ທ່ານ ນາຍົກລັດຖະມົນຕີ ຝາກຄຳເຫັນ ຜ່ານສື່ມວນຊົນ ເຖິງປະຊາຊົນບັນດາເຜົ່າ
ວັນທີ 6 ຕຸລາ 2021 ທີ່ສຳນັກງານນາຍົກລັດຖະມົນຕີ, ທ່ານ ພັນຄຳ ວິພາວັນ, ນາຍົກລັດຖະ ມົນຕີ ໄດ້ໃຫ້ກຽດພົບສື່ມວນຊົນລາວໃນທົ່ວປະເທດ ຜ່ານລະບົບກອງປະຊຸມທາງໄກ ເພື່ອມີຄຳເຫັນຕໍ່ບັນຫາ ທີ່ຕິດພັນໂດຍກົງ ແລະ ປິ່ນອ້ອມ ກັບການແຜ່ລະບາດ ຂອງພະຍາດໂຄວິດ-19 ຜ່ານສື່ມວນຊົນ ຝາກໄປເຖິງປະຊາຊົນລາວບັນດາເຜົ່າ ເພື່ອຮັບຮູ້ ແລະ ເຂົ້າໃຈ ສະພາບຄວາມເປັນຈິງ ຂອງການແຜ່ລະບາດ ຂອງພະຍາດໂຄວິດ-19 ແລະ ຜົນກະທົບທີ່ເກີດຂຶ້ນ ໃນໂລກ, ພາກພື້ນ ກໍຄື ສປປ ລາວ ຊຶ່ງທ່ານ ນາຍົກລັດຖະມົນຕີ ໄດ້ເນັ້ນໃນ 4 ຈຸດ ຄື: ຄວາມຮຸນແຮງຂອງພະຍາດໂຄວິດ-19; ຜົນກະທົບ ແລະ ຄວາມເສຍຫາຍ ຕໍ່ມະນຸດ; ການສະກັດກັ້ນ, ຕ້ານ ແລະ ແກ້ໄຂການແຜ່ລະບາດ ຂອງພະຍາດໂຄວິດ-19 ໄລຍະຜ່ານມາ, ປັດຈຸບັນ ແລະ ແຜນການຕໍ່ໜ້າ; ແລະ ການດໍາລົງຊີວິດປົກກະຕິແບບໃໝ່ ເປັນແນວໃດ.
ກ່ອນອື່ນ, ທ່ານນາຍົກລັດຖະມົນຕີ ໄດ້ຕີລາຄາສູງ ຕໍ່ພາລະບົດບາດ ແລະ ຄວາມສຳຄັນ ຂອງສື່ມວນຊົນ ວ່າ “ສື່ມວນຊົນ ເປັນຂົວຕໍ່ໃນການນຳເອົາຂໍ້ມູນຂ່າວສານ ຄວາມເປັນຈິງຕ່າງໆ ກ່ຽວກັບແນວທາງນະໂຍບາຍຂອງພັກ, ກໍ່ຄືແຜນນະໂຍບາຍ ແລະ ລະບຽບກົດໝາຍຂອງລັດ ໄປສູ່ປະຊາຊົນ. ພ້ອມກັນນັ້ນ ກໍ່ນຳເອົາສະພາບຄວາມເປັນຈິງ, ຄວາມຄິດຄວາມເຫັນ ຕະຫຼອດຮອດຄວາມມຸ່ງມາດປາຖະໜາຂອງປະຊາຊົນ ທີ່ ສ່ອງແສງໃຫ້ແກ່ ການນຳພັກ-ລັດ ຮັບຊາບ ເພື່ອນຳໄປພິຈາລະນາ ກຳນົດ, ປັບປຸງ ແນວທາງ ກໍຄື ແຜນພັັດທະນາເສດຖະກິດ-ສັງຄົມ ຂອງຊາດ ໃຫ້ສົມບູນຂຶ້ນຕື່ມ ເພື່ອຜົນປະໂຫຍດຂອງຊາດ-ຂອງປະຊາຊົນເຮົາ. ນອກນັ້ນ ກໍ່ຍັງເປັນຂົວຕໍ່ລະຫວ່າງ ປະຊາຊົນ ກັບ ປະຊາຊົນ ໃຫ້ໄດ້ຮັບຮູ້ສະພາບຂໍ້ມູນຂ່າວສານ ເຊິ່ງກັນ ແລະ ກັນ”.
ຕໍ່ກັບລະດັບຄວາມຮຸນແຮງ ຂອງພະຍາດໂຄວິດ-19, ທ່ານ ໄດ້ຍົກໃຫ້ເຫັນຕົວເລກ ຂອງການຕິດເຊື້ອ ແລະ ເສຍຊີວິດ ຢູ່ໃນໂລກ ກໍຄືບາງປະເທດ ແລະ ສປປ ລາວ ໂດຍທຽບໃສ່ຕົວເລກ ຂອງພົນລະເມືອງປະເທດນັ້ນໆ. ສຳລັບ ຜົນກະທົບ ແລະ ຄວາມເສຍຫາຍ ຈາກການແຜ່ລະບາດຂອງ ພະຍາດດັ່ງກ່າວ ແມ່ນໄດ້ສ້າງຄວາມເສຍຫາຍຈໍານວນຫຼວງຫຼາຍ ເປັນຕົ້ນ ຊີວິດ, ເສດຖະກິດຂອງໂລກຖົດຖອຍ ບໍ່ບັນລຸຕາມເປົ້າໝາຍ, ໄດ້ປ່ຽນແປງການດຳລົງຊີວິດ-ວິຖີຊີວິດ ຂອງປະຊາຊົນ ຢ່າງສິ້ນເຊີງ ຈາກໜ້າມືເປັນຫຼັງມື ໂດຍສະເພາະ ການດຳລົງຊີວິດປະຈໍາວັນ ແລະ ການປະຕິບັດຮີດຄອງປະເພນີ. ສ່ວນການສະກັດກັ້ນ, ຕ້ານ ແລະ ແກ້ໄຂ ການແຜ່ລະບາດ ຂອງພະຍາດໂຄວິດ-19 ໄລຍະຜ່ານມາ, ປັດຈຸບັນ ແລະ ອະນາຄົດ, ທ່ານ ນາຍົກລັດຖະມົນຕີ ໄດ້ກ່າວວ່າ ພາຍຫຼັງທີ່ເກີດມີການລະບາດຂອງພະຍາດໂຄວິດ-19 ວົງຄະນະຍາດສາກົນ ໄດ້ສຸມສະຕິປັນຍາ ແລະ ຄວາມສາມາດ ເຂົ້າໃນການຄົ້ນຄວ້າ ເພື່ອຫາວິທີແກ້ໄຂ ໃຫ້ກັບມາສູ່ສະພາບປົກກະຕິ ໂດຍສະເພາະ ປະເທດທີ່ມີທ່າແຮງ ແລະ ເງື່ອນໄຂ ໂດຍກຳນົດມາດຕະການ ແລະ ນະໂຍບາຍຕ່າງໆອອກມາ, ໜຶ່ງໃນນັ້ນ ກໍໄດ້ຄົ້ນຄວ້າຜະລິດວັກຊີນປ້ອງກັນ, ພ້ອມກັນນີ້ ປະເທດທີ່ມີເງື່ອນໄຂ ກໍ່ຍັງໄດ້ໃຫ້ການຊ່ວຍ ເຫຼືອປະເທດອື່ນໆ. ສະເພາະ ສປປ ລາວ ຍ້ອນມີແນວທາງນະໂຍບາຍການຕ່າງປະເທດທີ່ຖືກຕ້ອງ ຈຶ່ງໄດ້ຮັບການຊ່ວຍ ເຫຼືອຈາກຫຼາຍປະເທດ ແລະ ອົງການຈັດຕັ້ງສາກົນ ເປັນຕົ້ນ ວັກຊີນປ້ອງກັນ, ຢາປົວພະຍາດ, ທຶນຮອນ, ອຸປະກອນ, ໃຫ້ຄໍາປຶກສາ ແລະ ສົ່ງອາສາສະໝັກຊ່ຽວຊານມາຊ່ວຍເຫຼືອ. ໂດຍລວມແລ້ວ ທຸກປະເທດ ແມ່ນໄດ້ກຳນົດ 3 ມາດຕະ ການ ຄື: ມາດຕະການດ້ານການແພດ, ມາດຕະການດ້ານບໍລິຫານ ແລະ ມາດຕະການດ້ານເສດຖະກິດ, ຊຶ່ງຈະເຮັດໃນລະດັບໃດ ແມ່ນຂຶ້ນກັບສະພາບຈຸດພິເສດຂອງແຕ່ລະປະເທດ. ສໍາລັບ ສປປ ລາວ ຕ້ອງຮັບຮູ້ນໍາກັນວ່າ ປະເທດເຮົາ ຍັງມີຄວາມຫຍຸ້ງຍາກທາງດ້ານເສດຖະກິດ-ການເງິນ, ຍ້ອນແນວນັ້ນ ລັດຖະບານ ຈຶ່ງວາງແນວທາງ ແລະ ກໍານົດມາດຕະ ການ ເພື່ອໃຫ້ສອດຄ່ອງກັບສະພາບຕົວຈິງຂອງປະເທດເຮົາ, ສຳຄັນ ແມ່ນໄດ້ກຳນົດເອົາການປ້ອງກັນ ແລະ ສະກັດກັ້ນ ເປັນຕົ້ນຕໍ, ເອົາການປິ່ນປົວແກ້ໄຂເປັນສໍາຄັນ, ຖືເອົາການນໍາພາເປັນເອກະພາບຂອງພັກ, ການບັນຊາບໍລິຫານຂອງລັດຖະບານ ແລະ ການເຂົ້າຮ່ວມຂອງປະຊາຊົນ ເປັນປັດໃຈຕັດສີນຜົນສຳເລັດ ແລະ ການຊ່ວຍເຫຼືອຂອງເພື່ອນມິດ ແລະ ອົງການຈັດຕັ້ງສາກົນ ເປັນປັດໄຈທີ່ຂາດບໍ່ໄດ້ ຕໍ່ຜົນສຳເລັດ, ຍ້ອນແນວນີ້ ລັດຖະບານ ຈຶ່ງມີກົນໄກ ແລະ ສະດຸ້ງໄວ ເພື່ອແກ້ໄຂແຕ່ຫົວທີ ໂດຍໄດ້ແຕ່ງຕັ້ງຄະນະສະເພາະກິດ ຢູ່ສູນກາງ ແລະ ທ້ອງຖິ່ນ, ມີການສ້າງຕັ້ງສູນກັກກັນ, ສູນປິ່ວປົວຊົ່ວຄາວ (ໂຮງໝໍພາກສະໜາມ), ດຳເນີນການສັກວັກຊີນໃຫ້ໄດ້ຢ່າງໜ້ອຍ 50% ຂອງພົນລະເມືອງ ໃນປີ 2021. ສຳລັບນະໂຍບາຍສັກວັກຊີນຢູ່ປະເທດເຮົາ ແມ່ນສະເໝີພາບ ຕາມຫຼັກການແພດ ບໍ່ມີການແບ່ງຊັ້ນວັນນະ, ຊຶ່ງໃນປີ 2021 ນີ້ ຮັບປະກັນ ຈະບັນລຸຕາມຄາດໝາຍທີ່ກຳນົດໄວ້. ສຳລັບຄວາມໝາຍຂອງການດຳລົງຊີວິດປົກກະຕິແບບໃໝ່, ເວົ້າລວມ ໝາຍເຖິງພວກເຮົາຕ້ອງດໍາລົງຊີວິດໃຫ້ໄດ້ ດ້ວຍຄວາມປອດໄພທັງຊີວິດ ແລະ ຊັບສິນ ໃນເງື່ອນໄຂສະພາບພະຍາດໂຄວິດ-19 ລະບາດ, ເວົ້າສະເພາະ ພວກເຮົາຕ້ອງປັບຕົວໃນການດຳລົງຊີວິດ, ການທໍາມາຫາກິນ ແລະ ການຜະລິດຕ່າງໆປົກກະຕິແບບໃໝ່, ຫາກຈະກັບໄປດຳລົງຊີວິດແບບເກົ່າ ແມ່ນເປັນໄປໄດ້ຍາກ. ສະນັ້ນ, ພວກເຮົາຕ້ອງປັບຕົວໄປຕາມມາດຕະການທີ່ພັກ-ລັດຖະບານ ວາງອອກແຕ່ລະໄລຍະ, ຊຶ່ງລັດຖະບານເຮົາ ແມ່ນພະຍາຍາມໃຫ້ມີການສົມດູນລະຫວ່າງ 3 ມາດຕະການ, ພ້ອມກັນນີ້ ລັດຖະບານ ແມ່ນຮັບຟັງຄຳຄິດຄຳເຫັນ ທີ່ສ້າງສັນ ແລະ ເບິ່ງສະພາບຕົວຈິງ ເພື່ອດັດສົມນະໂຍບາຍໃຫ້ສອດຄ່ອງກັບແຕ່ລະໄລຍະ; ຕະຫຼອດໄລຍະຜ່ານມາ, ລັດຖະບານ ໄດ້ຮັບຟັງ ແລະ ນຳມາຄົ້ນຄວ້າ ດັດສົມນະໂຍບາຍອອກເປັນແຕ່ລະໄລຍະ ຕາມສະພາບຕົວຈິງ ຄື ມີມາດຕະການຜ່ອນຜັນ ແລະ ມາດຕະການສືບຕໍ່ຈັດຕັ້ງປະຕິບັດ ເຮັດໃຫ້ມາດຕະການດ້ານການແພດ, ມາດຕະການດ້ານບໍລິຫານ ແລະ ມາດຕະການດ້ານເສດຖະກິດ ໄປນໍາກັນ, ຊຸກຍູ້ສົ່ງເສີມ ແລະ ກົມກຽວກັນ ສຳຄັນແມ່ນໄດ້ຄໍານຶງເຖິງ ຜົນກະທົບທາງດ້ານເສດຖະ ກິດ ແລະ ຊີວິດການເປັນຢຸູ່ຂອງປະຊາຊົນ.
ສັງລວມແລ້ວ, ທ່ານ ນາຍົກລັດຖະມົນຕີ ໄດ້ເນັ້ນວ່າ: ມາດຕະການ ທີ່ລັດຖະບານວາງອອກ ຖ້າປະຊາຊົນບໍ່ເຂົ້າຮ່ວມ ເຮັດແນວໃດກໍ່ເຮັດ ຈະບໍ່ມີຜົນສຳເລັດ. ສະນັ້ນ, ເພື່ອຜ່ານວິກິດນີ້ໄດ້ ຂໍໃຫ້ປະຊາຊົນ ເຂົ້າຮ່ວມ, ມີຄໍາເຫັນທີ່ສ້າງສັນ ແລະ ສະເໜີວິທີທາງອອກ ໃຫ້ລັດຖະບານ ເພື່ອພິຈາລະນາ ໃນການວາງນະໂຍບາຍ ໃຫ້ແທດເໝາະ ແລະ ຈັດຕັ້ງປະຕິບັດໃຫ້ມີຜົນສໍາເລັດ ຢ່າງມີປະສິດທິຜົນ ແຕ່ລະໄລຍະ. ອັນສໍາຄັນ ຕ້ອງໃຊ້ເຫດຜົນ ໃນການຕໍານິສົ່ງຂ່າວ, ບໍ່ໃຊ້ອາລົມ, ສະເໜີທາງອອກຢ່າງສ້າງສັນ, ສາມັກຄີ ຊ່ວຍເຫຼືອເຊິ່ງກັນ ແລະ ກັນ ຕາມສຸພະສິດຂອງບູຮານ ທີ່ວ່າ: “ໄມ້ລໍາດຽວ ລ້ອມຮົ້ວບໍ່ໄຂວ່ ປະຊາຊົນບໍ່ພ້ອມ ແປງບ້ານບໍ່ເຮືອງ”.
ໃນໂອກາດນີ້, ທ່ານນາຍົກລັດຖະມົນຕີ ໄດ້ກ່າວສະແດງຄວາມຍ້ອງຍໍຊົມເຊີຍ ທີມງານແພດໝໍ, ທີມງານເຈົ້າໜ້າທີ່ ທະຫານ, ຕຳຫຼວດ, ຄະນະສະເພາະກິດ ແລະ ທຸກພາກສ່ວນກ່ຽວຂ້ອງ ທີ່ໄດ້ເສຍສະຫຼະ ທຸ່ມເທເຫື່ອແຮງ ທັງເວັນ ທັງຄືນ, ສະຕິປັນຍາ ແລະ ອື່ນໆ ເຂົ້າໃນການປະຕິບັດໜ້າທີ່ ແລະ ຄວາມຮັບຜິດຊອບ ຂອງຕົນເຂົ້າໃນການ ແກ້ໄຂບັນຫາ ຢ່າງສຸດຄວາມສາມາດ, ຊຶ່ງທຸກຄົນ ຕ້ອງເຂົ້າໃຈ ແລະ ໃຫ້ກຳລັງໃຈພວກເພິ່ນ, ພ້ອມທັງ ສຶກສາອົບຮົມ ລູກຫຼານຂອງຕົນ ໃຫ້ການຮ່ວມມື ເຫັນອົກເຫັນໃຈ ເຊິ່ງກັນ ແລະ ກັນ.
ໃນຕອນທ້າຍ, ທ່ານນາຍົກລັດຖະມົນຕີ ເປີດໂອກາດ ໃຫ້ສື່ມວນຊົນຖາມ ແລະ ໃຫ້ຄວາມກະຈ່າງແຈ້ງ ຕໍ່ບັນ ຫາທີ່ສື່ມວນຊົນ ໄດ້ຕັ້ງຂຶ້ນ ເປັນຕົ້ນ ກ່ຽວກັບນະໂຍບາຍ ຫຼຸດຜ່ອນຜົນກະທົບທາງດ້ານເສດຖະກິດ ແລະ ສັງຄົມຂອງລັດຖະບານ; ແຜນການສັກວັກຊີນ ໃຫ້ບັນລຸຄາດໝາຍ ໃນປີ 2021; ແຜນການຮອງຮັບ ການເປີດນຳໃຊ້ເສັ້ນທາງລົດໄຟ ລາວ-ຈີນ ໃນທ້າຍປີນີ້; ການກະກຽມ ແລະ ຄວາມພ້ອມ ດ້ານສະຖານທີ່ປິ່ນປົວ ແລະ ຈຳກັດບໍລິເວນ; ແຜນການສ້າງສີມື ອາຊີບ ແລະ ວຽກເຮັດງານທຳ ໃຫ້ແຮງງານລາວ ທີ່ກັບຄືນມາປະເທດ ເພື່ອສ້າງເງື່ອນໄຂ ໃຫ້ເຂົາເຈົ້າປະກອບອາຊີບ ຢູ່ພາຍໃນປະເທດ; ບົດຮຽນຕ່າງປະເທດ ໃນການຄວບຄຸມ ແລະ ແກ້ໄຂໂຄວິດ-19 ໄດ້ດີ; ແລະ ຄຳສະເໜີ ຂໍທິດຊີ້ນຳ ຕໍ່ວຽກງານສື່ມວນຊົນ.
ພາບ ແລະ ຂ່າວ: ກົມປະຊາສຳພັນ ຫສນຍ.
