YouTube ປະກາດນະໂຍບາຍໃໝ່ ກຽມລົບວິດີໂອທັງໝົດ ທີ່ມີເນື້ອໃນຕໍ່ຕ້ານວັກຊີນ

ວັນທີ 29 ກັນຍາ 2021, YouTube ຜູ້ໃຫ້ບໍລິການເວັບໄຊເຜີຍແຜ່ວິດີໂອຊື່ດັງ ປະກາດນະໂຍບາຍໃໝ່ ເລື່ອງ ການແກ້ໄຂເນື້ອໃນທີ່ບໍ່ຖືກຕ້ອງກ່ຽວກັບວັກຊີນ ຜ່ານ Blog ຂອງທາງບໍລິສັດ ໂດຍກຽມລົບເນື້ອໃນທີ່ບໍ່ຖືກຕ້ອງກ່ຽວກັບວັກຊີນທີ່ຜ່ານການຮັບຮອງທຸກຊະນິດ ເຊິ່ງຄວບຄຸມເຖິງວັກຊີນທີ່ຜ່ານການຮັບຮອງມາດົນແລ້ວເຊັ່ນ: ວັກຊີນປ້ອງກັນພະຍາດຫັດອີສຸກອີໃສ ຫລື ໄວຣັສຕັບອັກເສບບີ ບໍ່ສະເພາະວັກຊີນປ້ອງກັນໂຄວິດ.

YouTube ຢືນຢັນວ່າ: ວິດີໂອທີ່ມີເນື້ອໃນບໍ່ຖືກຕ້ອງເຊັ່ນ: ລະບຸວ່າວັກຊີນທີ່ຜ່ານການຮັບຮອງແລ້ວເປັນສາເຫດໃຫ້ເກີດພະຍາດອໍທິສະຕິກ, ມະເຮັງ ຫລື ມີລູກຍາກ ຈະຖືກລົບອອກຈາກແພກຟອມຂອງບໍລິສັດ.

ນະໂຍບາຍໃໝ່ຂອງ YouTube ຍັງລວມເຖິງການລົບຊ່ອງຂອງອິນຟລູເອນເຊີ ຫລື ນັກເຄື່ອນໄຫວຕໍ່ຕ້ານວັກຊີນເຊັ່ນ: ດຣ. ໂຈເຊບ ເມີໂຄລາ ແພດພະຍາດກະດູກຊາວອາເມລິກາທີ່ມີຜູ້ຕິດຕາມຈຳນວນຫລາຍ ແລະ ໂຣເບີດ ເອັຟ. ເຄນເນຕີ ຈູເນຍ ທະນາຍຄວາມສິ່ງແວດລ້ອມຊາວອາເມລິກາ.

“ພວກເຮົາກຳລັງຂະຫຍາຍນະໂຍບາຍຂອງເຮົາເລື່ອງການໃຫ້ຂໍ້ມູນທາງການແພດຜິດໆໃນ YouTube ດ້ວຍແນວທາງໃໝ່ກ່ຽວກັບການໃຫ້ວັກຊີນໃນປັດຈຸບັນ ເຊິ່ງຜ່ານການຮັບຮອງ ແລະ ຢືນຢັນຄວາມປອດໄພ ແລະ ປະສິດທິພາບໂດຍໜ່ວຍງານສາທາລະນະສຸກທ້ອງຖິ່ນ ແລະ ອົງການອະນາໄມໂລກ” ປະກາດຂອງ YouTube ລະບຸ.

ຜ່ານມາ YouTube ເຊິ່ງເປັນບໍລິສັດລູກຂອງ Google ຖືກວິພາກວິຈານຢ່າງໜັກຈາກກໍລະນີບໍ່ດຳເນີນມາດຕະການໃດໆ ເພື່ອຕໍ່ຕ້ານການເຜີຍແຜ່ຂໍ້ມູນດ້ານສຸຂະພາບຜິດໆຜ່ານແພກຟອມຂອງຕົນ.

ເຊິ່ງໃນເດືອນກໍລະກົດຜ່ານມາ, ປະທານາທິບໍດີ ໂຈ ໄບເດນ ຂອງອາເມລິກາ ກ່າວເຖິງແພກຟອມໂຊຊຽວມີເດຍຕ່າງໆວ່າ: ມີສ່ວນຮັບຜິດຊອບຫລາຍຕໍ່ຄວາມສົງໄສ ແລະ ບໍ່ໝັ້ນໃຈຂອງປະຊາຊົນໃນການເຂົ້າຮັບການສັກວັກຊີນ ເຊິ່ງເປັນຜົນຈາກການເຜີຍແຜ່ຂໍ້ມູນຜິດໆ ໂດຍທ່ານ ໄບເດນ ຮຽກຮ້ອງໃຫ້ແພກຟອມເຫລົ່ານີ້ແກ້ໄຂບັນຫາທີ່ເກີດຂຶ້ນ.

ກ່ອນໜ້ານີ້ YouTube ເຜີຍວ່າ: ມີວິດີໂອ 130.000 ກວ່າລາຍການ ຖືກລົບອອກຈາກແພກຟອມນັບແຕ່ປີຜ່ານມາ ໃນຊ່ວງທີ່ມີການດຳເນີນມາດຕະການຫ້າມເນື້ອໃນທີ່ເຜີຍແຜ່ຂໍ້ມູນຜິດໆກ່ຽວກັບວັກຊີນໂຄວິດ.

ການເຄື່ອນໄຫວຂອງ YouTube ຄັ້ງນີ້ຍັງຄືກັບແນວທາງຂອງ Facebook ທີ່ປະກາດໃນເດືອນກຸມພາວ່າ: ຈະຫ້າມການເຜີຍແຜ່ເນື້ອໃນ ແລະ ຂໍ້ມູນຜິດໆ ວ່າວັກຊີນບໍ່ມີປະສິດທິພາບ ຫລື ກໍ່ໃຫ້ເກີດພະຍາດຮ້າຍແຮງ.

ເຊິ່ງໃນເດືອນມີນາ Twitter ຍັງປະກາດວ່າ: ຜູ້ໃຊ້ງານທີ່ເຜີຍແຜ່ຂໍ້ມູນຜິດໆກ່ຽວກັບວັກຊີນຫລາຍຄັ້ງຈະຖືກຫ້າມຈາກແພດຟອມຂອງບໍລິສັດ.

ເຖິງຢ່າງໃດກໍຕາມ, YouTube ຢືນຢັນວ່າ: ວິດີໂອທີ່ມີເນື້ອໃນກ່ຽວກັບນະໂຍບາຍວັກຊີນ, ການທົດລອງວັກຊີນໃໝ່ ແລະ ວິດີໂອປະຫວັດສາດກ່ຽວກັບຜົນສຳເລັດ ຫລື ຄວາມລົ້ມເຫລວຂອງວັກຊີນ ຈະຍັງໄດ້ຮັບອະນຸຍາດໃຫ້ເຜີຍແຜ່ໃນເວັບໄຊ.

ອ້າງອີງ:

https://edition.cnn.com/…/youtube-vaccine…/index.html

https://www.bbc.com/news/technology-58743252

https://www.nytimes.com/…/youtube-anti-vaxx-ban.html