ຝົນຕົກໜັກຕິດຕໍ່ກັນຫຼາຍຊົ່ວໂມງ ເຮັດໃຫ້ນໍ້ານອງ ຢູ່ເຂດບ້ານຫ້ວຍແສງ ເມືອງເລົ່າງາມ

ວັນທີ 24 ກັນຍາ 2021 ປະຊາຊົນ ໄດ້ລາຍງານໃນເຊົ້າ ວ່າ: ບ້ານຫ້ວຍແສງ ເມືອງເລົ່າງາມ ແຂວງ ສາລະວັນ ມີຝົນຕົກຕິດຕໍ່ກັນຫຼາຍຊົ່ວໂມງ ເຮັດໃຫ້ນໍ້າປ່າໄຫຼນອງ ເຂົ້າບ້ານເຮືອນປະຊາຊົນຢູ່ບ້ານຫ້ວຍແສງ ເຊິ່ງໄດ້ຮັບຜົນກະທົບໜັກ ແຕ່ຍັງບໍ່ມີການປະເມີນເທື່ອ.

ກ່ອນໜ້ານີ້ ກົມອຸຕຸນິຍົມ ແລະ ອຸທົກກະສາດ ແຈ້ງເຕືອນພາຍຸດີເປຼຊັນຈະເຄື່ອນທີ່ຂຶ້ນຝັ່ງເຂດເມືອງດານັງ ຂອງປະເທດຫວຽດນາມໃນຕອນເຊົ້າຂອງວັນທີ 24 ກັນຍາ 2021 ຈາກນັ້ນຈະສືບຕໍ່ເຄື່ອນທີ່ຜ່ານແຂວງສາລະວັນ ແລະ ສະຫວັນນະເຂດ ເຊິ່ງຈະເຮັດໃຫ້ມີຝົນຕົກໃນລະດັບປານກາງຫາຕົກໜັກ ພ້ອມມີລົມພັດແຮງຢູ່ບາງທ້ອງຖິ່ນແຂວງພາກໃຕ້, ພາກກາງ ແລະ ພາກເໜືອດ້ານຕາເວັນຕົກ
ໄລຍະວັນທີ 23-25 ກັນຍາ 2021: ຈະມີຝົນຕົກໜັກ ຫາ ໜັກຫຼາຍ ແລະ ລົມພັດແຮງ ຢູ່ບາງທ້ອງຖິ່ນເຂດພາກໃຕ້ ແລະພາກກາງ ເຊັ່ນ: ແຂວງ ອັດຕະປື, ຈຳປາສັກ, ເຊກອງ, ສາລະວັນ ແລະ ສະຫວັນນະເຂດ ຊຶ່ງຈະເຮັດໃຫ້ເກີດມີຕົ້ນໄມ້ຫັກລົ້ມ, ຫຼັງຄາເຮືອນເປ່ເພ, ນໍ້າຖ້ວມອັ່ງ ແລະ ນໍ້າຖ້ວມຍື່ງ ຢູ່ບາງທ້ອງຖິ່ນ