5 ປີ ຕໍ່ໜ້າຫົວພັນວາງຄາດໝາຍ ດ້ານການລົງທຶນໃຫ້ໄດ້ 125 ໂຄງການ ມູນ184 ລ້ານໂດລາ ຫຼື ເທົ່າກັບ 1.564 ຕື້ກີບ
ໃນ 5 ປີ ຕໍ່ໜ້ານີ້, ແຂວງຫົວພັນ ມີຄວາມຕ້ອງການໃນການລົງທຶນ ນັບທັງການລົງທຶນຂອງລັດ, ການລົງທຶນຂອງພາກສ່ວນເອກະຊົນພາຍໃນ, ຕ່າງປະເທດ ແລະ ທຶນຊ່ວຍເຫຼືອທາງດ້ານການພັດທະນາ (ODA) ແລະ ການປ່ອຍສິນເຊື່ອຂອງທະນາຄານ, ອີງຕາມການສັງລວມຂໍ້ມູນແຜນພັດທະນາເສດຖະກິດ – ສັງຄົມ 5 ປີ ຄັ້ງທີ IX (2021-2025) ລວມຄວາມຕ້ອງການທັງໝົດ 3.801,34 ຕື້ກີບ ກວມເອົາ 20,22% ຂອງ GDP, ໃນນີ້ ການລົງທຶນຂອງລັດ ຄາດວ່າໃນ 5 ປີ ຕໍ່ໜ້າຈະໄດ້ຮັບທຶນອະນຸມັດຂອງລັດຈາກສະພາແຫ່ງຊາດທັງໝົດເປັນມູນຄ່າປະມານ 950 ຕື້ກີບ ກວມເອົາ 5,05% ຂອງGDP (ຄວາມຕ້ອງການພັດທະນາຂອງແຕ່ລະຂະແໜງການ ແລະ ເມືອງ), ສິ່ງທີ່ສໍາຄັນແມ່ນຈະເຮັດໃຫ້ທຸກໂຄງການໄດ້ຮັບການຈັດຕັ້ງປະຕິບັດຢ່າງມີປະສິດທິພາບ, ປະສິດທິຜົນສູງ, ໃຫ້ປະຊາຊົນໄດ້ຮັບຜົນປະໂຫຍດຈາກໂຄງການ ພ້ອມທັງໃຫ້ຖືກຕ້ອງຕາມລະບຽບການ ແລະ ກົດໝາຍທີ່ໄດ້ວາງໄວ້ ໂດຍຈະໄດ້ສັງລວມເປັນແຜນງານ, ໂຄງການລະອຽດ.
ສໍາລັບການລົງທຶນພາຍໃນ ແລະ ຕ່າງປະເທດ ຄາດວ່າຈະສາມາດອອກໃບອະນຸຍາດການລົງທຶນກິດຈະການສໍາປະທານໃຫ້ໄດ້ທັງໝົດປະມານ 125 ໂຄງການ ແລະ ຄາດວ່າຈະມີມູນຄ່າການລົງທຶນທັງໝົດປະມານ 184 ລ້ານໂດລາ ຫຼື ເທົ່າກັບ 1.564 ຕື້ກີບ, ກວມເອົາ 8,31% ຂອງ GDP, ຄາດວ່າຈະມີການລົງທຶນພາຍໃນປະມານ 50 ໂຄງການ ເປັນມູນຄ່າການລົງທຶນປະມານ 74 ລ້ານໂດລາ ແລະ ການລົງທຶນຈາກຕ່າງປະເທດ 75 ໂຄງການ ເປັນມູນຄ່າການລົງທຶນປະມານ 110 ລ້ານໂດລາ ແລະ ຈະສືບຕໍ່ສ້າງເງື່ອນໄຂອຳນວຍຄວາມສະດວກໃຫ້ແກ່ການລົງທຶນເພື່ອຫຼຸດຜ່ອນບັນຫາອຸດຕັນຕ່າງໆ ແລະ ສ້າງແຜນທີ່ຍຸດທະສາດກາຍຍະພາບ (2021-2025) ໃຫ້ສຳເລັດ. ສ້າງບັນຊີຮຽກການລົງທຶນເພື່ອຊຸກຍູ້ແລະ ສົ່ງເສີມໃຫ້ນັກທຸລະກິດພາຍໃນ ແລະ ຕ່າງປະເທດເຂົ້າມາລົງທຶນໃຫ້ໄດ້ທັງໝົດປະມານ 59 ໂຄງການ ຄາດວ່າຈະມີມູນຄ່າການລົງທຶນປະມານ 217,36 ຕື້ກີບ. ສ່ວນການທຶນຊ່ວຍເຫຼືອ ແລະ ກູ້ຢືມຈາກຕ່າງປະເທດ (ODA): ໃນ 5 ປີ ຕໍ່ຫນ້າ ຄາດວ່າຈະມີໂຄງການສືບຕໍ່ ແລະ ໂຄງການສະເໜີໃໝ່ທັງໝົດປະມານ 146 ໂຄງການ ເປັນມູນຄ່າ 822,08 ຕື້ກີບ ກວມເອົາ 4,37% ຂອງ GDP, ໃນນີ້: ທຶນຊ່ວຍເຫຼືອທີ່ຜ່ານລັດຖະບານ ODA 41ໂຄງການ ເປັນມູນຄ່າ 163,80 ຕື້ກີບ, ທຶນຊ່ວຍເຫຼືອທີ່ບໍ່ຜ່ານລັດຖະບານ NGO 4 ໂຄງການ ເປັນມູນຄ່າ 3,01 ຕື້ກີບ, ທຶນກູ້ຢືມ 3 ໂຄງການເປັນມູນຄ່າ 54,93 ຕື້ກີບ, ໃນນີ້ມີທຶນພາຍໃນ 18,03 ຕື້ກີບ, ທຶນກູ້ຢືມ 3,27 ຕື້ກີບ ແລະ ມີທຶນຊ່ວຍເຫຼືອ ODA ສົມທົບ33,62 ຕື້ກີບ. ທຶນຊ່ວຍເຫຼືອຈາກ ສສ ຫວຽດນາມ 4 ໂຄງການມູນຄ່າ 94,56 ຕື້ກີບ, ໃນນີ້, ມີທຶນພາຍໃນ 430 ລ້ານກີບ, ທຶນຊ່ວຍເຫຼືອຈາກ ສປ ຈີນ 94 ໂຄງການ ມູນຄ່າ 505,78 ຕື້ກີບ.
ການປ່ອຍສິນເຊຶ້ອຂອງທະນາຄານ ຄາດວ່າໃນ 5 ປີຕໍ່ໜ້າບັນດາທະນາຄານສາຂາແຂວງຫົວພັນ (ໃນ 4 ສາຂາ) ການປ່ອຍສິນເຊື່ອໃຫ້ໄດ້ທັງໝົດ 720,22 ຕື້ກີບ ກວມເອົາ 3,83% ຂອງ GDP.
