລ​ກໍ​ບອກ​ວ່າ ຕ້ອງ​ປະຕິບັດ​ຈະ​ຝືນ​ກົດໝາຍ​ບໍ່​ໄດ້​ເດັດຂາດ. ກົດໝາຍ​ໄດ້​ກຳນົດ​ຂໍ້​ຍົກ​ເວັ້ນຈຳນວນ​ໜຶ່ງ​ ​ເຊັ່ນ​ຫ້າມ​ຖື​ປືນ​ເຂົ້າ​ໄປ​ໃນ​ບາງ​ສະຖານ​ທີ່​ຂອງ​ມະຫາວິທະຍາ​ໄລ ​ເຊັ່ນ​ບ່ອນ​ແຂ່ງຂັນ​ກິລາ, ຫ້ອງ​ອາຫານ, ຫ້ອງ​ທົດ​ລອງ​ດ້ານ​ວິຊາການ, ຫ້ອງການ​ແພດ, ຫ້ອງ​ສະໝຸດ ​ແລະ ຫໍ​ພັກ​ກິນ-ນອນ.

- lattana 1 - ກົດໝາຍ, ນະໂຍບາຍ ແລະ ມາດຕະການ ທີ່ມີຈິງແຕ່ອ່າວແປກ
error: Content is protected !!