ໂຄວິດສາຍພັນ “Mu” ໜ້າກັງວົນສໍ່າໃດ ເມື່ອ WHO ເຝົ້າຕິດຕາມ ແຕ່ຍັງທຽບເດວຕາທີ່ຄອງອັດຕາການລະບາດທົ່ວໂລກບໍ່ໄດ້

September 10, 2021 - 2:32 PM

ໂຄວິດສາຍພັນ “Mu” ໜ້າກັງວົນສໍ່າໃດ ເມື່ອ WHO ເຝົ້າຕິດຕາມ ແຕ່ຍັງທຽບເດວຕາທີ່ຄອງອັດຕາການລະບາດທົ່ວໂລກບໍ່ໄດ້ - kitchen vibe - ໂຄວິດສາຍພັນ “Mu” ໜ້າກັງວົນສໍ່າໃດ ເມື່ອ WHO ເຝົ້າຕິດຕາມ ແຕ່ຍັງທຽບເດວຕາທີ່ຄອງອັດຕາການລະບາດທົ່ວໂລກບໍ່ໄດ້

ໄວຣັສໂຄວິດສາຍພັນ B.1.621 ຫລື ຮູ້ຈັກກັນໃນຊື່ສາຍພັນ “ມູ” ເປັສາຍພັນທີ່ໄດ້ຮັບການຈັດໃຫ້ຢູ່ໃນກຸ່ມ “ສາຍພັນທີ່ໜ້າສົນໃຈ” ຂອງອົງການອະນາໄມໂລກ (WHO) ມາແຕ່ວັນທີ 30 ສິງຫາ 2021 ຜ່ານມາ ພ້ອມມີລາຍງານຂ່າວວ່າ ອົງການອະນາໄມໂລກກຳລັງເຝົ້າຕິດຕາມໄວຣັສສາຍພັນນີ້ ທ່າມກາງການພົບຜູ້ຕິດເຊື້ອໃນພື້ນທີ່ຕ່າງໆຂອງໂລກ.

ຕອນນີ້ເຮົາຮູ້ຫຍັງກ່ຽວກັບເຊື້ອໄວຣັສສາຍພັນນີ້ແລ້ວແດ່ ?

ໂຄວິດສາຍພັນ “Mu” ໜ້າກັງວົນສໍ່າໃດ ເມື່ອ WHO ເຝົ້າຕິດຕາມ ແຕ່ຍັງທຽບເດວຕາທີ່ຄອງອັດຕາການລະບາດທົ່ວໂລກບໍ່ໄດ້ - Visit Laos Visit SALANA BOUTIQUE HOTEL - ໂຄວິດສາຍພັນ “Mu” ໜ້າກັງວົນສໍ່າໃດ ເມື່ອ WHO ເຝົ້າຕິດຕາມ ແຕ່ຍັງທຽບເດວຕາທີ່ຄອງອັດຕາການລະບາດທົ່ວໂລກບໍ່ໄດ້

ລາຍງານດ້ານລະບາດວິທະຍາຈາກອົງການອະນາໄມໂລກປະຈຳອາທິດ ໃນວັນທີ 31 ສິງຫາ 2021 ລະບຸວ່າ: “ມູ” ເປັນຊື່ສາຍພັນທີ່ອົງການອະນາໄມໂລກກຳນົດໃຫ້ເຊື້ອສາຍພັນ 1.621 ແລະ ເຊື້ອສາຍພັນນີ້ຍັງພົບສາຍພັນຍ່ອຍ B.1.621.1 ນຳອີກ.
ເຊື້ອສາຍພັນນີ້ຖືກພົບຄັ້ງທຳອິດໃນເດືອນມັງກອນ 2021 ຢູ່ປະເທດໂຄລອມເບຍ ຫລັງຈາກນັ້ນມີການພົບຜູ້ຕິດເຊື້ອສາຍພັນນີ້ເລື້ອຍມາ ແລະ ມີລາຍງານການລະບາດຂະໜາດໃຫຍ່ກວ່າຈາກປະເທດອື່ນໆໃນທະວີບອາເມລິກາໃຕ້ ແລະ ເອີຣົບ. ລາຍງານສະບັບນີ້ຍັງອ້າງອີງຂໍ້ມູນຂອງເວັບໄຊ GISAID ເຊິ່ງເປັນຂໍ້ລິເລີ່ມເພື່ອການແບ່ງປັນຂໍ້ມູນໄວຣັສໃນພະຍາດລະບາດ ທີ່ພົບວ່າມີການອັບໂຫລດລຳດັບຈີໂນມຂອງເຊື້ອສາຍພັນນີ້ແລ້ວຈາກ 39 ປະເທດທົ່ວໂລກ.
ເຊື້ອສາຍພັນມູມີກຸ່ມຂອງການກາຍພັນທີ່ບົ່ງຊີ້ຄຸນສົມບັດທີ່ເປັນໄປໄດ້ໃນການຫລີກລ່ຽງພູມຕ້ານທານ ແລະ ຂໍ້ມູນເບື້ອງຕົ້ນທີ່ຖືກນຳສະເໜີຕໍ່ຄະນະດ້ານວິວັດທະນາການຂອງໄວຣັສ (Virus Evolution Working Group) ສະແດງໃຫ້ເຫັນເຖິງການຫລຸດລົງຂອງຄວາມສາມາດໃນການລົບລ້າງລິດຂອງເຊຣຳຂອງຜູ້ຕິດເຊື້ອທີ່ຫາຍຈາກພະຍາດ ແລະ ຜູ້ທີ່ໄດ້ຮັບວັກຊີນແລ້ວຄືກັບທີ່ພົບໃນເຊື້ອສາຍພັນເບຕາ. ເຖິງຢ່າງໃດກໍຕາມ, ຂໍ້ມູນສ່ວນນີ້ຍັງຕ້ອງລໍຖ້າການຢືນຢັນຈາກການສຶກສາອື່ນຕໍ່ໄປ.
ລາຍງານຂອງອົງການອະນາໄມໂລກສະບັບນີ້ຍັງລະບຸວ່າ: ເຖິງວ່າຄວາມຊຸກຂອງເຊື້ອສາຍພັນນີ້ໃນໝູ່ເຊື້ອທີ່ມີການຖອດລະຫັດແລ້ວທົ່ວໂລກຈະຫລຸດລົງ ແລະ ຢູ່ລະດັບຕໍ່າກວ່າ 0,1% ແລ້ວ, ແຕ່ຄວາມຊຸກໃນໂຄລອມເບຍ ເຊິ່ງຢູ່ທີ່ 39% ແລະ ເອກົວດໍ ຢູ່ທີ່ 13% ມີທ່າອ່ຽງເພີ່ມຂຶ້ນຢ່າງສະໝໍ່າສະເໝີ. ເຖິງຢ່າງໃດກໍຕາມ, ມີໝາຍເຫດວ່າ ຄວາມຊຸກທີ່ມີການລາຍງານນີ້ຄວນຖືກຕີຄວາມດ້ວຍການພິຈາລະນາທີ່ເໝາະສົມຕໍ່ຂໍ້ຈຳກັດໃນການເຝົ້າລະວັງຕ່າງໆ ເຊິ່ງລວມທັງຄວາມສາມາດໃນການຖອດລະຫັດພັນທຸກຳ ແລະ ຄວາມ “ຖືກເວລາ” ຂອງການແບ່ງປັນຂໍ້ມູນ ເຊິ່ງແຕ່ລະປະເທດຈະມີຂໍ້ຈຳກັດເຫລົ່ານີ້ທີ່ແຕກຕ່າງກັນໄປ.
ນອກຈາກນີ້ ລາຍງານຍັງບອກອີກວ່າ ລັກສະນະທາງຄລີນິກ ແລະ ຟີໂນໄທຂອງເຊື້ອສາຍພັນນີ້ຍັງຕ້ອງມີການສຶກສາກັນຕໍ່ ແລະ ລວມທັງຕ້ອງຕິດຕາມດ້ານລະບາດວິທະຍາຂອງເຊື້ອສາຍພັນນີ້ໃນອາເມລິກາໃຕ້ ໂດຍສະເພາະຕໍ່ການລະບາດຮ່ວມກັບເຊື້ອສາຍພັນເດວຕາ.
ທ່ານ ແອນໂທນີ ເຟົາຊີ ຜູ້ຊ່ຽວຊານດ້ານພະຍາດຕິດຕໍ່ຊັ້ນນຳຂອງອາເມລິກາ ລະບຸໃນວັນທີ 2 ກັນຍາວ່າ: ພາຍໃນອາເມລິການັ້ນ ເຊື້ອສາຍພັນມູຍັງບໍ່ແມ່ນ “ໄພຄຸກຄາມໂດຍທັນທີໃນປັດຈຸບັນ”. ທ່ານຍັງລະບຸວ່າ: ເຖິງວ່າລັດຖະບານອາເມລິກາກຳລັງເຝົ້າຕິດຕາມສາຍພັນນີ້ຢ່າງໃກ້ຊິດ, ແຕ່ສາຍພັນດັ່ງກ່າວຍັງບໍ່ໃກ້ຄຽງກັບການເປັນສາຍພັນຫລກພາຍໃນປະເທດ ເພາະສາຍພັນເດວຕາຍັງເປັນສາເຫດຂອງການຕິດເຊື້ອກວ່າ 99% ໃນອາເມລິກາ. ທັງນີ້ ສູນຄວບຄຸມ ແລະ ປ້ອງກັນພະຍາດອາເມລິກາ (CDC) ລະບຸຂໍ້ມູນທີ່ໄດ້ຈາກການໃຊ້ແບບຈຳລອງໃນການຕີລາຄາອັດຕາສ່ວນຫລ້າສຸດຂອງການລະບາດຂອງເຊື້ອສາຍພັນຕ່າງໆວ່າ: ໃນວັນທີ 22-28 ສິງຫາ ເຊື້ອສາຍພັນເດວຕາ (1.617.2 ທີ່ບໍ່ລວມ AY.1 ແລະ AY.2) ມີອັດຕາສ່ວນການລະບາດເຖິງ 99,1% ໃນອາເມລິກາ.
ເຖິງຢ່າງໃດກໍຕາມ, ທ່ານ ເຟົາຊີ ບອກວ່າ: ຂໍ້ມູນທີ່ຊີ້ວ່າເຊື້ອສາຍພັນນີ້ສາມາດຫລີກລ່ຽງແອນຕິບໍດີບາງຊະນິດນັ້ນ ສ່ວນຫລາຍມາຈາກຫ້ອງປະຕິບັດການ, ແຕ່ປັດຈຸບັນພວກເຮົາຍັງຂາດຂໍ້ມູນທາງຄລີນິກ ແລະ ງານວິໄຈອື່ນທີ່ກ່ຽວຂ້ອງກັບຄົນ ເຊິ່ງສະແດງເຖິງຂໍ້ຄວາມຈິງນີ້, ແຕ່ທ່ານເນັນວ່າ: ໂດຍທົ່ວໄປວັກຊີນຍັງມີປະສິດທິພາບ ແລະ ໃຫ້ການປ້ອງກັນຕໍ່ເຊື້ອໂຄວິດໄດ້ດີທີ່ສຸດ.
ລາຍງານຂ່າວຈາກ The Washington Post ເມື່ອວັນທີ 3 ກັນຍາ ລະບຸວ່າ: ມີບໍລິສັດຜູ້ຜະລິດວັກຊີນ ຄືບໍລິສັດ Pfizer ທີ່ອອກມາລະບຸກັບ The Washington Post ວ່າ: ກຳລັງສຶກສາເຊື້ອສາຍພັນນີ້ ແລະ ຄາດວ່າຈະສາມາດໃຫ້ຂໍ້ມູນກັບວາລະສານທາງວິຊາການທີ່ຜ່ານການພິຈາລະນາກວດສອບ (Peer Reviewed Journal) ໄດ້ໃນໄວໆນີ້.
The Washington Post ຍັງລາຍງານຄຳໃຫ້ສຳພາດຂອງທ່ານ ປາອູລ ກາຣເດນັສ ສາສະດາຈານດ້ານພະຍາດຕິດເຊື້ອ ແລະ ຈີໂນມິກ ຈາກມະຫາວິທະຍາໄລ Universidad San Fracisco de Quito ໃນເອກົວດໍ ທີ່ສຶກສາເຊື້ອສາຍພັນນີ້ ແລະ ລະບຸວ່າ: ຈາກຫລັກຖານທີ່ປາກົດໃນປັດຈຸບັນ ເຊື້ອສາຍພັນນີ້ຈະແຜ່ເຊື້ອໄດ້ງ່າຍກວ່າເຊື້ອໂຄວິດສາຍພັນດັ້ງເດີມ ແລະ ລະບຸວ່າ: ສາຍພັນມູສາມາດຈະມີປະສິດທິພາບເໜືອກວ່າສາຍພັນແກມມາ ແລະ ອັລຟາໃນພື້ນທີ່ສ່ວນຫລາຍຂອງເອກົວດໍ ແລະ ໂຄລອມເບຍ. ເຖິງຢ່າງໃດກໍຕາມ, ທ່ານບອກວ່າ: “ຍັງບໍ່ມີສັນຍານໃດ” ທີ່ສະແດງວ່າຄົນຄວນກັງວົນຫລາຍຂຶ້ນ. ສາຍພັນເຫລົ່ານີ້ເກີດຂຶ້ນຕະຫລອດເວລາ ແລະ ເປັນສິ່ງສຳຄັນທີ່ໄວຣັສເຫລົ່ານີ້ຈະມີລັກສະນະສະເພາະເພື່ອການຕິດຕາມຢູ່ແລ້ວ.
ຂະນະທີ່ຫລ້າສຸດ ນາງ ດຣ. ມາເຣຍ ແວນ ເຄິດໂຮບ ຫົວໜ້າທີມເຕັກນິກສຳລັບໂຄວິດ-19 ຂອງອົງການອະນາໄມໂລກ ກ່າວໃນການຕອບຄຳຖາມຜ່ານລະບົບອອນລາຍຂອງອົງການອະນາໄມໂລກ ເມື່ອວັນທີ 7 ກັນຍາ ອະທິບາຍເຖິງເຊື້ອສາຍພັນນີ້ວ່າ: ໃນບາງປະເທດໃນອາເມລິກາໃຕ້ພົບອັດຕາສ່ວນການລະບາດເພີ່ມຂຶ້ນ, ແຕ່ພາກພື້ນອື່ນໆຂອງໂລກພົບອັດຕາການລະບາດໜ້ອຍລົງ ໂດຍສະເພາະໃນພື້ນທີ່ທີ່ສາຍພັນເດວຕາລະບາດຢູ່. ນາງພະຍາຍາມໃຫ້ຄວາມໝັ້ນໃຈວ່າ: ມີຄົນຈຳນວນຫລາຍກຳລັງສຶກສາໄວຣັສຊະນິດນີ້ຢູ່ ແລະ ເນັ້ນວ່າ: ບໍ່ວ່າຈະເປັນສາຍພັນເດວຕາ, ມູ ຫລື ສາຍພັນອື່ນໃດໃນອະນາຄົດ ພວກເຮົາຍັງສາມາດຄວບຄຸມກ່ຽວກັບການເຮັດໃຫ້ຕົນເອງປອດໄພໄດ້ ເຊິ່ງວັກຊີນກໍເປັນທາງອອກໜຶ່ງ.
ແລະ ທ່ານ ດຣ. ໄມ ໄຣອັນ ຫົວໜ້າໂຄງການສຸກເສີນດ້ານສຸຂະພາບຂອງ WHO ລະບຸວ່າ: ໄວຣັສສາຍພັນໃໝ່ທີ່ເກີດຂຶ້ນຈະຕ້ອງແຂ່ງຂັນກັບໄວຣັສທີ່ເປັນ “ອັນດັບໜຶ່ງ” ເຊິ່ງໃນປັດຈຸບັນຄືສາຍພັນເດວຕາ ແລະ ເດວຕາກໍມີທ່າອ່ຽງຈະ “ມີປະສິດທິພາບເໜືອກວ່າ” ສາຍພັນອື່ນໆ ເຊັ່ນສາຍພັນມູນຳອີກ.