ຟີລິບປິນປະທ້ວງຮຽກຮ້ອງໃຫ້ລັດຖະມົນຕີກະຊວງສາທາລະນະສຸກລາອອກ ຫລັງບໍລິຫານງົບໂຄວິດຜິດພາດ ຍອດຕິດເຊື້ອສະສົມສູງເຖິງ 2 ລ້ານຄົນ
ວັນທີ 4 ກັນຍາ 2021, ບຸກຄະລາກອນທາງການແພດ ແລະ ເຈົ້າໜ້າທີ່ສາທາລະນະສຸກຂອງຟີລິບປິນອອກມາລວມຕົວກັນຊຸມນຸມປະທ້ວງ ຮຽກຮ້ອງໃຫ້ທ່ານ ຟຣານຊິສໂກ ດູເກ ລັດຖະມົນຕີກະຊວງສາທາລະນະສຸກລາອອກຈາກຕຳແໜ່ງ ຫລັງຖືກກ່າວຫາວ່າບໍລິຫານງົບໂຄງວິດຜິດພາດ, ບໍ່ໄດ້ຈັດສັນຄ່າຈ້າງ ແລະ ສະຫວັດດີການທີ່ແຮງງານໃນລະບົບສາທາລະນະສຸກຂອງປະເທດສົມຄວນຈະໄດ້ຮັບ.
ສ່ວນທ່ານ ດູເກ ປະຕິເສດ ຈະກ້າວລົງຈາກຕຳແໜ່ງ ພ້ອມຢືນຢັນວ່າ: ປະທານາທິບໍດີ ໂຣດຣິໂກ ດູເຕີເຕ ຍັງໄວ້ວາງໃຈທ່ານໃຫ້ບໍລິຫານແກ້ໄຂວິກິດໂຄວິດຂອງຟີລິບປິນຕໍ່ໄປ.
ຫລ້າສຸດ ຟີລິບປິນມີຍອດຜູ້ຕິດເຊື້ອສະສົມແລ້ວ 2.040.568 ຄົນ ເປັນຜູ້ຕິດເຊື້ອໃໝ່ໃນໄລຍະ 28 ວັນຜ່ານມາ 392.668 ຄົນ, ເສຍຊີວິດແລ້ວ 33.873 ຄົນ ຖືເປັນປະເທດທີ່ມີຜູ້ຕິດເຊື້ອສະສົມຫລາຍທີ່ສຸດເປັນອັນດັບ 2 ໃນອາຊຽນ ຮອງຈາກອິນໂດເນເຊຍທີ່ມີຍອດຜູ້ຕິດເຊື້ອສະສົມສູງເຖິງ 4.116.890 ຄົນແລ້ວ.
ໂດຍຟີລິບປິນຖືເປັນປະເທດທີ່ມີອັດຕາສ່ວນປະຊາກອນເຂົ້າຮັບວັກຊີນໜ້ອຍເປັນອັນດັບທ້າຍໆຂອງອາຊຽນ ນຳໜ້າພຽງມຽນມາທີ່ມີພົນລະເມືອງເຂົ້າຮັບວັກຊີນຄົບໂດສແລ້ວພຽງ 3,3% ເທົ່ານັ້ນ (21 ສິງຫາ). ຂະນະທີ່ທາງການເດີນໜ້າສັກວັກຊີນໄປແລ້ວ 34,11 ລ້ານໂດສ ມີພົນລະເມືອງປະມານ 16,8% ຂອງພົນລະເມືອງທົ່ວປະເທດທີ່ເຂົ້າຮັບວັກຊີນແລ້ວຢ່າງໜ້ອຍ 1 ເຂັມ. ຂະນະທີ່ມີພຽງ 12,7% ທີ່ເຂົ້າຮັບວັກຊີນຄົບໂດສແລ້ວ ແລະ ກຳລັງຢູ່ລະຫວ່າງພິຈາລະນາສັກວັກຊີນເຂັມກະຕຸ້ນວ່າມີຄວາມຈຳເປັນຫລາຍໜ້ອຍຊໍ່າໃດ.
ອ້າງອີງ:
- https://www.aljazeera.com/news/2021/9/2/filipino-health-workers-protest-neglect-as-delta-variant-surges
- https://coronavirus.jhu.edu/map.html
- https://www.reuters.com/world/asia-pacific/philippines-health-workers-protest-neglect-covid-19-strains-hospitals-2021-09-01/
